 នៅព្រឹកថ្ងៃពុធ នេះ ក្រោមហេតុផលថា អំពើល្មើសរបស់ជនជាប់ចោទ គឺជាអំពើ “មិនរាងចាល”។){kind=link}
តុលាការកំពូលក្រុងភ្នំពេញ ទាត់ចោលបណ្ដឹងសំណើសុំនៅក្រៅឃុំបណ្ដោះអាសន្នពីប្រធានសមាគមសម្ព័ន្ធនិស្សិតបញ្ញវន្តខ្មែរ (KSILA) នៅព្រឹកថ្ងៃពុធ នេះ ក្រោមហេតុផលថា អំពើល្មើសរបស់ជនជាប់ចោទ គឺជាអំពើ “មិនរាងចាល”។
តុលាការកំពូលក្រុងភ្នំពេញ បានបើកសវនាការលើសំណុំរឿងព្រហ្មទណ្ឌរបស់លោក កើត សារ៉ាយ នៅថ្ងៃទី៧ ខែសីហា នេះ ដែលពាក់ព័ន្ធនឹងបទចោទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងមិនរាងចាលក្នុងបទមជ្ឈិម» ទាក់ទងទៅនឹងការបញ្ចេញមតិរបស់លោកដែលបានអំពាវនាវឱ្យមានដំណោះស្រាយចំពោះករណីជម្លោះដីធ្លីនៅក្នុងខេត្តព្រះវិហារ កាលពីពេលកន្លងទៅ។
តុលាការកំពូលសម្រេចច្រានចោលបណ្ដឹងសារទុក្ខរបស់ប្រធានសមាគមសម្ព័ន្ធនិស្សិតបញ្ញវន្តខ្មែរ (KSILA) លោក កើត សារ៉ាយ ដោយរក្សាសេចក្ដីសម្រេចរបស់សាលាឧទ្ធរណ៍ និងសាលាដំបូងរាជធានីភ្នំពេញ ទុកជាបានការដដែល ជុំវិញបទចោទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងមិនរាងចាលក្នុងបទមជ្ឈិមនេះ។
ការសម្រេចនេះ ធ្វើឡើងបន្ទាប់ពីលោក កើត សារ៉ាយ បានស្នើតុលាការឱ្យលោកបាននៅក្រៅឃុំបណ្ដោះអាសន្ន កាលពីចុងខែកក្កដា កន្លងទៅថ្មីៗនេះ។
លោក កើត សារ៉ាយ ត្រូវបានសមត្ថកិច្ចចាប់ខ្លួនកាលពីអំឡុងខែមេសា ឆ្នាំ២០២៤ បន្ទាប់ពីលោកធ្វើអត្ថាធិប្បាយពីបញ្ហាជម្លោះដីធ្លីដែលមានពាក់ព័ន្ធជាមួយនឹងដីសម្បទានសេដ្ឋកិច្ចដែលត្រូវបានផ្តល់ឱ្យក្រុមហ៊ុន សីលាដាម៉ិច ក្នុងខេត្តព្រះវិហារ ក្រោយអាជ្ញាធរមូលដ្ឋានដុតផ្ទះសម្បែងរបស់ពលរដ្ឋនៅទីនោះ។ លោកត្រូវបានចោទប្រកាន់ពីបទ ញុះញង់ឱ្យប្រព្រឹត្តបទឧក្រិដ្ឋជាអាទិ៍ ឬបង្កភាពវឹកវរធ្ងន់ធ្ងរដល់សន្តិសុខសង្គម យោងតាមមាត្រា ៤៩៤ និង ៤៩៥ នៃក្រមព្រហ្មទណ្ឌ។
ជុំវិញបញ្ហានេះ លោកកំពុងប្រឈមមុខនឹងការចោទប្រកាន់តាមមាត្រា ៨៨ នៃក្រមព្រហ្មទណ្ឌមួយករណីបន្ថែមទៀត ដោយសារតែលោកត្រូវបានកាត់ទោសពីរដងចំពោះបទល្មើសមជ្ឈិមក្នុងរយៈពេល ៥ឆ្នាំ ដែលអាចធ្វើឱ្យរយៈពេលជាប់ពន្ធនាគាររបស់លោកកើនឡើងទ្វេដង។
កាលពីអំឡុងឆ្នាំ២០២០ លោក កើត សារ៉ាយ បានអំពាវនាវឱ្យមានការដោះលែងថ្នាក់ដឹកនាំសហជីព លោក រ៉ុង ឈុន បន្ទាប់ពីត្រូវសមត្ថកិច្ចចាប់ខ្លួន។
ដោយសារតែបញ្ហានេះ លោក កើត សារ៉ាយ ត្រូវបានតុលាការផ្ដន្ទាទោសឱ្យជាប់ពន្ធនាគាររយៈពេល ២០ខែ ឬ ១ឆ្នាំ ៨ខែ ប៉ុន្តែក្រោយមក លោកត្រូវបានតុលាការដោះលែងឱ្យមានសេរីភាពឡើងវិញមុនថ្ងៃកំណត់ ដោយព្យួរទោសដែលនៅសល់។
តំណាងរាស្ត្រគណបក្សសង្គ្រោះជាតិលោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី៧ សីហា នេះដោយចាត់ទុកការសម្រេចរបស់តុលាការកំពូលទីក្រុងភ្នំពេញចំពោះការបដិសេធសំណើសុំនៅក្រៅឃុំរបស់លោក កើត សារ៉ាយ គឺជាចេតនាធ្វើទុក្ខបុកម្នេញលើសកម្មជនសង្គមក្រោមនិន្នាការនយោបាយបក្សកាន់អំណាច ដើម្បីបង្ក្រាបទៅលើសំឡេងដែលរិះគន់ពីការដឹកនាំរបស់រដ្ឋាភិបាលលោក ហ៊ុន ម៉ាណែត។
លោក អ៊ុំ សំអាន អំពាវនាវឱ្យប្រជាពលរដ្ឋ និងអ្នកនយោបាយទាំងអស់ ចូលរួមតវ៉ា និងទាមទារឱ្យរដ្ឋាភិបាល និងតុលាការនៅកម្ពុជា បើកលំហសេរីភាពបញ្ចេញមតិឡើងវិញ ដើម្បីធានាប្រព័ន្ធយុត្តិធម៌របស់កម្ពុជា និងបញ្ឈប់ពីការប្រើប្រាស់និន្នាការនយោបាយរបស់គណបក្សប្រជាជនកម្ពុជាលើស្ថាប័នអនុវត្តច្បាប់បន្តទៀត។
តំណាងរាស្ត្រគណបក្សសង្គ្រោះជាតិរូបនេះបញ្ជាក់ថា ឱ្យតែតុលាការស្ថិតនៅក្រោមការបង្គាប់បញ្ជារបស់បក្សកាន់អំណាច ប្រព័ន្ធយុត្តិធម៌ និងនីតិរដ្ឋរបស់កម្ពុជាមិនអាចត្រូវបានធានាសម្រាប់ប្រជាពលរដ្ឋទូទៅបានឡើយ គឺអាចត្រឹមតែធានាការពារក្រុមអ្នកមានអំណាចប៉ុណ្ណោះ៕