 ជាបទល្មើសរួមគំនិតក្បត់ ដែលត្រូវផ្ដន្ទាទោសដាក់ពន្ធនាគារពី ៥ឆ្នាំទៅ ១០ឆ្នាំ និងពី ១០ឆ្នាំទៅ ២០ឆ្នាំ បើជាមន្ត្រីរាជការសាធារណៈ ព្រោះជាផែនការប៉ុនប៉ងផ្តួលរំលំរាជរដ្ឋាភិបាលកម្ពុជា។){kind=link}
ក្រសួងយុត្តិធម៌ ចោទប្រកាន់អ្នកដែលចូលរួមបាតុកម្មតវ៉ាទាមទារឱ្យរដ្ឋាភិបាលដកខ្លួនចេញពីគម្រោងអភិវឌ្ឍន៍ត្រីកោណ (CLV) ជាបទល្មើសរួមគំនិតក្បត់ ដែលត្រូវផ្ដន្ទាទោសដាក់ពន្ធនាគារពី ៥ឆ្នាំទៅ ១០ឆ្នាំ និងពី ១០ឆ្នាំទៅ ២០ឆ្នាំ បើជាមន្ត្រីរាជការសាធារណៈ ព្រោះជាផែនការប៉ុនប៉ងផ្តួលរំលំរាជរដ្ឋាភិបាលកម្ពុជា។
ក្រសួងយុត្តិធម៌ បានចេញសេចក្តីថ្លែងការណ៍កាលពីយប់ថ្ងៃទី១៣ ខែសីហា ឆ្នាំ២០២៤ ដោយចាត់ទុកការបាតុកម្មតវ៉ាបញ្ហាតំបន់ត្រីកោណកម្ពុជា ឡាវ និងវៀតណាម ជាផែនការប៉ុនប៉ងផ្តួលរំលំរដ្ឋាភិបាលកម្ពុជា ដើម្បីអំណាចដែលជាបទឧក្រិដ្ឋនឹងត្រូវផ្ដន្ទាទោសក្រោមបទល្មើសឧបឃាត តាមមាត្រា៤៥១ និងមាត្រា៤៥២ នៃក្រមព្រហ្មទណ្ឌ។
ក្រសួងយុត្តិធម៌ អះអាងថា ផែនការប៉ុនប៉ងនេះ មិនត្រឹមតែប្រឆាំងនឹងសន្តិសុខជាតិរបស់ប្រទេសកម្ពុជាទេ ហើយក៏អាចខុសទៅនឹងច្បាប់ស្ដីពីការប្រឆាំងនឹងភេរវកម្មផងដែរ ព្រោះពួកគេបានប្រើប្រាស់នូវវិធីញុះញង់ អុជអាល បំផុសបំផុល និងប្រើឧបាយកលនយោបាយអូសទាញជនស្លូតត្រង់ឱ្យធ្វើបាតុកម្មផ្តួលរំលំរដ្ឋាភិបាល ប៉ុន្តែសម្រាប់បុគ្គលដែលបានសារភាពទោសកំហុស ឬសហការដើម្បីបង្ក្រាបការបះបោរនេះ នឹងត្រូវលើកលែងឱ្យរួចទោសពីអំពើដែលខ្លួនបានប្រព្រឹត្តនេះ ដោយអនុលោមតាមបញ្ញត្តិមាត្រា៤៥៤ នៃក្រុមព្រហ្មទណ្ឌ។
ប្រភពដដែលបញ្ជាក់ថា សមត្ថកិច្ចបានក្តាប់ភស្តុតាងបានយ៉ាងច្បាស់អស់ហើយ ដែលបង្ហាញថា ផែនការអូសទាញប្រមូលប្រជាជនក្នុងស្រុកដើម្បីបាតុកម្មប្រឆាំងនឹងគម្រោងអភិវឌ្ឍន៍ត្រីកោណនេះ ពុំមែនជាការសម្ដែងមតិតាមច្បាប់នោះទេ ប៉ុន្តែជាផែនការប៉ុនប៉ងធ្វើបដិវត្តន៍ពណ៌ដើម្បីផ្តួលរំលំរដ្ឋាភិបាលប៉ុណ្ណោះ។
អតីតមន្ត្រីជាន់ខ្ពស់សមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី១៤ សីហា នេះថា ការចោទប្រកាន់របស់ក្រសួងយុត្តិធម៌ ចំពោះប្រជាពលរដ្ឋដែលចូលរួមទាមទារឱ្យរដ្ឋាភិបាលដកខ្លួនចេញពីតំបន់ត្រីកោណអភិវឌ្ឍន៍ (CLV) ក្នុងបទល្មើសរួមគំនិតក្បត់ គឺជាការគំរាមសេរីភាពបញ្ចេញមតិធ្ងន់ធ្ងរ ដែលផ្ទុយស្រឡះពីបំណងពិតប្រាកដរបស់ប្រជាពលរដ្ឋដែលខ្វល់ខ្វាយពីការបាត់បង់ទឹកដី។
អ្នកឃ្លាំមើលស្ថានការណ៍កម្ពុជារូបនេះលើកឡើងថា នេះកាន់តែបង្ហាញឱ្យឃើញថាមិនមែនតែប្រជាពលរដ្ឋធម្មតាទេដែលទាមទារឱ្យរដ្ឋាភិបាលដកខ្លួនចេញពីគម្រោងនេះ សូម្បីតែមន្ត្រីរាជការក្នុងរាជរដ្ឋាភិបាល ក៏ទាមទារឱ្យដកខ្លួនចេញពីគម្រោងអភិវឌ្ឍន៍ត្រីកោណនេះដែរ។
លោក ស៊ឹង សែនករុណា អះអាងថា បំណងពិតប្រាកដរបស់ប្រជាពលរដ្ឋមិនមែនផ្តួលរំលំរដ្ឋាភិបាលដើម្បីអំណាចទេ ប៉ុន្តែគឺគ្រាន់តែទាមទារឱ្យរដ្ឋាភិបាលដកខ្លួនចេញពីតំបន់ត្រីកោណអភិវឌ្ឍន៍ជាមួយឡាវ និងវៀតណាម ប៉ុណ្ណោះ។ លោកថា បើរដ្ឋាភិបាលដកខ្លួនតាមការទាមទាររបស់ប្រជាពលរដ្ឋ នោះក៏គ្មានការធ្វើបាតុកម្មតវ៉ាទាមទារដូចពេលនេះដែរ។
អតីតមន្ត្រីជាន់ខ្ពស់អង្គការក្រៅរដ្ឋាភិបាលរូបនេះបញ្ជាក់ថា ក្នុងសង្គមប្រជាធិបតេយ្យ ការសម្ដែងមតិរបស់ប្រជាពលរដ្ឋ គឺដើម្បីបង្ហាញពីការមិនពេញចិត្តនឹងការដឹកនាំរបស់រដ្ឋាភិបាលដែលត្រូវធ្វើឡើងតាមរយៈនៃការធ្វើបាតុកម្មដែលមានចែងក្នុងរដ្ឋធម្មនុញ្ញ។
លោក ស៊ឹង សែនករុណា ចោទសួរថា បើប្រជាពលរដ្ឋធ្វើបាតុកម្មដើម្បីសម្ដែងមតិ បែរជាត្រូវចោទប្រកាន់ពីបទក្បត់ជាតិ និងរងនូវការបង្ក្រាបពីរដ្ឋាភិបាល តើរដ្ឋាភិបាលអាចត្រូវចោទពីបទក្បត់ជាតិដែរទេ នៅពេលខ្លួនបង្ក្រាបឆន្ទៈពលរដ្ឋម្ចាស់ប្រទេសបែបនេះ ព្រោះប្រទេសនេះមិនមែនជារបស់អ្នកដឹកនាំទេ គឺជាប្រទេសរបស់ប្រជាពលរដ្ឋគ្រប់រូប។
ជុំវិញបញ្ហានេះ អ្នកជំនាញនយោបាយការទូតអន្តរជាតិលោក សេង វណ្ណលី ធ្លាប់បានលើកឡើងដែលទំនងជាសំដៅដល់វិធានការបង្ក្រាបពីរាជរដ្ឋាភិបាលកាលពីពេលថ្មីៗនេះថា និយមន័យថ្មីនៃ «សន្តិភាព» មានពីរប្រភេទ គឺសន្តិភាពអវិជ្ជមាន (Negative Peace) និងសន្តិភាពវិជ្ជមាន (Positive Peace) ប៉ុន្តែ «សន្តិភាព» ស្រុករំដួល គឺការតាមកម្ចាត់អ្នកមានគំនិតផ្ទុយគ្រប់រូបភាព៕