ប្រធានាធិបតីចិន លោក ស៊ី ជីនពីង ធ្វើដំណើរមកដល់ទីក្រុងប៉ារីស កាលពីរសៀលថ្ងៃអាទិត្យ ទី៥ ខែឧសភា ដើម្បីបំពេញទស្សនកិច្ចរយៈពេល ៥ថ្ងៃនៅប្រទេសបារាំង និង ២ថ្ងៃទៀតនៅប្រទេសហុងគ្រី និងប្រទេសហ្សែប៊ី។
នៅទីក្រុងប៉ារីស លោក ស៊ី ជីនពីង បានជួបប្រជុំជាមួយលោកប្រធានាធិបតីបារាំង Emmanuel Macron និងអ្នកស្រី Ursula von der Leyen ប្រធានគណៈកម្មការអឺរ៉ុប។
សំណុំរឿងសង្គ្រាមរុស្ស៊ី ឈ្លានពានអ៊ុយក្រែន ត្រូវបានលាតត្រដាងនៅចំពោះមុខលោក ស៊ី ជីនពីង ខណៈលោក ស៊ី ក៏លើកឡើងផងដែរអំពីស្ថានភាពតានតឹងនៃកិច្ចសហប្រតិបត្តិការពាណិជ្ជកម្មសហភាពអឺរ៉ុប និងចិន។
ប៉ុន្តែបើយោងតាមទីភ្នាក់ងារសារព័ត៌មាន Reuters ឲ្យដឹងថា មេដឹកនាំអឺរ៉ុប ព្យាយាមលើកឡើងពីសង្គ្រាមរបស់រុស្ស៊ី នៅអ៊ុយក្រែន ដោយភ្ជាប់ទៅនឹងសហប្រតិបត្តិការពាណិជ្ជកម្មរវាងសហភាពអឺរ៉ុប និងចិន។
ក្នុងជំនួបត្រីភាគីធ្វើឡើងនៅវិមានអេលីហ្សេ ប្រធានាធិបតីបារាំង និងប្រធានគណៈកម្មការអឺរ៉ុប បានប្រាប់ប្រធានាធិបតីចិន លោក Xi Jinping ថា អឺរ៉ុបចង់ឱ្យចិនប្រើឥទ្ធិពលរបស់ខ្លួនលើប្រទេសរុស្ស៊ី ដើម្បីបញ្ចប់សង្គ្រាមនៅអ៊ុយក្រែន តែសម្រាប់សហភាពអឺរ៉ុប មិនស្ទាក់ស្ទើរក្នុងការគាំទ្រទីក្រុងគៀវ ដែលប្រយុទ្ធដើម្បីសេរីភាពរបស់ខ្លួន។
ប្រធានាធិបតីបារាំង ព្យាយាមប្រាប់លោក ស៊ី ជីនពីង ឱ្យទៅនិយាយជាមួយភាគីរុស្ស៊ី ដើម្បីរកច្រកផ្លូវបិទបញ្ចប់សង្គ្រាម។ ចំណែកអ្នកស្រីប្រធានគណៈកម្មការអឺរ៉ុប បានប្រាប់លោក ស៊ី ថា អឺរ៉ុបគិតថាចិនត្រូវប្រើឥទ្ធិពលរបស់ខ្លួនទៅលើរុស្ស៊ី ឱ្យបញ្ចប់ការឈ្លានពានអ៊ុយក្រែន ដែលអ្នកស្រីថាចិន មានតួនាទីសំខាន់ណាស់ក្នុងការជួយបន្ថយការគំរាមកំហែងបង្កសង្គ្រាមនុយក្លេអ៊ែររបស់រុស្ស៊ី។
អ្នកស្រីទុកចិត្តថា លោក ស៊ី នឹងបន្តធ្វើអ្វីៗគ្រប់យ៉ាងគាបរុស្ស៊ី បញ្ឈប់ផែនការបង្កសង្គ្រាមនុយក្លេអ៊ែរ តែជាការប្រសើរណាស់ដែលចិន មិនបានបញ្ជូនអាវុធទៅជួយរុស្ស៊ី ធ្វើសង្គ្រាមនៅអ៊ុយក្រែន។
អ្នកស្រីប្រធានគណៈកម្មការអឺរ៉ុប ក៏បានទាមទារឱ្យចិន បញ្ឈប់ផងដែរការធ្វើជំនួញជាមួយរុស្ស៊ី។ អ្នកស្រីបញ្ជាក់ថា ចិនចង់បានទំនាក់ទំនងល្អផ្នែកពាណិជ្ជកម្មជាមួយអឺរ៉ុប តែចិនគួរបញ្ឈប់ការធ្វើជំនួញជាមួយរុស្ស៊ី។
តាងនាមឲ្យសហភាពអឺរ៉ុប អ្នកស្រី von der Leyen បាននិយាយថា ភាគីចិនត្រូវធានាឱ្យបាននូវការប្រកួតប្រជែងពាណិជ្ជកម្មប្រកបដោយភាពស្មោះត្រង់ និងមានសមភាពជាមួយអឺរ៉ុប។
យោងតាមប្រធានគណៈកម្មការអឺរ៉ុប បច្ចុប្បន្ន រដ្ឋាភិបាលចិនបានចំណាយប្រាក់ជួយឧបត្ថម្ភដល់ការផលិតទំនិញយុទ្ធសាស្ត្រមួយចំនួន ជាក់ស្តែងរថយន្តអគ្គិសនី និងដែកថែប ដើម្បីសម្រុកយកមកលក់នៅអឺរ៉ុប ក្នុងតម្លៃថោក តែគ្មានគុណភាព គឺជាការធ្វើពាណិជ្ជកម្មបែបមិនស្មោះត្រង់។
លើសពីទំនាក់ទំនងសេដ្ឋកិច្ច បណ្តាប្រទេសលោកខាងលិច បានសម្ដែងការព្រួយបារម្ភអំពីលទ្ធភាពដែលទីក្រុងប៉េកាំង ផ្តល់ការគាំទ្រផ្នែកយោធាដល់ទីក្រុងមូស្គូ និងព្យាយាមគេចចេញពីការចូលរួមជាមួយសហគមន៍អន្តរជាតិដាក់ទណ្ឌកម្មសេដ្ឋកិច្ចលើរុស្ស៊ី។
ក្នុងរយៈពេលប៉ុន្មានឆ្នាំចុងក្រោយនេះ ប្រទេសចិន បានពង្រឹងកិច្ចសហប្រតិបត្តិការពាណិជ្ជកម្ម និងយោធាជាមួយរុស្ស៊ី ជាពិសេសចាប់តាំងពីសហរដ្ឋអាមេរិក និងសម្ព័ន្ធមិត្តបានដាក់ទណ្ឌកម្មលើប្រទេសទាំងពីរដែលកាន់តែខ្លាំងឡើង បន្ទាប់ពីការលុកលុយរបស់ទីក្រុងមូស្គូ លើអ៊ុយក្រែន ក្នុងឆ្នាំ២០២២។
នៅក្នុងបទសម្ភាសន៍ជាមួយកាសែតបារាំង Le Figaro លោក ស៊ី បានលើកឡើងថា ចិនពិតជាចង់ចូលរួមធ្វើឱ្យស្ថិរភាព និងសន្តិភាពមានភាពប្រក្រតីវិញនៅអឺរ៉ុប។ លោក ស៊ី បន្តថា ចិននឹងចាប់ដៃគ្នាជាមួយបារាំង និងសហគមន៍អន្តរជាតិ ដើម្បីរួមគ្នាស្វែងរកច្រកផ្លូវឈានទៅដោះស្រាយបញ្ហាសង្គ្រាមនៅអ៊ុយក្រែន។
ទោះបីជាមានការព្រួយបារម្ភអំពីទំនាក់ទំនងកាន់តែស៊ីជម្រៅរវាងចិន និងរុស្ស៊ី ក៏ដោយ ក៏លោក ស៊ី បានធានាឡើងវិញថា ប្រទេសចិន មិនមានចេតនាផ្តល់ជំនួយផ្នែកយោធាដល់ទីក្រុងមូស្គូ នោះទេ ប៉ុន្តែបណ្ដាប្រទេសនៃសហភាពអឺរ៉ុប កំពុងពិចារណាទៅលើការដាក់ទណ្ឌកម្មប្រឆាំងនឹងក្រុមហ៊ុនចិនមួយចំនួនដែលលួចបញ្ជូនសម្ភារៈសឹកទៅឱ្យរុស្ស៊ី។
លោក ស៊ី ត្រូវទៅកាន់ប្រទេសហុងគ្រី និងប្រទេសហ្សែប៊ី ហើយនៅថ្ងៃទី១០ ឧសភា លោក ស៊ី នឹងត្រឡប់ទៅក្រុងប៉េកាំង វិញ ខណៈប្រធានាធិបតីរុស្ស៊ី លោក វ្ល៉ាឌីមៀ ពូទីន ត្រូវគេរំពឹងថានឹងធ្វើទស្សនកិច្ចនៅប្រទេសចិន នៅក្នុងខែឧសភា នេះដែរ។
លោក ពូទីន ធ្វើដំណើរទៅកាន់ក្រុងប៉េកាំង គឺជាលើកទី២ ហើយដែលបុរសខ្លាំងវិមានក្រឹមឡាំង នេះទៅចិន អំឡុងរុស្ស៊ី កំពុងធ្វើសង្គ្រាមឈ្លានពានអ៊ុយក្រែន និងជាមេដឹកនាំកំពុងជាប់ដីកាចាប់ខ្លួនរបស់តុលាការឧក្រិដ្ឋកម្មអន្តរជាតិ ICC ករណីឧក្រិដ្ឋកម្មសង្គ្រាមលើប្រជាជនអ៊ុយក្រែន។
គេនៅចាំបានថា នៅមុនសង្គ្រាមផ្ទុះឡើងនៅថ្ងៃទី២៤ ខែកុម្ភៈ ឆ្នាំ២០២២ លោក ពូទីន បានទៅជួបលោក ស៊ី នៅក្រុងប៉េកាំង ដែលកាលនោះលោក ពូទីន បានទៅចូលរួមបើកសម្ពោធព្រឹត្តិការណ៍កីឡាអូឡាំពិកអន្តរជាតិក្រុងប៉េកាំង។
នៅពេលនោះ ទ័ពរុស្ស៊ីបានឡោមព័ទ្ធប្រទេសអ៊ុយក្រែន ជុំជិតហើយ លោក ពូទីន ឋានៈជាប្រធានាធិបតីរុស្ស៊ី បានបញ្ជាឱ្យលើកទ័ព ២៥ម៉ឺននាក់ រួមមានរថក្រោះ រថពាសដែក កាំភ្លើងធំ ប្រព័ន្ធមីស៊ីល រួមទាំងយន្តហោះចម្បាំងជាងមួយម៉ឺនគ្រឿង បើកទ្វារសង្គ្រាមលុកលុយប្រទេសអ៊ុយក្រែន ដែលបង្កឱ្យមានសង្គ្រាមមកដល់ពេលនេះ៕