ក្រសួងការបរទេសចិន ប្រតិកម្មជាខ្លាំងចំពោះលោកអគ្គលេខាធិការណាតូ (NATO) លោក Jens Stoltenberg ដោយបានទទូចឱ្យអង្គការណាតូ បញ្ឈប់ការទម្លាក់កំហុសដាក់លើក្រុងប៉េកាំង ជុំវិញវិបត្តិសង្គ្រាមអ៊ុយក្រែន។
យោងតាមបណ្ដាញផ្សាយព័ត៌មានរបស់ចិន CGTN ចុះផ្សាយនៅថ្ងៃទី១៨ ខែមិថុនា នេះ ប្រតិកម្មរបស់ចិន បន្ទាប់ពីលោក Jens Stoltenberg បានចោទប្រកាន់ទីក្រុងប៉េកាំង ថាធ្វើឱ្យសង្គ្រាមនៅអ៊ុយក្រែន កាន់តែធ្ងន់ធ្ងរខ្លាំងដោយសារតែចិន ផ្តល់ការគាំទ្រដល់រុស្ស៊ី។
លោក Lin Jian អ្នកនាំពាក្យក្រសួងការបរទេសចិន បានថ្លែងថា ក្រុងប៉េកាំង សូមណែនាំ NATO ត្រូវឈប់ទម្លាក់កំហុសលើក្រុងប៉េកាំង ហើយឈប់ចាក់សាំងបន្ថែមលើភ្លើង ឈប់ដុតបញ្ឆេះឱ្យមានការប្រឈមមុខគ្នា ដែលគួរតែធ្វើរឿងអ្វីជាក់ស្ដែងនូវដំណោះស្រាយតាមច្រកនយោបាយចំពោះវិបត្តិអ៊ុយក្រែន។
តាមអ្នកនាំពាក្យក្រសួងការបរទេសចិន NATO គួរតែពិនិត្យមើលខ្លួនឯង ជាជាងប្រើពាក្យសម្ដីបង្កាច់បង្ខូច និងវាយប្រហារមកលើប្រទេសចិន។
កាលពីថ្ងៃចន្ទ ទី១៧ មិថុនា អគ្គលេខាធិការអង្គការ NATO លោក Jens Stoltenberg បានព្រមានថា ចិនត្រូវតែប្រឈមផលវិបាកចំពោះការជួយគាំទ្ររុស្ស៊ី។ តែផ្ទុយទៅវិញ លោក Stoltenberg លើកឡើងថា ការផ្គត់ផ្គង់ជំនួយសព្វាវុធរបស់បស្ចិមប្រទេសដល់អ៊ុយក្រែន គឺជារឿងដ៏សំខាន់ដើម្បីបញ្ចប់សង្គ្រាម។
ក្រុងប៉េកាំង តែងតែអះអាងពីការប្រកាន់ជំហរអព្យាក្រឹត ដោយអះអាងថា ចិនមិនបានបញ្ជូនសព្វាវុធឱ្យទៅភាគីណាមួយឡើយនៃជម្លោះនេះ ប៉ុន្តែបានវាយប្រហារសហរដ្ឋអាមេរិក និងបណ្តាប្រទេសលោកខាងលិច ដែលថានៅតែបន្តជួយផ្តល់អាវុធឱ្យអ៊ុយក្រែន ចាប់តាំងពីសង្គ្រាមផ្ទុះឡើង។
ជាមួយគ្នានេះ ចិនបានវាយបកវិញទៅមេដឹកនាំនៃប្រទេសឧស្សាហកម្មជឿនលឿន G7 ដែលជាប្រតិកម្មចំពោះក្រុម G7 ព្រមានថា រដ្ឋាភិបាលក្រុងប៉េកាំង ឱ្យបញ្ឈប់ការបញ្ជូនគ្រឿងបន្លាស់អាវុធទៅឱ្យរុស្ស៊ី។ ចិនបាននិយាយថា សេចក្តីថ្លែងការណ៍នៃការបញ្ចប់សន្និសីទកំពូលរបស់ក្រុមប្រទេស G7 ពោរពេញការភូតកុហក និងលម្អៀង។
កាលពីថ្ងៃទី១៣ មិថុនា បណ្តាមេដឹកនាំនៃក្រុមប្រទេស G7 ជួបគ្នានៅក្នុងប្រទេសអ៊ីតាលី ដោយបានលើកឡើងពីភាពតានតឹងនៃទំនាក់ទំនងពាណិជ្ជកម្មជាមួយចិន និងអំពីប្រទេសអ៊ុយក្រែន រួមទាំងករណីសមុទ្រចិនខាងត្បូង កោះតៃវ៉ាន់ ដែលជារបៀបវារៈដ៏សំខាន់។
សេចក្តីថ្លែងការណ៍ដែលបានចេញផ្សាយនៅចុងបញ្ចប់នៃសន្និសីទកំពូល G7 បានរិះគន់ចិន លើបញ្ហាជាច្រើននៃបញ្ហាទាំងនោះ។
សេចក្តីថ្លែងការណ៍នោះរួមមាន ការចោទប្រកាន់រដ្ឋាភិបាលក្រុងប៉េកាំង ពីការបញ្ជូនសម្ភារៈសឹកសម្រាប់ការប្រើរបស់កងទ័ពរុស្ស៊ី ដែល G7 ចោទចិន ថាកំពុងជួយការខំប្រឹងប្រែងរបស់រុស្ស៊ី ធ្វើសង្គ្រាមនៅក្នុងប្រទេសអ៊ុយក្រែន។
អ្នកនាំពាក្យក្រសួងការបរទេសចិន លោក Lin Jian បាននិយាយថា សេចក្តីថ្លែងការណ៍នោះបាននិយាយមួលបង្កាច់ និងវាយប្រហារចិន។
ក្រុមប្រទេស G7 រួមមានសហរដ្ឋអាមេរិក ជប៉ុន បារាំង អាល្លឺម៉ង់ កាណាដា ចក្រភពអង់គ្លេស និងប្រទេសអ៊ីតាលី ក៏បានរិះគន់ចិន ពីការធ្វើសកម្មភាពឈ្លានពានកោះតៃវ៉ាន់ និងការធ្វើសកម្មភាពបំពានដែនទឹកប្រទេសជិតខាងក្នុងតំបន់សមុទ្រចិនខាងត្បូង។
ការព្រួយបារម្ភពីការរាលដាលយោធាកាន់តែធំឡើងរវាងចិន និងប្រទេសជិតខាងរបស់ខ្លួន កំពុងកើនឡើងដែលកាលពីថ្ងៃទី១៧ ខែមិថុនា នាវាហ្វីលីពីន និងចិន បានបុកគ្នាជាថ្មីទៀតនៅតំបន់កោះ Second Thomas នៅសមុទ្រចិនខាងត្បូង។ ចំពោះឧបទ្ទវហេតុការបុកគ្នារវាងនាវាហ្វីលីពីន និងចិន ក្រុងប៉េកាំង ប្រកាន់ជំហរចោទប្រកាន់យោធាអាមេរិក ថាមានចេតនាអាក្រក់ដោយលើកទឹកចិត្តក្រុងម៉ានីល ចាប់យកការបង្កភាពតានតឹងទៅលើនាវាចិន។
រយៈពេលប៉ុន្មានសប្ដាហ៍ចុងក្រោយនេះ ស្ថានភាពយោធានៅសមុទ្រចិនខាងត្បូងដែលប្រឈមមុខដាក់គ្នាក្នុងដែនទឹកជម្លោះរវាងចិន និងហ្វីលីពីន កាន់តែឡើងកម្ដៅខ្លាំងឡើង។
ប្រទេសហ្វីលីពីន បានហៅសកម្មភាពរបស់នាវាល្បាតចិន ដែលធ្វើសកម្មភាពយាយី រារាំង និងរហូតដល់បាញ់ទឹកលើនាវាល្បាតរបស់ហ្វីលីពីន គឺជាសកម្មភាពនៃការបង្កើតជម្លោះ ហើយអាចឈានដល់ការប៉ះទង្គិចគ្នាដោយប្រដាប់អាវុធ។
យ៉ាងណា អ្នកនាំពាក្យសម្រាប់នាវាហ្វីលីពីន អះអាងថា បើទោះជានាវាចិន ព្យាយាមដេញនាវាល្បាតរបស់ហ្វីលីពីន ក៏ដោយ ក៏ក្រុមនាវាហ្វីលីពីន មិនបានចាកចេញពីតំបន់ប្រទាញប្រទង់គ្នានោះទេ ហើយនាវាល្បាតហ្វីលីពីន នៅតែស្ថិតនៅក្នុងផ្នែកមួយនៅលើដែនទឹកហ្វីលីពីន៕
© 2024, . All rights reserved.