ព្រះមហាក្សត្រ ព្រះករុណាព្រះបាទសម្តេចព្រះបរមនាថ នរោត្តម សីហមុនី បានត្រាស់បង្គាប់បញ្ចប់មុខតំណែងទីប្រឹក្សាក្រសួងព័ត៌មាន ចំនួន ១២៦រូប ដែលមានឋានៈចាប់ពីរដ្ឋលេខាធិការ អនុរដ្ឋលេខាធិការ រហូតដល់អគ្គនាយក ក្នុងបំណងលើកកម្ពស់ដំណើរការ និងទំនើបកម្មក្រសួង។
យោងតាមព្រះរាជក្រឹត្យចុះថ្ងៃទី២៣ ខែឧសភា ឆ្នាំ២០២៤ ចេញផ្សាយកាលពីថ្ងៃទី១២ ខែមិថុនា បានឱ្យដឹងថា ព្រះមហាក្សត្របានត្រាស់បង្គាប់បញ្ចប់មុខតំណែងជាទីប្រឹក្សាចំនួន ១២៦រូប ដោយក្នុងនោះមានមន្ត្រីមួយរូបមានឋានៈស្មើរដ្ឋលេខាធិការ, ៨រូបមានឋានៈស្មើអនុរដ្ឋលេខាធិការ និង ១១៧រូបទៀតមានឋានៈស្មើអគ្គនាយក។
អ្នកនាំពាក្យក្រសួងព័ត៌មាន លោក ទេព អស្នារិទ្ធ បានប្រាប់សារព័ត៌មានក្នុងស្រុកថា ការបញ្ចប់មុខតំណែងទីប្រឹក្សាក្រសួងចំនួន ១២៦រូបដែលមានឋានៈស្មើអគ្គនាយក និងរដ្ឋលេខាធិការ គឺជាការអនុវត្តក្នុងក្របខ័ណ្ឌនៃការពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួង ក្នុងបំណងលើកកម្ពស់ដំណើរការ និងទំនើបកម្មក្រសួង។
ប្រភពដដែលបានអះអាងថា ទីប្រឹក្សាក្រសួងព័ត៌មាន ទាំង ១២៦នាក់ដែលទើបត្រូវបានបញ្ចប់តំណែងនេះ នឹងមិនត្រូវបានតែងតាំងក្នុងតំណែងថ្មីនោះទេ។ លោកបន្តថា ក្រសួងធ្វើឡើងក្នុងគោលបំណងបង្កើនប្រសិទ្ធភាព និងស័ក្តិសិទ្ធិភាព ក្នុងការបំពេញការងាររបស់ក្រសួង ព្រមទាំងបង្កើនសមមូលធនមនុស្ស និងផលិតភាព។
អ្នកនាំពាក្យរូបនេះបញ្ជាក់ថា បន្ទាប់ពីការបញ្ចប់មុខតំណែងទីប្រឹក្សាក្រសួងទាំងជិត ១៣០រូបនេះ ក្រសួងនឹងមិនមានការតែងតាំងនូវសមាសភាពទីប្រឹក្សាថ្មីសម្រាប់ក្រសួងព័ត៌មាន នោះទេ។
នាយកប្រតិបត្តិអង្គការអភិវឌ្ឍន៍ផ្នត់គំនិត លោក សេក សុជាតិ បានថ្លែងថា លោកសាទរចំពោះការបញ្ចប់មុខតំណែងទីប្រឹក្សានៃក្រសួងព័ត៌មាន នេះ ពីព្រោះវាអាចនឹងនាំឲ្យមានការលើកកម្ពស់ប្រសិទ្ធភាពការងារ។
ប្រភពដដែលអះអាងថា ទីប្រឹក្សាភាគច្រើនសុទ្ធសឹងតែជាមន្ត្រីដែលមានតួនាទីមុខងារសាធារណៈនៅក្នុងក្រសួងរួចទៅហើយ ដូច្នេះការបន្ថែមតួនាទីជាទីប្រឹក្សាបែបនេះ អាចមិនមានប្រសិទ្ធភាពដល់ការអនុវត្តការងារ ដោយសារការបែងចែកតួនាទីគ្មានភាពច្បាស់លាស់។
លោកនាយករដ្ឋមន្ត្រីតពូជថ្មី ហ៊ុន ម៉ាណែត កាលពីថ្ងៃទី១១ ខែមិថុនា បានចេញសារាចរណែនាំកំណត់រចនាសម្ព័ន្ធគ្រប់គ្រង និងមុខតំណែងនៅតាមក្រសួង និងស្ថាប័ននៅថ្នាក់ជាតិ និងថ្នាក់ក្រោមជាតិ។ រចនាសម្ព័ន្ធថ្មីនេះ គឺជាការធ្វើទំនើបកម្ម និងជាការផ្លាស់ប្ដូរស្ថាប័នរបស់រដ្ឋឱ្យក្លាយទៅជារដ្ឋបាលសាធារណៈមួយទំនើបប្រកបដោយប្រសិទ្ធភាពខ្ពស់។
សារាចរដដែលក៏បានណែនាំដល់ក្រសួង និងស្ថាប័នទាំងអស់ ត្រូវរៀបចំរចនាសម្ព័ន្ធរបស់ខ្លួនឱ្យបានរៀបរយ និងត្រូវប្រើប្រាស់រចនាសម្ព័ន្ធដែលមានស្រាប់ឱ្យអស់លទ្ធភាព។ ក្រសួង និងស្ថាប័នទាំងអស់ ត្រូវរក្សាចំនួនអង្គភាពរបស់ខ្លួន មិនត្រូវបង្កើនចំនួនអង្គភាពថ្មី ទោះស្ថិតក្នុងកម្រិតណាមួយក៏ដោយ។ ចំណែកអង្គភាពដែលមានស្រាប់ គឺចាំបាច់ត្រូវពិនិត្យលទ្ធភាពកែសម្រួល ច្របាច់បញ្ចូលគ្នា ឬត្រូវលុបចោលតែម្តង។
ក្រោយការតែងតាំងរាជរដ្ឋាភិបាលកម្ពុជានីតិកាលទី៧ ក្រសួងព័ត៌មាន ត្រូវបានត្រាស់បង្គាប់តែងតាំង និងផ្ដល់ឋានៈជាទីប្រឹក្សាក្រសួងព័ត៌មាន ចំនួន ៤១៥នាក់ ដែលភាគច្រើនគឺអ្នកសារព័ត៌មានដែលមកពីស្ថាប័នគាំទ្ររដ្ឋាភិបាល ដូចជា សារព័ត៌មាន Fresh News ទូរទស្សន៍បាយ័ន ដែលជាស្ថាប័នរបស់ប្អូនស្រីលោក ហ៊ុន ម៉ាណែត ទូរទស្សន៍ CNC និងទូរទស្សន៍ PNN ជាដើម៕
© 2024, . All rights reserved.