។){kind=link}
មេដឹកនាំបក្សកាន់អំណាចលោក ហ៊ុន សែន បញ្ជាឲ្យចាប់ខ្លួនសកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន កញ្ញា ភឹង សោភា និងពលរដ្ឋម្នាក់ទៀតឈ្មោះ សាន សិទ្ធិ នៅថ្ងៃអង្គារសប្ដាហ៍នេះ បន្ទាប់ពីពួកគេបកស្រាយលើបញ្ហាតំបន់ត្រីកោណអភិវឌ្ឍន៍ កម្ពុជា ឡាវ និងវៀតណាម (CLV)។
លោក ហ៊ុន សែន បញ្ជាឱ្យរដ្ឋាភិបាលដែលកំពុងដឹកនាំដោយកូនប្រុសរបស់គាត់ តាមចាប់ខ្លួនឱ្យអស់ចំពោះជនណាដែលញុះញង់លើកិច្ចសហប្រតិបត្តិការតំបន់អភិវឌ្ឍន៍ត្រីកោណនេះ ចំណែកអ្នកនៅក្រៅប្រទេស ត្រូវតាមរកគ្រួសាររបស់ពួកគេដែលរស់នៅក្នុងស្រុកឱ្យឃើញ។
មេដឹកនាំបក្សកាន់អំណាចលោក ហ៊ុន សែន លើកឡើងក្នុងកម្មវិធីផ្សាយផ្ទាល់ទាក់ទិនទៅនឹងកិច្ចសហប្រតិបត្តិការអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម (CLV DTA) នៅថ្ងៃទី២៣ខែកក្កដា ឆ្នាំ២០២៤ នេះថា មិនមានកិច្ចព្រមព្រៀងណាមួយនៃតំបន់អភិវឌ្ឍន៍ត្រីកោណ នាំឱ្យបាត់បង់អធិបតេយ្យភាពជាតិកម្ពុជានោះទេ។ លោកបន្តថា កិច្ចព្រមព្រៀង CLV នេះនឹងនាំឲ្យកម្ពុជាចំណេញច្រើន ជាពិសេសការផ្លាស់ប្ដូរទំនិញ ការសម្រួលពាណិជ្ជកម្ម ការអភិវឌ្ឍវិស័យទេសចរណ៍ និងវិស័យឧស្សាហកម្មកៅស៊ូផងដែរ។
លោក ហ៊ុន សែន បញ្ជាឱ្យតុលាការ និងក្រសួងយុត្តិធម៌ ផ្ដន្ទាទោសអ្នកទាំង ៣នាក់នេះ និងអ្នកផ្សេងទៀតដែលត្រូវបានចាប់ខ្លួនពីការបកស្រាយលើបញ្ហានេះជាអតិបរមា និងមិនឱ្យដាក់ក្នុងបញ្ជីលើកលែងទោស ឬបន្ធូរបន្ថយទោសដាច់ខាត។
មេដឹកនាំបក្សកាន់អំណាចរូបនេះព្រមានថា អ្នកដែលនៅក្នុងស្រុក កុំព្រហើនចេញមុខបកស្រាយលើបញ្ហាតំបន់ត្រីកោណអភិវឌ្ឍន៍បន្តទៀតឱ្យសោះ ចំណែកអ្នករស់នៅបរទេស ក៏មិនត្រូវភ្លេចថាខ្លួនមានសាច់ញាតិដែលកំពុងរស់នៅក្នុងស្រុកដែរ។
លោក ហ៊ុន សែន គំរាមថា ពិតមែនតែប្រទេសកម្ពុជាផ្លាស់ប្ដូរនាយករដ្ឋមន្ត្រីថ្មី ប៉ុន្តែលោកមិនទាន់អស់អំណាចនៅឡើយទេ កាលណាលោកមិនទាន់អស់ជីវិត ដូច្នេះលោកនឹងមិនអនុញ្ញាតឱ្យមានចលនាបះបោរណាមួយកើតឡើងដាច់ខាត បើទោះបីនាយករដ្ឋមន្ត្រីជាអ្នកអនុវត្តអំណាចក៏ដោយ។
នៅថ្ងៃទី២៣ ខែកក្កដា ឆ្នាំ២០២៤ នេះ សកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន និងកញ្ញា ភឹង សោភា និងពលរដ្ឋម្នាក់ទៀតឈ្មោះ សាន សិទ្ធ ត្រូវបានស្នងការខេត្តសៀមរាប ចាប់ខ្លួននៅឃុំស្រែណូយ ស្រុកវ៉ារិន ខេត្តសៀមរាប វេលាម៉ោង ៨ព្រឹក បន្ទាប់ពីលោក ស្រ៊ុន ស្រ៊ន ផ្សាយផ្ទាល់បកស្រាយពីតំបន់ត្រីកោណអភិវឌ្ឍន៍លើបណ្ដាញសង្គមហ្វេសប៊ុកចប់ភ្លាមៗ ហើយក៏កំពុងត្រូវបានបញ្ជូនខ្លួនទៅកាន់ពន្ធនាគារព្រៃសនៅពេលនេះដែរ។
សកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន និងកញ្ញា ភឹង សោភា ផ្សាយផ្ទាល់លើបណ្ដាញសង្គមហ្វេសប៊ុកនៅថ្ងៃទី២៣ កក្កដា នេះថា បើតំបន់ត្រីកោណនេះមានការព្រមព្រៀងគ្នាស៊ីជម្រៅរវាងកម្ពុជា ឡាវ និងវៀតណាម មែន នោះកម្ពុជានឹងក្លាយជាអាយ៉ងរបស់វៀតណាម ដែលនឹងក្លាយទៅជាប្រទេសឥណ្ឌូចិន ដែលនឹងមានរដ្ឋាភិបាលតែមួយប៉ុណ្ណោះសម្រាប់ប្រទេសទាំងបីនេះ គឺរដ្ឋាភិបាលវៀតណាម។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន បានប្រាប់សារព័ត៌មាន The Cambodia Daily នៅថ្ងៃទី២៣ កក្កដា នេះថា អ្នកណាក៏ដោយឱ្យតែហ៊ាននិយាយប៉ះពាល់ដល់វៀតណាម គឺមានតែជាប់គុកប៉ុណ្ណោះ។
លោក អ៊ុំ សំអាន លើកឡើងថា តំបន់អភិវឌ្ឍន៍ត្រីកោណ កម្ពុជា ឡាវ និងវៀតណាម កើតចេញពីគំនិតដើមរបស់មេដឹកនាំវៀតណាម លោក ហូ ជី មិញ ក្នុងដំណើរឆ្ពោះទៅទិសខាងលិចក្នុងការលេបត្របាក់យកទឹកដីកម្ពុជា និងឡាវ។
មន្ត្រីបក្សប្រឆាំងរូបនេះបញ្ជាក់ថា ដើម្បីរំលឹកដឹងគុណ ហូ ជី មិញ ក្នុងការបង្កើតបក្សកុម្មុយនីស្តឥណ្ឌូចិន កម្ពុជា វៀតណាម និងឡាវ បានដាក់ ៤ខេត្តទៅក្នុងតំបន់អភិវឌ្ឍន៍ត្រីកោណនេះ ក្នុងគោលបំណងប្រែក្លាយកូនឥណ្ឌូចិនតូចនេះឱ្យក្លាយជាសហព័ន្ធឥណ្ឌូចិនដែលគ្រប់គ្រងដោយវៀតណាម នាពេលអនាគត។
លោក អ៊ុំ សំអាន បញ្ជាក់ថា កម្ពុជានឹងបាត់បង់ខេត្តទាំង ៤ នេះទៅប្រទេសវៀតណាម នាពេលអនាគត ដូចគ្នានឹងការបាត់បង់ទឹកដីកម្ពុជាក្រោម ប្រទេសចម្ប៉ា និងតំបន់គ្រីមៀរ របស់ប្រទេសអ៊ុយក្រែន ដែរ។
ចំណែកប្រធានវេទិកាពលរដ្ឋលោក គឹម សុខ លើកឡើងថា តំបន់អភិវឌ្ឍន៍ត្រីកោណ (CLV DTA) ឆ្នាំ១៩៩៩ គឺជាកាដូដ៏ធំមួយរបស់លោក ហ៊ុន សែន ដាក់ជើងពានថ្វាយដល់វៀតណាម ក្រោយរដ្ឋការក្រុងហាណូយ ជួយធ្វើរដ្ឋប្រហារដណ្ដើមអំណាចឆ្នាំ១៩៩៧ ឱ្យគាត់។ លោកថា ការលើកឡើងរបស់លោក ហ៊ុន សែន ពីតំបន់ត្រីកោណនៅថ្ងៃនេះ គឺជាការបំភ្លៃការពិតប៉ុណ្ណោះ។
កម្ពុជា វៀតណាម និងឡាវ បានព្រមព្រៀងគ្នាបង្កើតតំបន់អភិវឌ្ឍន៍ត្រីកោណ (CLV) កាលពីឆ្នាំ១៩៩៩ ដោយដាក់ខេត្តចំនួន ១៣ បញ្ចូលគ្នា ក្នុងនោះ កម្ពុជា ដាក់ ៤ខេត្ត គឺខេត្តក្រចេះ ស្ទឹងត្រែង រតនគិរី និងមណ្ឌលគិរី ដែលមានពលរដ្ឋសរុបជាង ៥០ម៉ឺននាក់។ ចំណែកប្រទេសឡាវ ដាក់ ៤ខេត្តដែរ ដែលមានប្រជាជនសរុបជាង ៧០ម៉ឺននាក់ ដោយឡែកប្រទេសវៀតណាម ដាក់ខេត្តចំនួន ៥ ដែលមានប្រជាជនរហូតដល់ទៅជាង ៧លាននាក់ឯណោះ។
ជុំវិញបញ្ហានេះ កាលពីចុងឆ្នាំ២០២៣ អ្នកជំនាញខាងព្រំដែនកម្ពុជា បណ្ឌិត ឌី ការ៉េត បានលើកឡើងពីប្រវត្តិរបស់គណបក្សប្រជាជនកម្ពុជា ថាគឺជាគណបក្សដែលត្រូវបានបង្កើតឡើងដោយវៀតណាម ដើម្បីគ្រប់គ្រងប្រទេសកម្ពុជា តាមរយៈនៃការបង្កើតឱ្យមានតំបន់ត្រីកោណអភិវឌ្ឍន៍រវាងកម្ពុជា ឡាវ និងវៀតណាម សព្វថ្ងៃនេះ។
បណ្ឌិត ឌី ការ៉េត អះអាងថា តំបន់ត្រីកោណអភិវឌ្ឍន៍រវាងប្រទេសកម្ពុជា ឡាវ និងវៀតណាម គឺជាផែនការរបស់វៀតណាម ដែលមានចេតនាបង្កប់កងទ័ពរបស់ពួកគេឱ្យចូលទៅក្នុងទឹកដីខ្មែរ ដើម្បីគ្រប់គ្រងខ្មែរតែប៉ុណ្ណោះ។
លោកថា តំបន់ត្រីកោណនេះមានឈ្មោះដើមថា សហព័ន្ធឥណ្ឌូចិនវៀតណាម ប៉ុន្តែក្រោយមកដោយខ្លាចមានការតវ៉ាពីពលរដ្ឋខ្មែរ វៀតណាមក៏បានកែឈ្មោះមកជា តំបន់ត្រីកោណអភិវឌ្ឍន៍វិញ។
អ្នកជំនាញកិច្ចការព្រំដែនរូបនេះបញ្ជាក់ថា ផែនការរបស់វៀតណាម ក្នុងការគ្រប់គ្រងទឹកដីខ្មែរ គឺជាផែនការសម្ងាត់រវាងលោក ហ៊ុន សែន ជាមួយនឹងវៀតណាម ជាយូរមកហើយ៕