ទីស្នាក់ការត្រួតពិនិត្យច្រកទ្វារព្រំដែនអន្តរជាតិប៉ោយប៉ែត បានឲ្យដឹងថា នៅក្នុងខែឧសភា អាជ្ញាធរថៃ បានចាប់បញ្ជូនពលករខ្មែរខុសច្បាប់ដោយសារចាញ់បោកមេខ្យល់ មកប្រទេសកម្ពុជាវិញជាង ៦០០នាក់។
យោងតាមសេចក្តីប្រកាសព័ត៌មានរបស់ទីស្នាក់ការត្រួតពិនិត្យច្រកទ្វារព្រំដែនអន្តរជាតិប៉ោយប៉ែត នៅថ្ងៃទី១២ ខែឧសភា បានឲ្យដឹងថា ក្នុងមួយខែឧសភា ឆ្នាំ២០២៤ នេះ អាជ្ញាធរថៃ បានចាប់បញ្ជូនពលករខ្មែរដែលលួចឆ្លងដែនខុសច្បាប់ដោយសារចាញ់បោកមេខ្យល់ ចំនួន ៦៣២នាក់ ក្នុងនោះមានស្ត្រី ២១៧នាក់ និងកុមារ ៨០នាក់ មកប្រទេសកម្ពុជាវិញ។
តាមសេចក្តីប្រកាសព័ត៌មានដដែលបានឲ្យដឹងថា ពលករខុសច្បាប់ទាំងជាង ៦០០នាក់នោះត្រូវបានបញ្ជូនបន្តទៅមជ្ឈមណ្ឌលសំចតក្រុងប៉ោយប៉ែតដើម្បីអប់រំពួកគេ មុននឹងបញ្ជូនឱ្យត្រឡប់ទៅលំនៅឋានរៀងៗខ្លួនវិញ។
ប្រភពដដែលបានអះអាងថា អាជ្ញាធរថៃ ក៏បានបញ្ជូនសពពលករខ្មែរដែលបានស្លាប់នៅប្រទេសថៃចំនួន ១៣នាក់ មកកម្ពុជាវិញផងដែរ ក្នុងនោះ ៦នាក់ស្លាប់ដោយសារជំងឺ និង ៧នាក់ទៀតស្លាប់ដោយសារចងក ខ្យល់គរ និងឃាតកម្មបាញ់សម្លាប់។
សេចក្តីប្រកាសព័ត៌មានខាងលើបានអះអាងថា សមត្ថកិច្ចជំនាញគ្រប់ផ្នែកដែលបំពេញការងារប្រចាំថ្ងៃនៅច្រកទ្វារ បានសហការសម្របសម្រួល និងដោះស្រាយរាល់បញ្ហាឆ្លងដែនជាមួយអាជ្ញាធរថៃ និងស្ថានអគ្គកុងស៊ុលកម្ពុជាប្រចាំខេត្តស្រះកែវ ប្រទេសថៃ ផងដែរ។
ទាក់ទិននឹងបញ្ហានេះ អតីតអ្នកនាំពាក្យសមាគមអាដហុក (Adhoc) លោក ស៊ឹង សែនករុណា ឲ្យដឹងថា ការចាប់បញ្ជូនពលករខ្មែរពីសំណាក់អាជ្ញាធរថៃ មកកម្ពុជាវិញនោះ គឺបង្ហាញអំពីការពិតដែលពលករខ្មែរកំពុងប្រឈម គឺពួកគេខ្វះព័ត៌មានស្ដីពីចំណាកស្រុក និងដំណើរការនីតិវិធីច្បាប់ស្មុគស្មាញដែលត្រូវចំណាយពេលវេលា និងលុយកាក់ច្រើន។
លោក ស៊ឹង សែនករុណា បន្ថែមទៀតថា រាជរដ្ឋាភិបាលកម្ពុជាគួរតែបង្កើតឱកាសការងារក្នុងស្រុកដល់ពលរដ្ឋកម្ពុជាឱ្យបានច្រើន ជាជាងដែលមើលឃើញពីពលរដ្ឋខ្លួនឯងត្រូវបង្ខំចិត្តចាកចេញពីស្រុកកំណើតរបស់ខ្លួន ដើម្បីទៅធ្វើការរកចំណូលនៅក្រៅប្រទេស។
របាយការណ៍របស់ក្រសួងការងារ កន្លងមកបានឲ្យដឹងថា ប្រាក់ឈ្នួលជាមធ្យមខ្ពស់ក្នុង ១ខែ ដែលពលករទទួលបាន គឺនៅប្រទេសកូរ៉េ ប្រមាណ ១៥០០ដុល្លារអាមេរិក, ជប៉ុន ប្រមាណ ១៤០០ដុល្លារអាមេរិក, ប្រទេសថៃ ប្រមាណ ៤០០ដុល្លារអាមេរិក និងប្រទេសម៉ាឡេស៊ី ប្រមាណ ៣០០ដុល្លារអាមេរិក។ បើគិតពីចំណូលរបស់ពលករបានផ្ញើមកគ្រួសារពីគ្រប់ប្រទេស មានប្រមាណជាង ២,៧ពាន់លានដុល្លារអាមេរិកក្នុង ១ឆ្នាំ។
យោងតាមរបាយការណ៍របស់ក្រសួងការងារ បានអះអាងថា គិតត្រឹមខែឧសភា ឆ្នាំ២០២៣ ពលករកម្ពុជាប្រមាណជាង ១លាន ៣សែននាក់ កំពុងធ្វើការនៅក្រៅប្រទេស ក្នុងនោះប្រទេសថៃ ចំនួន ១លាន ២សែននាក់, កូរ៉េ ចំនួន ៤ម៉ឺន ៩ពាន់នាក់, ម៉ាឡេស៊ី ចំនួន ២ម៉ឺន ២ពាន់នាក់ និងជប៉ុន ចំនួន ១ម៉ឺន ៩ពាន់នាក់។ ពលករកម្ពុជាទាំងអស់នេះ ទទួលបានអត្ថប្រយោជន៍ផ្សេងៗតាមច្បាប់នៃប្រទេសនីមួយៗ រួមទាំងប្រាក់ឈ្នួល និងរបបសន្តិសុខសង្គម។
យោងតាមតួលេខរបស់មជ្ឈមណ្ឌលសង់ត្រាល់ ឲ្យដឹងថា ពលករខ្មែរដែលកំពុងធ្វើការនៅក្រៅប្រទេសមានចំនួនប្រហែល ២លាន ២សែននាក់៕
© 2024, . All rights reserved.