 គឺជាផែនការនយោបាយរបស់វៀតណាម យ៉ាងពិតប្រាកដ។){kind=link}
ក្រុមអ្នកវិភាគនយោបាយ លើកឡើងថា ការបញ្ជាក់ជំហររបស់អនុប្រធានគណបក្សប្រជាជនកម្ពុជា លោក ស ខេង ដែលប្រកាសគាំទ្ររដ្ឋាភិបាលលោក ហ៊ុន ម៉ាណែត និងប្រកាសគាំទ្រគម្រោងត្រីកោណអភិវឌ្ឍន៍ កាន់តែបង្ហាញឱ្យឃើញរឹតតែច្បាស់ថា គម្រោងត្រីកោណអភិវឌ្ឍន៍កម្ពុជា ឡាវ និងវៀតណាម (CLV DTA) គឺជាផែនការនយោបាយរបស់វៀតណាម យ៉ាងពិតប្រាកដ។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី១៩ សីហា នេះថា ការបញ្ជាក់ជំហររបស់លោក ស ខេង ចំពោះការការពាររដ្ឋាភិបាលលោក ហ៊ុន ម៉ាណែត គឺគ្រាន់តែដើម្បីការពារសុវត្ថិភាពផ្ទាល់ខ្លួនរបស់គាត់ និងក្រុមគ្រួសារគាត់ពីការសង្ស័យរបស់វៀតណាម ក្នុងនាមគាត់ជាបក្ខជនជាន់ខ្ពស់របស់អតីតបក្សកុម្មុយនីស្តវៀតណាម មួយនេះតែប៉ុណ្ណោះ។
លោក គឹម សុខ លើកឡើងថា បើគ្រាន់តែជានយោបាយរបស់គ្រួសារត្រកូលហ៊ុន ជុំវិញគម្រោងអភិវឌ្ឍន៍ត្រីកោណនេះ លោក ស ខេង អាចធ្វើមិនដឹងមិនឮ ឬមិនបាច់បញ្ចេញប្រតិកម្មអ្វីក៏បានដែរ ប៉ុន្តែគម្រោងត្រីកោណនេះ គឺជាគម្រោងនយោបាយរបស់វៀតណាម ដូច្នេះលោក ស ខេង មិនអាចទប់ខ្លួនមិនឲ្យរអិលចូលក្នុងគ្រោះថ្នាក់សម្រាប់ក្រុមគ្រួសាររបស់គាត់បានទេ ប្រសិនបើគាត់មិនប្រកាសគាំទ្រនោះ។
អ្នកវិភាគរូបនេះអះអាងថា នៅពេលនេះ គណបក្សប្រជាជនកម្ពុជា កំពុងបែកបាក់កម្លាំងសាមគ្គីកាន់តែធំថែមទៀត ព្រោះក្នុងបក្សនេះបច្ចុប្បន្ន មិនលើកតម្លៃអ្នកណាក្រៅតែពីរនាក់ឪកូនត្រកូលហ៊ុន គឺលោក ហ៊ុន សែន និងលោក ហ៊ុន ម៉ាណែត នោះទេ។
លោក គឹម សុខ បញ្ជាក់ថា កាន់តែច្បាស់បំផុតទៀតនោះ គឺចាប់តាំងពីលោក ហ៊ុន ម៉ាណែត ឡើងជានាយករដ្ឋមន្ត្រីមក លោក ស ខេង ស្ទើរតែមិនដែលចូលរួមក្នុងពិធីផ្សេងៗដែលមានវត្តមានលោក ហ៊ុន សែន និងលោក ហ៊ុន ម៉ាណែត ទោះក្នុងក្របខ័ណ្ឌបក្ស និងក្របខ័ណ្ឌក្រៅពីបក្សក៏ដោយ។
លោក គឹម សុខ គូសបញ្ជាក់ថា សព្វថ្ងៃនេះ គណបក្សប្រជាជនកម្ពុជា គឺជាគណបក្សរបស់គ្រួសារហ៊ុន មិនមែនជាគណបក្សរបស់មន្ត្រីបក្សនេះទេ ចំណែកឯការបញ្ជាក់របស់លោក ស ខេង ថានៅជាមួយគណបក្សប្រជាជនកម្ពុជា គឺមិនមែនមានន័យថាគាត់នៅជាមួយគណបក្សរបស់គ្រួសារហ៊ុននោះទេ គឺនៅជាមួយគណបក្សប្រជាជនកម្ពុជារបស់មន្ត្រីបក្សនេះប៉ុណ្ណោះ។
កាលពីថ្ងៃទី១៧ ខែសីហា ឆ្នាំ២០២៤ អនុប្រធានគណបក្សប្រជាជនកម្ពុជាលោក ស ខេង បានចេញសេចក្តីថ្លែងការណ៍មួយដោយអះអាងថា ក្រុមប្រឆាំងជ្រុលនិយមមួយចំនួនកំពុងបង្កើតឱ្យមានការភាន់ច្រឡំ និងមន្ទិលសង្ស័យលើជំហររបស់លោកចំពោះគណបក្សប្រជាជនកម្ពុជា និងរដ្ឋាភិបាលរបស់លោក ហ៊ុន ម៉ាណែត។
លោក ស ខេង បញ្ជាក់ថា លោកនៅតែបន្តចូលរួមគាំទ្រឥតងាករេចំពោះការសម្រេចចិត្តរបស់គណបក្សប្រជាជនកម្ពុជា ដែលមានលោក ហ៊ុន សែន ជាអ្នកដឹកនាំ និងបន្តគាំទ្ររាជរដ្ឋាភិបាលអាណត្តិថ្មីដែលមានលោក ហ៊ុន ម៉ាណែត ជាប្រមុខ ដើម្បីបុព្វហេតុជាតិ និងដើម្បីសុភមង្គលរបស់ប្រជាពលរដ្ឋខ្មែរនៅទូទាំងប្រទេស។
តំណាងរាស្ត្រគណបក្សសង្គ្រោះជាតិលោក អ៊ុំ សំអាន ប្រាប់សារព័ត៌មាន The Cambodia Daily កាលពីពេលថ្មីៗនេះថា ផែនការរបស់វៀតណាម មានតែមួយគត់ គឺគ្រប់គ្រងប្រទេសកម្ពុជាទាំងមូលឱ្យបាន ទោះត្រូវប្រើវិធីបែបណាក៏ដោយ។
លោក អ៊ុំ សំអាន បញ្ជាក់ថា ភស្តុតាងជាឯកសារបានបញ្ជាក់យ៉ាងច្បាស់ពីកិច្ចប្រជុំលើកទី១០ នៅទីក្រុងហាណូយ ក្នុងឆ្នាំ២០១៨ វៀតណាម បានស្នើឱ្យប្រទេសកម្ពុជា និងប្រទេសឡាវ ដាក់ប្រទេសទាំងមូលជាបណ្តើរៗចូលក្នុងតំបន់ត្រីកោណដើម្បីអភិវឌ្ឍរួមគ្នា ដែលក្នុងខ្លឹមសារនេះ គឺមានន័យថា រដ្ឋាភិបាលនៃប្រទេសទាំង៣ នឹងដាក់ខេត្តរៀងខ្លួនចូលក្នុងតំបន់នេះម្តងមួយខេត្តៗរហូតដាក់ប្រទេសទាំងមូលតែម្តង។
ចំពោះអ្នកខ្លះដែលស្មានថាមានមន្ត្រីបក្សប្រជាជនកម្ពុជា ខ្លះក៏ស្រឡាញ់ជាតិ ស្នេហាជាតិដែរនោះ ពលរដ្ឋខ្មែរមិនទាន់ឃើញមានមន្ត្រីបក្សនេះណាម្នាក់ចេញមុខជំទាស់នឹងគម្រោងផែនការបាត់ពូជសាសន៍ បាត់ទឹកបាត់ដី បាត់ព្រៃព្រឹក្សាម្តងណាឡើយ ក្រៅតែពីស្របតាមបំពង បន្ទរតាមអ្វីត្រកូលហ៊ុនចង់បាន ចង់ធ្វើ ហើយចែកផលប្រយោជន៍គ្នាយករស់យកសុខទទួលផលផ្ទាល់ខ្លួនរៀងៗខ្លួននោះទេ។ មន្ត្រីបក្សនេះគិតថា បើរស់ រស់ទាំងអស់គ្នា បើដួលរលំមួយ គឺនឹងដួលរលំទាំងអស់គ្នា៕