គណបក្សកម្លាំងជាតិ ប្រកាសប្រមូលផ្ដុំសមាជិក និងអ្នកគាំទ្រធ្វើបាតុកម្មនៅទីស្នាក់ការគណបក្ស ដើម្បីទាមទារឱ្យដោះលែងប្រធានបក្ស លោក ស៊ុន ចន្ធី រួមទាំងសមាជិកបក្ស និងអ្នកទោសមនសិការជាច្រើននាក់ផ្សេងទៀត បន្ទាប់ពីអាជ្ញាធរក្រុងភ្នំពេញបដិសេធមិនឱ្យជួបជុំគ្នានៅទីលានប្រជាធិបតេយ្យ។
គណបក្សកម្លាំងជាតិ បានចេញលិខិតមួយទៅកាន់អភិបាលក្រុងភ្នំពេញលោក ឃួង ស្រេង កាលពីថ្ងៃទី១៣ ខែមិថុនា ស្ដីពីការជូនដំណឹងដល់សាលារាជធានីភ្នំពេញអំពីការជួបជុំសមាជិក និងអ្នកគាំទ្ររបស់ខ្លួន ដើម្បីសម្ដែងមតិដោយសន្តិវិធីក្នុងបំណងទាមទារឱ្យដោះលែងលោក ស៊ុន ចន្ធី, លោក អ៊ុំ វីរៈរដ្ឋ, លោក មី សេងហ៊ ហៅ គា វិសាល និងអ្នកជាប់ឃុំមនសិការជាច្រើននាក់ផ្សេងទៀត។
គណបក្សកម្លាំងជាតិ អះអាងថា គណបក្សនឹងធ្វើបាតុកម្មនៅទីស្នាក់ការបក្សរបស់ខ្លួនស្ថិតនៅផ្ទះលេខ D20 ផ្លូវបេតុង ក្រុមទី១៣ ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ នៅថ្ងៃអាទិត្យ ទី១៦ ខែមិថុនា ឆ្នាំ២០២៤ នេះ ចាប់ពីម៉ោង ៨ព្រឹករហូតដល់ម៉ោង ១១ និង ៣០នាទី។
ប្រភពដដែលបញ្ជាក់ថា ការធ្វើបាតុកម្មនេះ នឹងមានការលើកជាពាក្យស្លោក និងបដា ព្រមទាំងរូបថតរបស់លោក លោក ស៊ុន ចន្ធី, លោក អ៊ុំ វីរៈរដ្ឋ, លោក គា វិសាល និងអ្នកជាប់ឃុំមនសិការផ្សេងទៀតផងដែរ។
កាលពីថ្ងៃទី១០ ខែមិថុនា រដ្ឋបាលសាលារាជធានីភ្នំពេញ បានបដិសេធមិនអនុញ្ញាតគណបក្សកម្លាំងជាតិ ធ្វើបាតុកម្មនៅថ្ងៃទី១៦ ខែមិថុនា នៅទីលានប្រជាធិបតេយ្យទេ ក្រោមហេតុផលថា គណបក្សនេះបានស្នើសុំសម្ដែងមតិនៅទីស្នាក់ការរបស់ខ្លួនម្តងរួចមកហើយ កាលពីថ្ងៃទី២២ ខែមេសា ឆ្នាំ២០២៤ កន្លងទៅ។
ជាងនេះទៀត ប្រធានគណបក្សកម្លាំងជាតិ លោក ស៊ុន ចន្ធី ក៏បានទទួលស្គាល់កំហុស និងធ្វើលិខិតសុំទោសផ្ញើទៅកាន់រដ្ឋាភិបាលរួចហើយដែរ ដូច្នេះវាហាក់ដូចជាផ្ទុយពីជំហររបស់គណបក្សដែលនៅតែបន្តស្នើសុំធ្វើបាតុកម្ម ដើម្បីឱ្យមានការដោះលែង ខណៈករណីនេះកំពុងស្ថិតក្នុងដំណើរការនីតិវិធីរបស់តុលាការនៅឡើយ។
ប្រធានគណបក្ស និងសមាជិកទាំងពីររបស់គណបក្សកម្លាំងជាតិ ត្រូវតុលាការក្រុងភ្នំពេញចាប់ខ្លួន និងចោទប្រកាន់ពីបទ «ញុះញង់ និងរួមគំនិតក្បត់» ក្នុងនោះ លោក ស៊ុន ចន្ធី ត្រូវសមត្ថកិច្ចចាប់ខ្លួនកាលពីថ្ងៃទី៩ ខែឧសភា ខណៈលោក គា វិសាល ត្រូវបានសមត្ថកិច្ចចាប់ខ្លួនកាលពីថ្ងៃទី១៥ ខែមីនា និងលោក អ៊ុំ វីរៈរដ្ឋ ក៏ត្រូវបានសមត្ថកិច្ចចាប់ខ្លួនកាលពីថ្ងៃទី៣០ ខែមីនា ឆ្នាំ២០២៤ កន្លងទៅដែរ។
កាលពីថ្ងៃទី២២ ខែមេសា ថ្នាក់ដឹកនាំ និងសមាជិកគណបក្សកម្លាំងជាតិ បានយកទីស្នាក់ការគណបក្សស្ថិតនៅសង្កាត់ចាក់អង្រែក្រោម ខណ្ឌមានជ័យ សម្ដែងមតិម្តងរួចមកហើយ ដើម្បីទាមទារឱ្យមានការដោះលែងសមាជិករបស់ខ្លួន បន្ទាប់ពីអាជ្ញាធរក្រុងភ្នំពេញ មិនអនុញ្ញាតឱ្យពួកគេប្រមូលផ្ដុំតវ៉ាទាមទារនៅទីលានប្រជាធិបតេយ្យ។
មាត្រា៥ នៃច្បាប់ធ្វើបាតុកម្មដោយសន្តិវិធី ចែងថា បុគ្គលណាដែលមានបំណងរៀបចំធ្វើបាតុកម្មដោយសន្តិវិធីនៅទីកន្លែងសាធារណៈណាមួយ ត្រូវជូនដំណឹងជាលាយលក្ខណ៍អក្សរទៅអាជ្ញាធរដែនដីរាជធានី ឬខេត្ត ដែលមានសមត្ថកិច្ចគ្រប់គ្រងទីកន្លែងនោះ។
អតីតប្រធានគណបក្សសង្គ្រោះជាតិលោក សម រង្ស៊ី លើកឡើងកាលពីពេលថ្មីៗនេះថា ទោះបីកម្ពុជាបានប្តូរនាយករដ្ឋមន្ត្រីថ្មីហើយក៏ដោយ ប៉ុន្តែនាយករដ្ឋមន្ត្រីដែលបន្តពូជពីឪពុកទៅកូននេះ នៅតែដឹកនាំតាមអំណាចផ្ដាច់ការដដែល ខណៈពលរដ្ឋដែលរង់ចាំការផ្លាស់ប្ដូរក៏នៅតែរស់ក្នុងក្តីវេទនាដដែលដែរ។
ចំណែកអតីតនាយកអង្គការឃ្លាំមើលសិទ្ធិមនុស្សអន្តរជាតិប្រចាំតំបន់អាស៊ីលោក ហ្វីល រ៉ូបឺសុន បានលើកឡើងកាលពីពេលថ្មីៗនេះថា លោកគ្មានសង្ឃឹមថារដ្ឋាភិបាលថ្មីដែលដឹកនាំដោយលោក ហ៊ុន ម៉ាណែត នឹងឆ្ពោះទៅរកភាពល្អប្រសើរជាងឪពុករបស់គាត់ឡើយ។ ជាងនេះទៀត អ្នកទោសមនសិការដែលជាសកម្មជននយោបាយ សកម្មជនបរិស្ថាន សកម្មជនសិទ្ធិមនុស្ស និងមេដឹកនាំបក្សប្រឆាំង ជាដើម ដែលកំពុងរងនូវការផ្ដន្ទាទោសទាំងអយុត្តិធម៌ក្នុងជំនាន់ដឹកនាំរបស់លោក ហ៊ុន សែន ក៏នឹងមិនទទួលបាននូវយុត្តិធម៌ ឬសេរីភាពក្នុងជំនាន់រដ្ឋាភិបាលថ្មីរបស់លោក ហ៊ុន ម៉ាណែត ដែរ៕
© 2024, . All rights reserved.