 កម្ពុជា ឡាវ និងវៀតណាម ក៏អាចបញ្ឈប់បានដែរ។){kind=link}
អ្នកតាមដានភូមិសាស្ត្រតំបន់អាស៊ីអាគ្នេយ៍ និងប៉ាស៊ីហ្វិក លើកឡើងថា បើរដ្ឋាភិបាលមានឧត្ដមគតិស្នេហាជាតិពិតប្រាកដក្នុងការរឹតបន្តឹងច្បាប់អន្តោប្រវេសន៍លើជនជាតិវៀតណាម ដែលរស់នៅដោយខុសច្បាប់លើទឹកដីខ្មែរសព្វថ្ងៃនេះឲ្យម៉ឺងម៉ាត់ នោះការធ្វើបាតុកម្មប្រឆាំងតំបន់ត្រីកោណអភិវឌ្ឍន៍ (CLV DTA) កម្ពុជា ឡាវ និងវៀតណាម ក៏អាចបញ្ឈប់បានដែរ។
អ្នកជំនាញការទូតអន្តរជាតិលោក សេង វណ្ណលី សរសេរលើគណនីហ្វេសប៊ុករបស់ខ្លួនកាលពីថ្ងៃទី១៤ សីហា នេះថា បើរដ្ឋាភិបាលខ្មែរទទួលស្គាល់ថាកម្ពុជាមានជនអន្តោប្រវេសន៍វៀតណាមខុសច្បាប់ និងចាត់វិធានការរឹតបន្តឹងឲ្យម៉ឺងម៉ាត់ នោះការធ្វើបាតុកម្មប្រឆាំងតំបន់ត្រីកោណអភិវឌ្ឍន៍ (CLV DTA) កម្ពុជា ឡាវ និងវៀតណាម ក៏អាចបញ្ឈប់បានដែរ។
លោក សេង វណ្ណលី លើកឡើងថា តាមការពិត បញ្ហាតំបន់ត្រីកោណអភិវឌ្ឍន៍ (CLV DTA) ជាបញ្ហាប្រឈមមួយផ្នែកដែលរដ្ឋាភិបាលត្រូវដោះស្រាយតាមការទាមទាររបស់ប្រជាពលរដ្ឋពិតមែនហើយ ប៉ុន្តែបញ្ហាដែលរដ្ឋាភិបាលត្រូវដោះស្រាយបន្ទាន់ គឺបញ្ហាជនអន្តោប្រវេសន៍វៀតណាមខុសច្បាប់ដែលកំពុងរស់នៅលើទឹកដីកម្ពុជាយ៉ាងអនាធិបតេយ្យសព្វថ្ងៃនេះ។
អ្នកជំនាញការទូតអន្តរជាតិរូបនេះបញ្ជាក់ថា បើរដ្ឋាភិបាលក្លាហានហ៊ានអនុវត្តច្បាប់អន្តោប្រវេសន៍ដោយម៉ឺងម៉ាត់មែន នោះរដ្ឋាភិបាលមិនត្រឹមតែអាចទាក់ទាញការគាំទ្រពីពលរដ្ឋអ្នកស្នេហាជាតិពីគ្រប់និន្នាការនយោបាយប៉ុណ្ណោះទេ ថែមទាំងអាចរារាំងពលរដ្ឋមិនឲ្យធ្លាក់ចូលក្នុងចលនាប្រឆាំងនឹងរដ្ឋាភិបាលថែមទៀតផង។
លោក សេង វណ្ណលី ចោទសួរទៅកាន់រដ្ឋាភិបាលលោក ហ៊ុន ម៉ាណែត ថា តើរដ្ឋាភិបាលដែលអះអាងពីការការពារទឹកដី និងអធិបតេយ្យជាតិរហូតមក ហ៊ានអនុវត្តច្បាប់អន្តោប្រវេសន៍លើជនជាតិវៀតណាមខុសច្បាប់ដែរឬក៏អត់។ លោកបញ្ជាក់ថា ប្រយ័ត្នក្លាហានបានតែជាមួយនឹងប្រជាពលរដ្ឋខ្លួនឯង។
កាលពីថ្ងៃទី១២ ខែសីហា ឆ្នាំ២០២៤ មេដឹកនាំបក្សកាន់អំណាចលោក ហ៊ុន សែន បានបញ្ចេញខ្សែអាត់សំឡេងប្រវែងជិត ៦០នាទី ដោយព្រមានថា បើប្រជាពលរដ្ឋខ្មែរដើរលើសបន្ទាត់ក្រហមក្នុងការធ្វើបាតុកម្មប្រឆាំងនឹងគម្រោងអភិវឌ្ឍន៍ត្រីកោណ នោះការបង្ហូរឈាមច្បាស់ជានឹងកើតមានឡើងដោយចៀសមិនរួចឡើយ។
ជុំវិញបញ្ហានេះ កាលពីថ្ងៃទី១៣ ខែសីហា ឆ្នាំ២០២៤ ក្រសួងយុត្តិធម៌ ក៏បានចេញសេចក្តីថ្លែងការណ៍មួយដែរ ដោយចាត់ទុកការធ្វើបាតុកម្មតវ៉ាបញ្ហាតំបន់អភិវឌ្ឍន៍ត្រីកោណ ជាផែនការប៉ុនប៉ងផ្តួលរំលំរដ្ឋាភិបាលកម្ពុជាដើម្បីអំណាចដែលជាបទឧក្រិដ្ឋ នោះនឹងត្រូវផ្ដន្ទាទោសក្រោមបទល្មើសឧបឃាត ឬការបៀតបៀនរាងកាយគេ ឬការប្រហារជីវិតគេ។
ក្រសួងយុត្តិធម៌ ចោទថាអ្នកដែលចូលរួមធ្វើបាតុកម្មតវ៉ាទាមទារឱ្យរដ្ឋាភិបាលដកខ្លួនចេញពីគម្រោងអភិវឌ្ឍន៍ត្រីកោណ (CLV) ជាបទល្មើសរួមគំនិតក្បត់ ដែលត្រូវផ្ដន្ទាទោសដាក់ពន្ធនាគារពី ៥ឆ្នាំទៅ ១០ឆ្នាំ និងពី ១០ឆ្នាំទៅ ២០ឆ្នាំ បើជាមន្ត្រីរាជការសាធារណៈ។
យ៉ាងណាក៏ដោយ គណៈកម្មការបាតុកម្មប្រចាំប្រទេសកូរ៉េខាងត្បូង លោក យ៉ង់ ស៊ីណេត បានអះអាងលើគណនីហ្វេសប៊ុករបស់ខ្លួនកាលពីថ្ងៃទី១៤ សីហា នេះថា ចលនាយុវជននៅសាធារណរដ្ឋកូរ៉េ នឹងធ្វើបាតុកម្មប្រឆាំងគម្រោងអភិវឌ្ឍន៍ត្រីកោណម្តងទៀត ដែលនឹងមានអ្នកចូលរួមប្រមាណជា ៥ម៉ឺននាក់នាពេលដ៏ខ្លីខាងមុខនេះ។
លោក យ៉ង់ ស៊ីណេត លើកឡើងថា ការប្រកាសកម្ទេចប្រជាពលរដ្ឋដែលចូលរួមបាតុកម្មទាមទារឱ្យរដ្ឋាភិបាលដកខ្លួនចេញពីគម្រោងអភិវឌ្ឍន៍ត្រីកោណ គឺជាបង្ហាញថារដ្ឋាភិបាលរបស់គណបក្សប្រជាជនកម្ពុជាសព្វថ្ងៃនេះ ជារដ្ឋាភិបាលផ្ដាច់ការ ខណៈប្រជាពលរដ្ឋខ្មែរមិនត្រូវការរដ្ឋាភិបាលផ្ដាច់ការមួយនេះឡើយ។
សកម្មជនប្រចាំសាធារណរដ្ឋកូរ៉េរូបនេះព្រមានថា បើរដ្ឋាភិបាលមិនព្រមដកខ្លួនចេញពីគម្រោងអភិវឌ្ឍន៍ជាមួយឡាវ និងវៀតណាម ទេ ប្រជាពលរដ្ឋខ្មែរដែលកំពុងរស់នៅលើទឹកដីកូរ៉េ ជាង ៥ម៉ឺននាក់សព្វថ្ងៃនេះ ក៏មិនបញ្ឈប់ការធ្វើបាតុកម្មទាមទាររបស់ពួកគេដែរ ព្រោះអាយុជីវិតជាតិ គឺសំខាន់ណាស់សម្រាប់ពលរដ្ឋខ្មែរគ្រប់រូប៕