មន្ត្រីជាន់ខ្ពស់អង្គការក្រៅរដ្ឋាភិបាលដែលធ្វើការលើកកម្ពស់សិទ្ធិសេរីភាពសហជីពនៅកម្ពុជា សម្ដែងការសោកស្តាយចំពោះសាលក្រមតុលាការខេត្តកំពង់ស្ពឺ ដែលផ្ដន្ទាទោសប្រធានសហជីពរោងចក្រ វីង ស្តារ ស៊ូ ឱ្យជាប់ពន្ធនាគាររយៈពេល ១ឆ្នាំ ប៉ុន្តែត្រូវអនុវត្តទោសដាក់ពន្ធនាគារ ៦ខែ ចំណែកឯទោសដែលនៅសល់ ត្រូវអនុញ្ញាតឱ្យព្យួរនៅក្រៅឃុំ។
អ្នកគ្រប់គ្រងផ្នែកសិទ្ធិការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ ប្រាប់សារព័ត៌មាន The Cambodia Daily នៅថ្ងៃទី២១ មិថុនា នេះថា ការកាត់ទោសលោក ជា ចាន់ ដោយអំណាចសាលក្រមពីតុលាការខេត្តកំពង់ស្ពឺ ជាឧបករណ៍មួយក្នុងការបង្កជាឧបសគ្គរារាំងដល់ដំណើរការសកម្មភាពសហជីព ក្នុងការការពារសិទ្ធិ និងផលប្រយោជន៍កម្មករ ជាពិសេសអាចនឹងជះឥទ្ធិពលដល់ដំណើរការក្នុងការចុះបញ្ជីអង្គការវិជ្ជាជីវៈ (សហជីព) ប្រចាំរោងចក្រ វីង ស្តារ ស៊ូ ទៅថ្ងៃក្រោយថែមទៀត។
លោក ឃុន ថារ៉ូ លើកឡើងថា ករណីនេះត្រូវរង់ចាំការសម្រេចចិត្តរបស់លោក ជា ចាន់ និងក្រុមគ្រួសាររបស់គាត់ ថាតើត្រូវប្តឹងជំទាស់ទៅសាលាឧទ្ធរណ៍លើសាលក្រមតុលាការសាលាដំបូងខេត្តកំពង់ស្ពឺ ឬយ៉ាងណានោះ។ វាជាសិទ្ធិរបស់គាត់ ហើយក្រុមសហព័ន្ធសហជីព និងសង្គមស៊ីវិល ក៏គោរពសិទ្ធិក្នុងការសម្រេចចិត្តរបស់គាត់ដែរ។
មន្ត្រីសង្គមស៊ីវិលរូបនេះបញ្ជាក់ថា យោងតាមអនុសញ្ញាលេខ៨៧ និងលេខ៩៨ នៃអង្គការពលកម្មអន្តរជាតិផ្នែកការងារ ហាមប្រាមការចោទប្រកាន់ណាមួយតាមផ្លូវតុលាការដាច់ខាត ក្នុងការអនុវត្តរាល់សកម្មភាពសហជីព ខណៈមាត្រា១២ មាត្រា២៦៦ និងមាត្រា២៦៧ នៃច្បាប់ស្ដីពីការងារ ក៏បានហាមប្រាមរាល់ទម្រង់នៃការរើសអើងសហជីពដែរ មានដូចជា ការពិន័យ ការផ្ដាច់កិច្ចសន្យាការងារ ជាដើម ដូច្នេះការកាត់ទោសលោក ជា ចាន់ គឺប្រឆាំងនឹងមាត្រានៃច្បាប់ទាំងនេះយ៉ាងធ្ងន់ធ្ងរ។
កាលពីថ្ងៃទី២០ ខែមិថុនា ឆ្នាំ២០២៤ ប្រធានសហជីពរោងចក្រ វីង ស្តារ ស៊ូ លោក ជា ចាន់ ត្រូវបានសាលាដំបូងខេត្តកំពង់ស្ពឺ ប្រកាសសាលក្រមផ្ដន្ទាទោសពីបទសមគំនិតក្នុងអំពើលួច ដោយដាក់ពន្ធនាគាររយៈពេល ១ឆ្នាំ (១២ខែ) ប៉ុន្តែត្រូវអនុវត្តទោសដាក់ពន្ធនាគារ ៦ខែ ចំណែកឯទោសដែលនៅសល់ ត្រូវអនុញ្ញាតឱ្យព្យួរនៅក្រៅឃុំបណ្ដោះអាសន្ន។
សាលក្រមនេះធ្វើឡើងបន្ទាប់ពីលោក ជា ចាន់ ត្រូវបានចោទប្រកាន់ពីបទ «សមគំនិតក្នុងអំពើលួច» ដែលប្រព្រឹត្តនៅក្នុងរោងចក្រផលិតស្បែកជើង វីង ស្ដារ ស៊ូ នាអំឡុងឆ្នាំ២០២២ តាមសាលដីកាតុលាការកាលពីថ្ងៃទី១៧ ខែកុម្ភៈ ឆ្នាំ២០២៤ បន្ទាប់ពីត្រូវបានចាប់ខ្លួនកាលពីថ្ងៃទី១៤ ខែកុម្ភៈ ឆ្នាំ២០២៤ កន្លងទៅ។ ការចោទប្រកាន់ និងការចាប់ឃុំខ្លួននេះ ធ្វើឡើងបន្ទាប់ពីលោក ជា ចាន់ ត្រូវបានជ្រើសរើសជាប្រធានសហជីពដើម្បីការពារសិទ្ធិការងាររបស់កម្មករក្នុងរោងចក្រ វីង ស្តារ ស៊ូ នៅថ្ងៃទី១០ ខែមករា ឆ្នាំ២០២៤ កន្លងទៅ។
មាត្រា៦៧ និងមាត្រា៤៣ នៃច្បាប់ស្ដីពីសហជីព ចែងថា បេក្ខជនដែលជាប់ឆ្នោតជាថ្នាក់ដឹកនាំសហជីព ត្រូវទទួលបានការការពារពិសេស ហើយរាល់ការបញ្ឈប់បេក្ខជនណាម្នាក់ លុះត្រាតែមានការយល់ព្រមពីអធិការកិច្ចការងារ។
ជុំវិញបញ្ហានេះ សម្ព័ន្ធសហជីពកម្ពុជា CATU បានចេញសេចក្តីប្រកាសព័ត៌មានកាលពីថ្ងៃទី២០ មិថុនា នេះថា សាលក្រមរបស់សាលាដំបូងខេត្តកំពង់ស្ពឺ មានភាពអយុត្តិធម៌ជាខ្លាំងលើលោក ជា ចាន់ ព្រោះថាលោកពុំបានប្រព្រឹត្តដូចការចោទប្រកាន់ឡើយ ហើយសាលក្រមនេះគឺជាការសម្រេចដែលគ្មានមូលដ្ឋានត្រឹមត្រូវឡើយ។
កាលពីថ្ងៃទី៤ ខែមិថុនា ឆ្នាំ២០២៤ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ «សង់ត្រាល់» បានចេញផ្សាយសេចក្តីរាយការណ៍មួយស្តីអំពីស្ថានភាពសេរីភាពនៃសហជីពក្នុងប្រទេសកម្ពុជាថាមានសហជីពចំនួន១០ ក្នុងចំណោមសហជីពចំនួន១៤ ដែលបានរងការបំភិតបំភ័យដោយផ្ទាល់មាត់ ការគំរាមកំហែង ការបៀតបៀន និងការដាក់ក្នុងបញ្ជីខ្មៅដែលធ្វើឲ្យប៉ះពាល់ដល់ការបំពេញការងាររបស់ថ្នាក់ដឹកនាំ និងសមាជិកសហជីពយ៉ាងធ្ងន់ធ្ងរ៕
© 2024, . All rights reserved.