27 C
Phnom Penh

លោក ហ៊ុន ម៉ាណែត សន្យា​បង្កើត​តំបន់​សេដ្ឋកិច្ច​ពិសេស​ផ្ដាច់មុខ​សម្រាប់​ក្រុមហ៊ុន​កូរ៉េ​នៅ​កម្ពុជា

ដោយ ឌឹ ខេមបូឌា ដេលី

បទវិភាគ

នាយករដ្ឋមន្ត្រី​កម្ពុជា​លោក ហ៊ុន ម៉ាណែត សម្រេច​បង្កើត​តំបន់​សេដ្ឋកិច្ច​ពិសេស​ផ្ដាច់មុខ​សម្រាប់​ក្រុមហ៊ុន​កូរ៉េ និង​បង្កើត​យន្តការ​ពិគ្រោះ​យោបល់ ដែល​អាច​ឱ្យ​ធុរកិច្ច​កូរ៉េ ជួប​ជាមួយ​ក្រុមប្រឹក្សា​អភិវឌ្ឍន៍​កម្ពុជា​ពីរ​ដង​ក្នុង​មួយ​ឆ្នាំ ដើម្បី​ទាក់ទាញ​អ្នក​វិនិយោគ​កូរ៉េ ឱ្យ​ទៅ​បណ្ដាក់ទុន​នៅ​កម្ពុជា។

នាយករដ្ឋមន្ត្រី​បន្ត​ពូជ​ថ្មី​របស់​កម្ពុជា​លោក ហ៊ុន ម៉ាណែត លើកឡើង​ក្នុង​វេទិកា​ធុរកិច្ច​កម្ពុជា-សាធារណរដ្ឋ​កូរ៉េ ក្នុង​ដំណើរ​ទស្សនកិច្ច​នៅ​កូរ៉េខាងត្បូង នៅ​ថ្ងៃទី​១៧ ឧសភា នេះ​ថា រដ្ឋាភិបាល​កម្ពុជា​សង្ឃឹម​ថា​អ្នក​វិនិយោគ​កូរ៉េ នឹង​ស្វែងយល់​ពី​គំនិត​ផ្ដួចផ្ដើម​ថ្មី​នេះ។

លោក​បន្ថែម​ថា គំនិត​ផ្ដួចផ្ដើម​នេះ គឺជា​ការ​លើក​ទឹកចិត្ត និង​ជា​វិធីសាស្ត្រ​ប្រកប​ដោយ​ភាព​ច្នៃប្រឌិត​របស់​កម្ពុជា ក្នុង​ការ​ព្យាយាម​កែលំអ​ភាព​ទាក់ទាញ​ឱ្យ​សមស្រប​ទៅ​នឹង​តម្រូវការ​របស់​អ្នក​វិនិយោគ​នៅ​ក្នុង​ប្រទេស​កម្ពុជា​សម្រាប់​ធុរកិច្ច​កូរ៉េ។

លោក ហ៊ុន ម៉ាណែត លើកឡើង​ថា តាមរយៈ​គំនិត​ផ្ដួចផ្ដើម​ថ្មី​នេះ អាជីវកម្ម​កាន់តែ​ច្រើន និង​វិស័យ​ឯកជន​កាន់តែ​ច្រើន​ពី​ប្រទេស​កូរ៉េ នឹង​ស្វែងរក​ប្រទេស​កម្ពុជា​ជា​ដៃគូ​ដ៏​ល្អ​សម្រាប់​ការ​វិនិយោគ និង​ធ្វើ​ធុរកិច្ច ព្រោះ​សព្វថ្ងៃ​នេះ កម្ពុជា​កំពុង​បង្កើត​សហគមន៍​ធុរកិច្ច និង​ការ​វិនិយោគ​របស់​កូរ៉េ​នៅ​កម្ពុជា ដើម្បី​ធានា​ថា បញ្ហា​របស់​អ្នក​ធ្វើ​ធុរកិច្ច អ្នក​វិនិយោគ បាន​យកចិត្ត​ទុកដាក់ និង​រួម​គ្នា​ស្វែងរក​ដំណោះស្រាយ​ទាន់​ពេលវេលា។

នាយករដ្ឋមន្ត្រី​ថ្មី​របស់​កម្ពុជា​រូប​នេះ បញ្ជាក់​ថា គំនិត​ផ្ដួចផ្ដើម​ថ្មី​នេះ គឺ​អាច​ការពារ​អ្វី​ដែល​មាន​ស្រាប់ ព្រោះ​ថា ប្រសិនបើ​កម្ពុជា​មិន​អាច​ការពារ​អាជីវកម្ម​ដែល​មាន​ស្រាប់​នៅ​ក្នុង​ប្រទេស​កម្ពុជា និង​បង្កើត​បរិយាកាស​ឱ្យ​ពួកគេ​រីកចម្រើន​ទេ នោះ​កម្ពុជា​ក៏​មិន​រំពឹង​ថា​នឹង​ទាក់ទាញ​ការ​វិនិយោគ​ថ្មី​បាន​ដែរ។

ការ​អះអាង​នេះ ធ្វើ​ឡើង​ក្នុង​បំណង​ដើម្បី​ជំរុញ​ឱ្យ​អ្នក​វិនិយោគ​កូរ៉េ ទៅ​បណ្ដាក់ទុន​វិនិយោគ​នៅ​កម្ពុជា ស្រប​ពេល​ដែល​គេ​មើល​ឃើញ​ថា កម្ពុជា​មិន​ទាន់​ទទួល​បាន​អ្នក​វិនិយោគ​បរទេស​ជា​ដុំកំភួន​នៅឡើយ​ទេ​ចាប់តាំងពី​លោក ហ៊ុន ម៉ាណែត ឡើង​កាន់​តំណែង​ជា​នាយករដ្ឋមន្ត្រី​ជិត ១​ឆ្នាំ​មក​នេះ។

ចាប់តាំងពី​លោក ហ៊ុន ម៉ាណែត ឡើង​កាន់​តំណែង​ជា​នាយករដ្ឋមន្ត្រី​ជិត ១​ឆ្នាំ​មក​នេះ គេ​មិន​ទាន់​ឃើញ​រដ្ឋាភិបាល​កម្ពុជា ទទួល​បាន​អ្នក​វិនិយោគ​ពី​ប្រទេស​លោក​សេរី ដូចជា សហរដ្ឋ​អាមេរិក ជាដើម ជា​ដុំកំភួន​នៅឡើយ​ទេ បើ​ទោះបីជា​លោក ហ៊ុន ម៉ាណែត ធ្លាប់​លើកឡើង​ពី​ការ​គោះ​ទ្វារ​ឱ្យ​អ្នក​វិនិយោគ​ក្នុង​សហគមន៍​អឺរ៉ុប ទៅ​បណ្ដាក់ទុន​រកស៊ី​នៅ​កម្ពុជា ចាប់តាំងពី​អំឡុង​ខែ​មករា ឆ្នាំ​២០២៤ កន្លង​ទៅ​ក៏ដោយ។

ជាង​នេះ​ទៀត ដើម្បី​ទាក់ទាញ​អ្នក​វិនិយោគ​ទាំងនោះ កាលពី​ចុង​ខែ​មករា ឆ្នាំ​២០២៤ លោក ហ៊ុន ម៉ាណែត ក៏​បាន​ប្រកាស​លើក​ទឹកចិត្ត​ដោយ​បើក​ចំហ​ទទួល​វិនិយោគ​បរទេស​ដែល​ហ៊ាន​បណ្ដាក់ទុន​នៅ​កម្ពុជា​រយៈពេល​វែង​ចាប់ ១​សែន​ដុល្លារ​អាមេរិក​ឡើង​ទៅ (១០០ ០០០​ដុល្លារ​អាមេរិក) នឹង​ទទួល​បាន​ការ​ផ្តល់​ឱ្យ​នូវ​ទិដ្ឋាការ​ពិសេស​រយៈពេល ៣​ឆ្នាំ​ដែរ ប៉ុន្តែ​គេ​ក៏​នៅតែ​មិន​ទាន់​ឃើញ​អ្នក​វិនិយោគ​ពី​ប្រទេស​លោក​សេរី នាំគ្នា​ទៅ​បណ្ដាក់ទុន​នៅ​កម្ពុជា​ដែរ​រហូត​ដល់​ពេលនេះ។

ទាក់ទិន​នឹង​បញ្ហា​នេះ ប្រធាន​វិទ្យាស្ថាន​ប្រជាធិបតេយ្យ​កម្ពុជា​បណ្ឌិត ប៉ា ចន្ទរឿន ធ្លាប់​បាន​លើកឡើង​កាលពី​ពេល​ថ្មីៗ​នេះ​ថា កម្ពុជា​នឹង​ទទួល​បាន​ការ​វិនិយោគ​កាន់តែ​ច្រើន​ពី​ក្រុមហ៊ុន​អន្តរជាតិ​ធំៗ ប្រសិនបើ​រដ្ឋាភិបាល​កម្ពុជា​មាន​ប្រព័ន្ធ​ដឹកនាំ​គួរ​ឱ្យ​ពួកគេ​ទុកចិត្ត​បាន ដើម្បី​ធានា​សុវត្ថិភាព​ដល់​ក្រុមហ៊ុន​របស់​ពួកគេ។

កាលពី​ពាក់កណ្តាល​ខែ​មករា ឆ្នាំ​២០២៤ លោក ហ៊ុន ម៉ាណែត ត្រូវ​គេ​ចាត់​បញ្ចូល​ទៅ​ក្នុង​ចំណោម​មេដឹកនាំ និង​អ្នកជំនួញ​កខ្វក់​ចំនួន ១២​នាក់​ក្នុង​ពិភពលោក អំឡុង​ពេល​ដែល​លោក​ទៅ​ចូលរួម​ប្រជុំ​ក្នុង​វេទិកា​សេដ្ឋកិច្ច​ពិភពលោក​នៅ​ទីក្រុង​ដាវ៉ូស ប្រទេស​ស្វីស។

អតីត​មេដឹកនាំ​ប្រឆាំង​លោក សម រង្ស៊ី លើកឡើង​កាលពី​ពេល​ថ្មីៗ​នេះ​ថា មូលហេតុ​ដែល​កម្ពុជា​បាត់បង់​ឱកាស​វិនិយោគ​ល្អៗ​ពី​បរទេស គឺ​ដោយសារ​តែ​កម្ពុជា​នៅតែ​បន្ត​សហការ​វិនិយោគ​ជាមួយ​ក្រុម​ចោរ​ម៉ាហ្វីយ៉ា​ចិន (Mafia) ដែល​ពួកគេ​បាន​បំផ្លិចបំផ្លាញ និង​កេងប្រវ័ញ្ច​កម្លាំង​ញើស​ឈាម​ពលរដ្ឋ​ខ្មែរ​យ៉ាង​ធ្ងន់ធ្ងរ។

លោក សម រង្ស៊ី លើកឡើង​ថា ដោយសារ​តែ​ការ​ដឹកនាំ​របស់​រដ្ឋាភិបាល​ក្រោម​ការ​គ្រប់គ្រង​របស់​គណបក្ស​ប្រជាជន​កម្ពុជា​ដូច​សព្វថ្ងៃ​នេះ ទើប​បាន​ធ្វើ​ឲ្យ​សេដ្ឋកិច្ច និង​ការ​អភិវឌ្ឍ​របស់​ប្រទេស​កម្ពុជា ចេះ​តែ​ដើរ​ថយ​ក្រោយ​ទៅៗ នៅ​ពេល​ដែល​ប្រទេស​ជិតខាង​កាន់តែ​ដើរ​ទៅ​មុខ​រឹតតែ​ខ្លាំង។

សព្វថ្ងៃ កម្ពុជា​មាន​តំបន់​សេដ្ឋកិច្ច​ពិសេស (ត.ស.ព.) កំពុង​ដំណើរការ​ចំនួន ២៤​ទីតាំង ស្ថិត​នៅ ៩​រាជធានី-ខេត្ត ក្នុង​នោះ​នៅ​រាជធានី​ភ្នំពេញ​មាន​តំបន់​សេដ្ឋកិច្ច​ចំនួន​២ ខេត្ត​កណ្តាល មាន​២ ខេត្ត​កំពង់ស្ពឺ មាន​១ ខេត្ត​ព្រះសីហនុ មាន​៤ ខេត្ត​កំពត មាន​១ ខេត្ត​កោះកុង មាន​១ ខេត្ត​ក្រចេះ មាន​១ ខេត្ត​ស្វាយរៀង មាន ៩​កន្លែង និង​ខេត្ត​បន្ទាយមានជ័យ មាន​តំបន់​សេដ្ឋកិច្ច​ពិសេស​ចំនួន ៣​កន្លែង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស