ជំនួបកំពូលនៃមេដឹកនាំ NATO ចាប់ផ្ដើមនៅរដ្ឋធានីវ៉ាស៊ីនតុន ប្រមុខរដ្ឋាភិបាលប្រទេសទាំង ៣២ ប្ដេជ្ញាបន្តជួយប្រទេសអ៊ុយក្រែន។ កិច្ចប្រជុំកំពូលឆ្នាំនេះ សហរដ្ឋអាមេរិកជាអ្នកទទួលបន្ទុករៀបចំ ហើយឆ្នាំនេះគឺជាខួប ៧៥ឆ្នាំនៃការបង្កើតអង្គការសម្ព័ន្ធភាពយោធាអាត្លង់ទិចខាងជើង។ ជំនួបកំពូលមានរយៈពេល ៣ថ្ងៃ ចាប់ពីថ្ងៃទី៩ ដល់ថ្ងៃទី១១ កក្កដា។
ជំនួបកំពូល NATO ឆ្នាំនេះមានរបៀបវារៈជាច្រើនដែលត្រូវលើកឡើង តែករណីសង្គ្រាមរុស្ស៊ី ឈ្លានពានអ៊ុយក្រែន ជាកម្មវត្ថុអាទិភាពនៅចំពោះមុខវត្តមានរបស់មេដឹកនាំ NATO។
ថ្លែងនៅចំពោះមុខមេដឹកនាំ NATO លោក ចូ បៃដិន បានសន្យាការពារអ៊ុយក្រែន យ៉ាងពេញទំហឹងប្រឆាំងនឹងការឈ្លានពានរបស់រុស្ស៊ី។
បើតាមទីភ្នាក់ងារសារព័ត៌មាន Reuters លោក បៃដិន បង្ហាញការប្ដេជ្ញាចិត្តដូចនេះ មិនត្រឹមតែទៅកាន់មេដឹកនាំ NATO នោះទេ លោកក៏ថ្លែងទៅកាន់អ្នកនយោបាយ និងពលរដ្ឋអាមេរិកាំង ព្រមទាំងទៅកាន់សម្ព័ន្ធភាពក្រៅ NATO ផងដែរ។
លោក ចូ បៃដិន កំពុងប្រឈមមុខនឹងសម្ពាធអ្នកនយោបាយក្នុងបក្សប្រជាធិបតេយ្យមួយចំនួនដែលស្នើឱ្យលោក បៃដិន ដកខ្លួនចេញពីការប្រកួតក្នុងការបោះឆ្នោតប្រធានាធិបតីសហរដ្ឋអាមេរិក នៅថ្ងៃទី៥ ខែវិច្ឆិកា ខាងមុខ។
ការដាក់សម្ពាធរបស់អ្នកនយោបាយខាងបក្សប្រជាធិបតេយ្យ បន្ទាប់ពីលោក បៃដិន ធ្វើមិនបានល្អនៅឯវេទិកាជជែកដេញដោលជាមួយលោក ដូណាល់ ត្រាំ បេក្ខជនមកពីបក្សសាធារណរដ្ឋ កាលពីថ្ងៃទី២៧ ខែមិថុនា ដែលនាំឱ្យមានការព្រួយបារម្ភថា លោកអាចនឹងចាញ់ឆ្នោតលោក ត្រាំ។
ទោះជាបែបនេះក្ដី លោក បៃដិន បានច្រានចោលការព្រួយបារម្ភមកលើសុខភាព និងវ័យរបស់លោកដែលមានវ័យ ៨២ឆ្នាំ។
លោកបានប្រកែកយ៉ាងម៉ឺងម៉ាត់ថា លោកនឹងមិនចុះចេញដោយសារតែមានការព្រួយបារម្ភអំពីអាយុរបស់លោក និងអំពីសមត្ថភាពរបស់លោក ដើម្បីធ្វើយុទ្ធនាការនោះទេ។ លោកបន្ថែមថា ពលរដ្ឋអាមេរិកាំង ១៤លាននាក់បោះឆ្នោតឲ្យលោកជាបេក្ខជនខាងបក្សប្រជាធិបតេយ្យ ឈរឈ្មោះប្រធានាធិបតីមួយអាណត្តិទៀត ពោលគឺពុំមែនអ្នកផ្សេងទេ។
លោកបានថ្លែងប្រាប់គណបក្សរបស់លោក ឱ្យផ្ដោតការយកចិត្តទុកដាក់ឡើងវិញចំពោះការគំរាមកំហែងដែលបង្កឡើងដោយលោក ដូណាល់ ត្រាំ។ លោក បៃដិន បានប្ដេជ្ញាបន្តឈរឈ្មោះជាបេក្ខជនប្រធានាធិបតី ដោយអះអាងថាមានតែរូបលោកទេដែលអាចយកឈ្នះលោក ត្រាំ ដែលជាប់ចោទទាំងបទឧក្រិដ្ឋ ទាំងបទរដ្ឋប្បវេណីជាង ១០០ករណី។
ក្នុងនាមជាមេដឹកនាំប្រទេសមហាអំណាច លោក បៃដិន បានបញ្ចេញសារធ្ងន់ៗទៅកាន់លោក វ៉្លាឌីមៀ ពូទីន។ លោកតាំងចិត្តជួយប្រទេសអ៊ុយក្រែន ក្នុងការប្រយុទ្ធតតាំងប្រឆាំងរុស្ស៊ី។ លោកជឿថា អ៊ុយក្រែនអាចបញ្ឈប់លោក ពូទីន បាន។
ថ្លែងទៅកាន់មេដឹកនាំ NATO លោក បៃដិន បានបញ្ជាក់ថា លោក ពូទីន មិនចង់បានអ្វីផ្សេងទេ ក្រៅតែពីចង់យកអ៊ុយក្រែន មកដាក់ក្រោមចំណុះរបស់ខ្លួន និងចង់លុបអ៊ុយក្រែន ចេញពីផែនទីពិភពលោក។
នៅក្នុងជំនួប NATO លើកនេះ សហរដ្ឋអាមេរិក និងសម្ព័ន្ធមិត្តរបស់ខ្លួន បានប្រកាសថានឹងផ្ដល់ប្រព័ន្ធខែល ឬរនាំងការពារដែនអាកាសទៅឱ្យអ៊ុយក្រែន ថែមទៀត ក្នុងនោះរួមមានទាំងប្រព័ន្ធមីស៊ីល Patriot ផងដែរ។
ការប្រកាសពីការផ្ដល់ប្រព័ន្ធការពារដែនអាកាសឱ្យអ៊ុយក្រែន ធ្វើឡើងនៅក្នុងសេចក្ដីថ្លែងការណ៍រួមមួយរវាងសហរដ្ឋអាមេរិក អាល្លឺម៉ង់ រូម៉ានី និងហុឡង់ដ៍ ក្នុងកិច្ចប្រជុំកំពូល NATO ក្នុងទីក្រុងវ៉ាស៊ីនតោន។ សេចក្ដីថ្លែងការណ៍ឱ្យដឹងទៀតថា នៅប៉ុន្មានខែខាងមុខ បណ្ដាប្រទេសជាសម្ព័ន្ធមិត្តក៏មានបំណងផ្ដល់ប្រព័ន្ធការពារដែនអាកាសរាប់សិបគ្រឿងបន្ថែមឱ្យអ៊ុយក្រែន ដែលធ្វើឱ្យអ៊ុយក្រែន មានសមត្ថភាពកាន់តែរឹងមាំក្នុងការការពារដែនអាកាសរបស់ខ្លួន។
ការប្រកាសពីការផ្ដល់ប្រព័ន្ធខែលការពារប្រឆាំងនឹងមីស៊ីលរបស់រុស្ស៊ី ធ្វើឡើងបន្ទាប់ពីអ៊ុយក្រែន បានអះអាងថា ជនស៊ីវិលយ៉ាងហោច ៤៣នាក់ត្រូវបានសម្លាប់នៅក្នុងការបាញ់ស្រោចដោយគ្រាប់មីស៊ីលរបស់រុស្ស៊ី លើទីក្រុងគៀវ និងបណ្ដាក្រុងជាច្រើននៅក្នុងប្រទេសអ៊ុយក្រែន ហើយក្នុងនោះ មីស៊ីលរុស្ស៊ី វាយប្រហារចំមន្ទីរពេទ្យកុមារ។
តែជាមួយគ្នានេះ ប្រធានាធិបតី Volodymyr Zelenskiy បានទទូចដល់បណ្តាមេដឹកនាំនយោបាយសហរដ្ឋអាមេរិក ដែលលោកថាកុំរង់ចាំដល់លទ្ធផលបោះឆ្នោតប្រធានាធិបតីនាខែវិច្ឆិកា ទើបបង្ខំធ្វើការសម្រេចចិត្តលើការជួយដល់ប្រទេសរបស់លោកក្នុងការប្រឆាំងនឹងសង្គ្រាមពីរុស្ស៊ី។
លោក Zelenskiy បានថ្លែងដូចនេះនៅឯវិទ្យាស្ថាន Ronald Reagan មុនកិច្ចប្រជុំកំពូលនៃអង្គការ NATO។ លោក Zelenskiy បានថ្លែងថា៖ នៅទូទាំងពិភពលោក គេកំពុងរង់ចាំលទ្ធផលបោះឆ្នោតប្រធានាធិបតីសហរដ្ឋអាមេរិក នៅខែវិច្ឆិកា ហើយសូម្បីតែលោក ពូទីន ក៏រង់ចាំឱ្យដល់ខែវិច្ឆិកា ដូចគ្នាដែរ។
លោក Zelenskiy ទទូចថា មិនត្រូវរង់ចាំទេ គឺត្រូវរួមគ្នាបង្កើនការខិតខំខ្លាំងថែមទៀតជួយអ៊ុយក្រែន ធ្វើយ៉ាងណាឱ្យអ៊ុយក្រែន មានប្រៀបខ្លាំងជាងរុស្ស៊ី ហើយអាចរុញទ័ពរុស្ស៊ី ចេញពីទឹកដីអ៊ុយក្រែន។ លោក Zelenskiy បញ្ជាក់ថា ប្រជាជនអ៊ុយក្រែន កំពុងតែតស៊ូដើម្បីទទួលបានការសម្រេចចិត្តជាក់លាក់មួយពីសហរដ្ឋអាមេរិក និងអឺរ៉ុប។
លោកទទូចសុំសហរដ្ឋអាមេរិក លើកបម្រាមទាំងអស់ដែលហាមឃាត់ទ័ពអ៊ុយក្រែន ប្រើប្រាស់អាវុធសហរដ្ឋអាមេរិក វាយប្រហារទៅលើទឹកដីរុស្ស៊ី រាប់ទាំងអតីតដែនដីនៃជ្រោយគ្រីមៀរ ផង ដោយមិនចាំបាច់កំណត់ថាអាចវាយប្រហារបានត្រឹមព្រំដែនរុស្ស៊ី ជាប់នឹងព្រំដែនអ៊ុយក្រែន នោះទេ៕
© 2024, . All rights reserved.