 ថាមានលក្ខណៈបុរេវិនិច្ឆ័យ និងមើលតែមួយជ្រុង។){kind=link}
គណៈកម្មាធិការសិទ្ធិមនុស្សកម្ពុជា ចាត់ទុកក្តីបារម្ភរបស់បេសកជនពិសេសនៃអង្គការសហប្រជាជាតិសម្រាប់បញ្ហាកម្ពុជា លោក វីទិត មុនតាប៊ន (Vitit Muntarbhorn) ថាមានលក្ខណៈបុរេវិនិច្ឆ័យ និងមើលតែមួយជ្រុង។
គណៈកម្មាធិការសិទ្ធិមនុស្សកម្ពុជា (គ.ស.ម.ក.) ចេញសេចក្តីបំភ្លឺនៅថ្ងៃទី២៦ ខែកក្កដា ឆ្នាំ២០២៤ នេះថា ខ្លួនមានការសោកស្ដាយជាខ្លាំងចំពោះក្តីបារម្ភដែលខ្វះមូលដ្ឋាន និងការផ្ទៀងផ្ទាត់ព័ត៌មានឱ្យបានត្រឹមត្រូវរបស់អ្នករាយការណ៍ពិសេសទទួលបន្ទុកស្ថានភាពសិទ្ធិមនុស្សនៅកម្ពុជានៅពេលនេះ។
ប្រភពដដែលលើកឡើងថា ការធ្វើបុរេវិនិច្ឆ័យ និងមើលតែមួយជ្រុង អាចបង្កឱ្យមានការភ័ន្តច្រឡំក្នុងចំណោមសាធារណជនទូទៅ ព្រោះថាគោលការណ៍រួមនៃការសន្និដ្ឋានពីស្ថានភាពសិទ្ធិមនុស្សក្នុងប្រទេសណាមួយ ត្រូវផ្អែកលើកត្តាប្រវត្តិសាស្ត្រ ភូមិសាស្ត្រ វប្បធម៌ ប្រពៃណី ទំនៀមទម្លាប់ ជំនឿ សាសនា សេដ្ឋកិច្ច នយោបាយ និងបរិបទជាក់ស្ដែងនៃប្រទេសនោះ។
គណៈកម្មាធិការសិទ្ធិមនុស្សកម្ពុជា ស្នើឱ្យអង្គភាព ស្ថាប័ន និងភាគីទាំងអស់ មុននឹងធ្វើសេចក្តីសន្និដ្ឋាន ឬសម្ដែងនូវការយល់ឃើញណាមួយពាក់ព័ន្ធនឹងស្ថានភាពសិទ្ធិមនុស្សក្នុងប្រទេសកម្ពុជា សូមធ្វើការសិក្សាស្រាវជ្រាវឱ្យបាច្បាស់លាស់ និងផ្ទៀងផ្ទាត់ព័ត៌មានជាមុនឱ្យបានត្រឹមត្រូវ។
ការអះអាងនេះ ធ្វើឡើងបន្ទាប់ពីអ្នករាយការណ៍ពិសេសរបស់អង្គការសហប្រជាជាតិ សម្ដែងការព្រួយបារម្ភកាន់តែខ្លាំងអំពីស្ថានភាពសិទ្ធិមនុស្សនៅកម្ពុជាសព្វថ្ងៃនេះ។
អ្នករាយការណ៍ពិសេសទទួលបន្ទុកស្ថានភាពសិទ្ធិមនុស្សរបស់ឧត្ដមស្នងការអង្គការសហប្រជាជាតិ លោក វីទិត មុនតាប៊ន (Vitit Muntarbhorn) បានលើកឡើងក្នុងសន្និសីទសារព័ត៌មានក្រោយបញ្ចប់ដំណើរទស្សនកិច្ចក្នុងប្រទេសកម្ពុជា នៅថ្ងៃទី២៦ ខែកក្កដា ឆ្នាំ២០២៤ នេះ ដោយសម្ដែងក្តីបារម្ភយ៉ាងខ្លាំងចំពោះការចាប់ខ្លួនសកម្មជន ការរឹតត្បិតសេរីភាពបញ្ចេញមតិ និងការរឹតត្បិតលំហសេរីភាពនយោបាយនៅកម្ពុជាសព្វថ្ងៃនេះ។
អ្នករាយការណ៍ពិសេសទទួលបន្ទុកស្ថានភាពសិទ្ធិមនុស្សរបស់ឧត្ដមស្នងការអង្គការសហប្រជាជាតិ លោក វីទិត មុនតាប៊ន (Vitit Muntarbhorn) បានធ្វើដំណើរទស្សនកិច្ចទៅប្រទេសកម្ពុជា ចាប់ពីថ្ងៃទី២១ រហូតដល់ថ្ងៃទី២៧ ខែកក្កដា ឆ្នាំ២០២៤ នៅខេត្តរតនគិរី និងខេត្តកណ្តាល ដើម្បីប្រមូលព័ត៌មានជុំវិញការអនុវត្តសិទ្ធិមូលដ្ឋានរបស់ពលរដ្ឋនៅក្នុងប្រទេសកម្ពុជាសព្វថ្ងៃនេះ។
ក្នុងដំណើរទស្សនកិច្ចនេះ លោក វីទិត មុនតាប៊ន បានជួបជាមួយតំណាងរដ្ឋាភិបាល ក្រុមអង្គការសង្គមស៊ីវិល អ្នកសារព័ត៌មាន អ្នកការពារសិទ្ធិមនុស្ស សមាជិកសហគមន៍ ទីភ្នាក់ងារអង្គការសហប្រជាជាតិ និងភាគីពាក់ព័ន្ធសំខាន់ៗជាច្រើនទៀតផងដែរ។
អតីតមន្ត្រីជាន់ខ្ពស់សមាគមការពារសិទ្ធិមនុស្សអាដហុក លោក ស៊ឹង សែនករុណា បានសរសេរលើគណនីហ្វេសប៊ុករបស់ខ្លួននៅថ្ងៃទី២៦ កក្កដា នេះថា ទោះបីមន្ត្រីរដ្ឋាភិបាលកម្ពុជាបដិសេធជុំវិញការធ្លាក់ចុះនូវការគោរពសិទ្ធិមនុស្សក៏ដោយ ក៏គេនៅតែរកឃើញថា ទុក្ខវេទនារបស់ពលរដ្ឋសព្វថ្ងៃនេះ គឺកើតឡើងដោយសារអំពើអយុត្តិធម៌សង្គម ដូចជាការរំលោភសិទ្ធិមនុស្ស និងការបំផ្លាញប្រជាធិបតេយ្យ ជាដើម។
លោក ស៊ឹង សែនករុណា អំពាវនាវឲ្យសហគមន៍អន្តរជាតិ ចាត់វិធានការថ្មីៗ និងប្រកបដោយប្រសិទ្ធភាព ដើម្បីលើកស្ទួយសិទ្ធិមនុស្សនៅកម្ពុជា ជាជាងការចេញតែរបាយការណ៍វាយតម្លៃ ពីព្រោះការចេញត្រឹមតែរបាយការណ៍បែបនេះ រដ្ឋាភិបាលកម្ពុជានៅតែមើលស្រាលអង្គការសហប្រជាជាតិ និងសហគមន៍អន្តរជាតិដដែល ដោយពួកគេគិតថា អង្គការសហប្រជាជាតិ និងសហគមន៍អន្តរជាតិ បានតែនិយាយ ប៉ុន្តែធ្វើអ្វីពួកគេមិនកើត។
ឆ្នាំ២០២៤ នេះ អង្គការ Freedom House ដាក់ចំណាត់ថ្នាក់ប្រទេសកម្ពុជាស្ថិតក្នុងលេខរៀងទី៨ ក្នុងចំណោមប្រទេសទាំង១១ នៅតំបន់អាស៊ាន ជាប្រទេសល្បីល្បាញខាងគាបសង្កត់សេរីភាពនយោបាយ សេរីភាពបញ្ចេញមតិ សិទ្ធិមូលដ្ឋានរបស់ប្រជាពលរដ្ឋ និងបំបិទប្រព័ន្ធផ្សព្វផ្សាយឯករាជ្យ៕