25.9 C
Phnom Penh

មេ​បក្ស​ប្រជាជន​កម្ពុជា រំឭក​ខ្មែរ​ឱ្យ​ចងចាំ​របប​ប្រល័យ​ពូជ​សាសន៍​ថ្ងៃ ២០ ឧសភា

ដោយ ឌឹ ខេមបូឌា ដេលី

បទវិភាគ

អតីត​មេ​កម្មាភិបាល​យោធា​ខ្មែរក្រហម លោក ហ៊ុន សែន ដែល​បច្ចុប្បន្ន​ជា​ប្រធាន​គណបក្ស​កាន់​អំណាច និង​ប្រធាន​ព្រឹទ្ធសភា បាន​ព្រមាន​ថា ដើម្បី​កុំ​ឱ្យ​របប​ប្រល័យ​ពូជ​សាសន៍ ប៉ុល ពត វិល​ត្រឡប់​មក​វិញ ប្រជាពលរដ្ឋ​ខ្មែរ​ត្រូវតែ​ចូលរួម​ថែរក្សា​ការពារ​សន្តិភាព​ឱ្យ​បាន​គង់វង្ស។

អតីត​កម្មាភិបាល​យោធា​ជាន់ខ្ពស់​នៃ​របប​ខ្មែរក្រហម លោក ហ៊ុន សែន សរសេរ​លើ​ទំព័រ​ហ្វេសប៊ុក​របស់​ខ្លួន​នៅ​ថ្ងៃទី​២០ ឧសភា នេះ​ថា ថ្ងៃ​នេះ​ជា​ថ្ងៃ​ទិវា​ជាតិ​នៃ​ការ​ចងចាំ «២០ ឧសភា» ដែល​ជា​ថ្ងៃ​ប្រជាជន​កម្ពុជា​គ្រប់ៗ​រូប​ចងចាំ​មិន​អាច​បំភ្លេច​បាន​ក្នុង​របប​កម្ពុជា​ប្រជាធិបតេយ្យ ឬ​ហៅថា​របប​ប្រល័យ​ពូជ​សាសន៍ ប៉ុល ពត ដែល​ជា​របប​ដ៏​ឃោរឃៅ និង​ខ្មៅ​ងងឹត។

លោក ហ៊ុន សែន លើកឡើង​ថា ការ​ប្រារព្ធ​ទិវា​នេះ គឺជា​ការ​រំលឹក​ដល់​វិញ្ញាណក្ខន្ធ​ជនរងគ្រោះ​ជាង ៣​លាន​នាក់​ដែល​បាន​ស្លាប់​បាត់បង់​ជីវិត​នៅ​ក្នុង​របប​ប្រល័យ​ពូជ​សាសន៍ ប៉ុល ពត ដែល​ប្រជាពលរដ្ឋ​កម្ពុជា​ភាគច្រើន​លើសលប់​បាន​ដឹង និង​បាន​យល់​ច្បាស់​អំពី​រឿងរ៉ាវ​សោកនាដកម្ម​ដ៏​ជូរចត់​នេះ។

មេដឹកនាំ​រស់​មិន​ដល់​ទី​បញ្ចប់​នៃ​របប​វាល​ពិឃាត​រូប​នេះ​បញ្ជាក់​ថា ប្រជាពលរដ្ឋ​ខ្មែរ​ជាច្រើន​សុទ្ធតែ​បាន​ឆ្លងកាត់​ភ្នក់ភ្លើង​សង្គ្រាម​ដែល​ពោរពេញ​ទៅ​ដោយ​ការ​កាប់​សម្លាប់ ការ​ជម្លៀស​ចេញពី​ទី​លំនៅឋាន​ដោយ​បង្ខំ និង​ការ​បង្ខំ​ឱ្យ​ធ្វើការ​ដូច​សត្វ​ធាតុ ដោយ​គ្មាន​ថ្នាំសង្កូវ គ្មាន​អាហារ​បរិភោគ​គ្រប់គ្រាន់ គ្មាន​សិទ្ធិ​សេរីភាព គ្មាន​លទ្ធិប្រជាធិបតេយ្យ សូម្បីតែ​សិទ្ធិ​រស់​រាន​មាន​ជីវិត​ដែល​ជា​សិទ្ធិ​មូលដ្ឋាន​មាន​ពី​កំណើត​របស់​មនុស្ស ក៏​គ្មាន​ដែរ។

កាលពី​ថ្ងៃទី​១៤ ខែ​កុម្ភៈ ឆ្នាំ​២០១៨ រាជរដ្ឋាភិបាល​កម្ពុជា​ចេញ​អនុក្រឹត្យ​កំណត់​យក​ថ្ងៃទី​២០ ខែ​ឧសភា ជា​រៀង​រាល់​ឆ្នាំ ជា «ទិវា​ជាតិ​នៃ​ការ​ចងចាំ» ដែល​ជា​ថ្ងៃ​បុណ្យ​ជាតិ​ផ្លូវការ​មួយ​នៃ​ប្រទេស​កម្ពុជា ដើម្បី​គោរព​ដល់​វិញ្ញាណក្ខន្ធ​អ្នក​ដែល​បាន​ស្លាប់​ក្នុង​របប​កម្ពុជា​ប្រជាធិបតេយ្យ ឬ​ខ្មែរក្រហម និង​ការ​ប៉ះប៉ូវ​នូវ​ការ​ឈឺចាប់​ផ្លូវចិត្ត និង​ផ្នែក​សង្គម​ដល់​ជនរងគ្រោះ រួម​ទាំង​ក្រុម​គ្រួសារ​របស់​ពួកគេ។

ទាក់ទិន​នឹង​បញ្ហា​នេះ នាយករដ្ឋមន្ត្រី​បច្ចុប្បន្ន លោក ហ៊ុន ម៉ាណែត លើកឡើង​ក្នុង​សន្និសីទ​ស្ដីពី «អនាគត​កម្ពុជា​គ្មាន​អំពើ​ប្រល័យ​ពូជ​សាសន៍» នៅ​ថ្ងៃទី​២០ ខែ​ឧសភា ឆ្នាំ​២០២៤ នេះ​ថា ដើម្បី​ទប់ស្កាត់​របប​ប្រល័យ​ពូជ​សាសន៍​កុំ​ឱ្យ​កើតឡើង​នៅ​ប្រទេស​កម្ពុជា​ម្ដង​ទៀត រាជរដ្ឋាភិបាល ប្រជាពលរដ្ឋ និង​គ្រប់​ភាគី​ពាក់ព័ន្ធ ត្រូវតែ​រួម​គ្នា​ការពារ​សន្តិភាព​ឱ្យខាងតែ​បាន។

អ្នក​សង្កេតការណ៍​ខ្លះ​និយាយ​ថា សម័យ​ខ្មែរក្រហម ពួក​កុម្មុយនីស្ត​សម្លាប់​ពលរដ្ឋ​ខ្មែរ​មិន​រើស​មុខ​យ៉ាង​រង្គាល ទាំង​ហ្វូងៗ តាម​សហករណ៍ កប់​ក្នុង​រណ្តៅ​រួម​គ្នា។ រីឯ​សម័យ​នេះ ពួក​អតីត​ខ្មែរក្រហម និង​ខ្មែរ​យៀកមិញ​ក្រហម សម្លាប់​ពលរដ្ឋ​ខ្មែរ​ម្តង​បន្តិចៗ​គ្មាន​រណ្តៅ។

លោក ហ៊ុន ម៉ាណែត លើកឡើង​ថា ប្រជាពលរដ្ឋ​ក៏​ត្រូវ​ចូលរួម​បញ្ចៀស​សង្គ្រាម​កុំ​ឱ្យ​កើត​មាន​ដាច់ខាត ព្រោះ​ថា​បើ​កើត​មាន​សង្គ្រាម គ្មាន​ឡើយ​សិទ្ធិមនុស្ស និង​លទ្ធិប្រជាធិបតេយ្យ ដូច្នេះ​ចំណុច​ដែល​សំខាន់​បំផុត គឺ​ត្រូវតែ​នាំគ្នា​ការពារ​សន្តិភាព​ដែល​រក​បាន​ដោយ​លំបាក​បំផុត​ឱ្យខាងតែ​បាន ទោះ​ជា​ក្នុង​តម្លៃ​ណា​ក៏ដោយ។

អនុប្រធាន​វេទិកា​ពលរដ្ឋ​លោក ម៉ែន ណាត ប្រាប់​សារព័ត៌មាន The Cambodia Daily នៅ​ថ្ងៃទី​២០ ឧសភា នេះ​ថា ការ​ដឹកនាំ​របស់​គណបក្ស​ប្រជាជន​កម្ពុជា​ដែល​មាន​លោក ហ៊ុន សែន ជា​អ្នក​កាច់​ចង្កូត​សព្វថ្ងៃ​នេះ កំពុង​ដឹកនាំ​ប្រជាពលរដ្ឋ​ខ្មែរ​ទៅ​រក​ការ​បិទ​សិទ្ធិ​សេរីភាព ការ​រើសអើង​រវាង​ខ្មែរ និង​ខ្មែរ មិន​ខុស​ពី​របប​ប្រល័យ​ពូជ​សាសន៍ ប៉ុល ពត ទេ។

លោក ម៉ែន ណាត លើកឡើង​ថា ការ​អនុវត្ត​ការ​ដឹកនាំ​របប​ខ្មែរក្រហម និង​ការ​ដឹកនាំ​របស់​រដ្ឋាភិបាល​សម័យ​លោក ហ៊ុន សែន បន្ត​មក​លោក ហ៊ុន ម៉ាណែត គឺ​ដូច​គ្នា​បេះបិទ ព្រោះ​ថា​ដើម្បី​បំបិទ​សិទ្ធិ​សេរីភាព​ពលរដ្ឋ​ដែល​តវ៉ា​នឹង​ការ​ដឹកនាំ​របស់​លោក ពលរដ្ឋ​ទាំងនោះ​តែងតែ​ត្រូវ​រង​ការ​ចាប់​ឃុំ​ខ្លួន ឬ​រង​នូវ​ការ​បាញ់​សម្លាប់ ជាដើម។

អនុប្រធាន​វេទិកា​ពលរដ្ឋ​រូប​នេះ​បញ្ជាក់​ថា ដើម្បី​រក​សេចក្តី​សុខ​ជូន​ពលរដ្ឋ និង​កុំ​ឲ្យ​របប​ខ្មៅ​ងងឹត​ឃោរឃៅ​បែប​នេះ​កើត​មាន​លើ​ទឹកដី​កម្ពុជា មេដឹកនាំ​កម្ពុជា​ត្រូវតែ​ធ្វើ​នយោបាយ​បង្រួបបង្រួម​ជាតិ រក​ការ​ចរចា និង​ផ្សះផ្សា​ជាតិ ដើម្បី​ឲ្យ​កម្ពុជា​ក្លាយ​ជា​ប្រទេស​កាន់​របប​លទ្ធិប្រជាធិបតេយ្យ​ពិតប្រាកដ ស្រប​តាម​ខ្លឹមសារ​នៃ​រដ្ឋធម្មនុញ្ញ​របស់​ខ្លួន។

ប្រជាពលរដ្ឋ​ខ្មែរ​ដែល​បាន​ស្លាប់​ក្នុង​របប​ខ្មែរក្រហម នៅតែ​មិន​ទាន់​ទទួល​បាន​យុត្តិធម៌​នៅឡើយ ទោះ​ប្រទេស​កម្ពុជា​រួច​ផុត​ពី​របប​ខ្មៅ​ងងឹត​នេះ​អស់​រយៈពេល​ជាង ៣០​ឆ្នាំ​ហើយ​ក៏ដោយ ខណៈ​ជនរងគ្រោះ​ដែល​បាន​ស្លាប់​ក្រោម​ការ​ដឹកនាំ​របស់​គណបក្ស​ប្រជាជន​កម្ពុជា ក៏​មិន​ដែល​ទទួល​បាន​យុត្តិធម៌​ដូច​គ្នា​ដែរ ទោះ​អំពើ​ឃាតកម្ម​ទាំងនោះ​បាន​កើតឡើង​តាំងពី​ជាង ២០​ឆ្នាំ​មុន​ក៏ដោយ។

ជាក់ស្តែង ដូចជា​ការ​បាញ់​សម្លាប់​នាដការី​ក្នុង​ទសវត្សរ៍​១៩៩០ អ្នកស្រី ពិសិដ្ឋ ពីលីកា ការ​បាញ់​សម្លាប់​មេដឹកនាំ​សហជីព​លោក ជា វិជ្ជា ការ​បាញ់​សម្លាប់​សកម្មជន​ការពារ​ព្រៃឈើ​លោក ឈុត វុទ្ធី ការ​បាញ់​សម្លាប់​ព្រះ​ភិក្ខុ សំ ប៊ុនធឿន ការ​បាញ់​សម្លាប់​អ្នក​ស្រាវជ្រាវ​ការ​អភិវឌ្ឍន៍​សង្គម​បណ្ឌិត កែម ឡី ជាដើម។

បន្ថែម​លើ​នេះ​ទៀត ការ​បាញ់​សម្លាប់​កងទ័ព​រាជា​និយម​រាប់​រយ​នាក់​កណ្តាល​ទីក្រុង​ភ្នំពេញ​ពី​សំណាក់​កងទ័ព​ក្រោម​បញ្ជា​លោក ហ៊ុន សែន កាលពី​ឆ្នាំ​១៩៩៧ ក៏​រដ្ឋាភិបាល​ខ្មែរ​មិន​ទាន់​អាច​វែក​មុខ​ឃាតករ​ពិត​យក​មក​ផ្ដន្ទាទោស​តាម​ច្បាប់​ដែរ​រហូត​ដល់​ពេលនេះ។

ទាក់ទិន​នឹង​បញ្ហា​នេះ អ្នកវិភាគ​ឯករាជ្យ​លោក គឹម សុខ បាន​លើកឡើង​ថា មេដឹកនាំ​ខ្មែរ​បាតដៃ​ប្រឡាក់​ឈាម​លោក ហ៊ុន សែន បាន​ជាប់​ពាក់ព័ន្ធ​ក្នុង​ឧក្រិដ្ឋកម្ម​ធំៗ​ទាំងអស់​ដែល​កើត​មាន​នៅ​ក្នុង​ប្រទេស​កម្ពុជា ដូចជា​ឧក្រិដ្ឋកម្ម​ប្រឆាំង​មនុស្ស​ជាតិ ឧក្រិដ្ឋកម្ម​សង្គ្រាម ឧក្រិដ្ឋកម្ម​ឈ្លានពាន និង​ឧក្រិដ្ឋកម្ម​បែប​ភេរវកម្ម​រដ្ឋ ឬ​ឧក្រិដ្ឋកម្ម​បែប​បណ្ដាញ ជាដើម។

លោក គឹម សុខ បញ្ជាក់​ថា លោក ហ៊ុន សែន គឺជា​មនុស្ស​តែ​ម្នាក់​គត់​ដែល​បាន​ជាប់​ពាក់ព័ន្ធ​នឹង​ឧក្រិដ្ឋកម្ម​សង្គ្រាម​អំឡុង​ពេល​ធ្វើ​រដ្ឋប្រហារ​ឆ្នាំ​១៩៩៧ និង​នៅ​ពីក្រោយ​នៃ​ការ​សម្លាប់​មនុស្ស​ល្បីៗ​ជាច្រើន​នាក់​ទៀត ហើយ​ទង្វើ​នេះ​បង្ហាញ​ថា របប​ប្រល័យ​ពូជ​សាសន៍ ប៉ុល ពត កំពុង​រស់​រាន​មាន​ជីវិត​ក្នុង​ប្រព័ន្ធ​ដឹកនាំ​របស់​គណបក្ស​ប្រជាជន​កម្ពុជា​សព្វថ្ងៃ​នេះ​នៅឡើយ ទោះ​មេដឹកនាំ​ខ្មែរក្រហម​លោក ប៉ុល ពត បាន​ស្លាប់​ទៅ​ហើយ​ក្តី។

គួរ​រំឭក​ថា លោក ហ៊ុន សែន ឈ្មោះ​ដើម ហ៊ុន ណាល់ ឬ ហ៊ុន ប៊ុនណាល់ បាន​រត់​គេច​ខ្លួន​ចូល​ទៅ​ប្រទេស​យៀកណាម នា​ឆ្នាំ​១៩៧៧ ដោយ​ភ័យខ្លាច​ពួក ប៉ុល ពត ចាប់​ទៅ​សម្លាប់​ក្នុង​ពេល​គេ​ចាប់ផ្តើម​បោស​សម្អាត​ក្រុម​ដែល​គេ​ចោទ​ថា “ក្បាល​យួន ខ្លួន​ខ្មែរ” ដែល​ប៉ុនប៉ង​ធ្វើ​រដ្ឋប្រហារ​រំលំ​បក្ស​កុម្មុយនីស្ត​កម្ពុជា ពីព្រោះ​លោក ហ៊ុន សែន ស្ថិត​នៅ​ក្រោម​បញ្ជា​សមមិត្ត ស ភិម និង ហេង សំរិន នៅ​តំបន់​បូព៌ា។

មាន​សមាជិក​អតីត​បក្ស​ប្រជាជន​បដិវត្តន៍​កម្ពុជា​មួយ​ចំនួន​និយាយ​ស្ងាត់ៗ​ថា រដ្ឋ​អំណាច​យៀកណាម ចាប់​លោក ហ៊ុន សែន ដាក់​នៅ​មន្ទីរ​ឃុំគ្រង​មួយ​រហូត​ជិត​ដល់​ថ្ងៃ​កងទ័ព​ប្រជាជន​យៀកណាម បើក​ការ​វាយប្រហារ​រំលំ​របប​ខ្មែរក្រហម​ដែល ប៉ុល ពត ដឹកនាំ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស