 ហើយត្រូវរដ្ឋាភិបាលចោទថាជាអំពើផ្តួលរំលំរដ្ឋាភិបាល នោះគឺមានន័យថា គម្រោងអភិវឌ្ឍន៍ត្រីកោណនេះគឺជាគម្រោងបង្កើតរដ្ឋាភិបាលឥណ្ឌូចិន ដែលនឹងត្រូវគ្រប់គ្រងដោយវៀតណាម នៅថ្ងៃមុខយ៉ាងពិតប្រាកដមែន។){kind=link}
ក្រុមអ្នកវិភាគលើកឡើងថា បើគ្រាន់តែបាតុកម្មដើម្បីឱ្យរដ្ឋាភិបាលដកខ្លួនចេញពីគម្រោងអភិវឌ្ឍន៍ត្រីកោណ (CLV) ហើយត្រូវរដ្ឋាភិបាលចោទថាជាអំពើផ្តួលរំលំរដ្ឋាភិបាល នោះគឺមានន័យថា គម្រោងអភិវឌ្ឍន៍ត្រីកោណនេះគឺជាគម្រោងបង្កើតរដ្ឋាភិបាលឥណ្ឌូចិន ដែលនឹងត្រូវគ្រប់គ្រងដោយវៀតណាម នៅថ្ងៃមុខយ៉ាងពិតប្រាកដមែន។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី២២ សីហា នេះថា គម្រោងអភិវឌ្ឍន៍ត្រីកោណ កម្ពុជា ឡាវ និងវៀតណាម (CLV-DTA) គឺជាគម្រោងមួយដែលនឹងត្រៀមបង្កើតជារដ្ឋាភិបាលឥណ្ឌូចិន ដោយការដាក់ទឹកដីកម្ពុជា ឡាវ និងវៀតណាម ទាំងមូលរួមគ្នាដើម្បីបង្កើតទៅជារដ្ឋាភិបាលតែមួយ។
លោក គឹម សុខ លើកឡើងថា គ្មានហេតុផលសមរម្យណាសម្រាប់លើកយកមកចោទពលរដ្ឋដែលចូលរួមបាតុកម្មប្រឆាំងគម្រោងអភិវឌ្ឍន៍ត្រីកោណ ថាជាអំពើផ្តួលរំលំរដ្ឋាភិបាលនោះទេ។ លោកថា លុះណាតែរដ្ឋាភិបាលកម្ពុជា ឡាវ និងវៀតណាម បានចាត់ទុកតំបន់អភិវឌ្ឍន៍ត្រីកោណនេះជារដ្ឋាភិបាលរួចទៅហើយ ទើបជាហេតុផលសមរម្យសម្រាប់ចោទពលរដ្ឋដែលចូលរួមបាតុកម្មប្រឆាំងតំបន់អភិវឌ្ឍន៍ត្រីកោណនេះថាជាអំពើផ្តួលរំលំរដ្ឋាភិបាល។
អ្នកវិភាគនយោបាយរូបនេះបញ្ជាក់ថា ប្រជាពលរដ្ឋខ្មែរមិនចង់បានរដ្ឋាភិបាលឥណ្ឌូចិន ដែលគ្រប់គ្រងដោយវៀតណាម ទេ ព្រោះការបង្កើតឱ្យមានរដ្ឋាភិបាលបែបនេះ គឺនឹងនាំឱ្យកម្ពុជាបាត់បង់ទឹកដី ដូច្នេះការបាតុកម្មតវ៉ាទាមទាររបស់ពលរដ្ឋខ្មែរនៅជុំវិញពិភពលោកនៅពេលនេះ គឺគ្រាន់តែចង់ឱ្យប្រទេសកម្ពុជាមានរដ្ឋាភិបាលស្របច្បាប់ជារបស់ខ្លួន និងជារដ្ឋាភិបាលតំណាងឱ្យឆន្ទៈខ្មែរតែមួយគត់ប៉ុណ្ណោះ។
ការអះអាងនេះ ធ្វើឡើងស្របពេលដែលរដ្ឋាភិបាលកម្ពុជាចោទអ្នកចូលរួមធ្វើបាតុកម្មប្រឆាំងនឹងគម្រោងអភិវឌ្ឍន៍ត្រីកោណ គឺជាអំពើផ្តួលរំលំរដ្ឋាភិបាលនៅពេលនេះ។
កាលពីថ្ងៃទី១២ ខែសីហា ឆ្នាំ២០២៤ មេដឹកនាំបក្សកាន់អំណាចលោក ហ៊ុន សែន បានបញ្ចេញខ្សែអាត់សំឡេងប្រវែងជិត ៦០នាទី ដោយបញ្ជាក់ច្បាស់ៗថា អ្នកចូលរួមបាតុកម្មប្រឆាំងនឹងគម្រោងអភិវឌ្ឍន៍ត្រីកោណមានគោលដៅផ្តួលរំលំរាជរដ្ឋាភិបាល។
លោក ហ៊ុន សែន ព្រមានថា បើពលរដ្ឋខ្មែរដើរលើសបន្ទាត់ក្រហម នោះការបង្ហូរឈាមច្បាស់ជានឹងកើតមានឡើង ព្រោះរដ្ឋាភិបាលកម្ពុជាគ្មានជម្រើសផ្សេងទេ។
មេដឹកនាំបក្សកាន់អំណាចរូបនេះគំរាមថា អ្នកដែលចង់ធ្វើបាតុកម្ម ជាពិសេសអ្នកដែលចូលរួមជាមួយក្រុមមួយក្នុងបណ្ដាញទំនាក់ទំនងតេឡេក្រាមដែលមានឈ្មោះថា «រួបរួមគ្នាដើម្បីជាតិ» ត្រូវបញ្ឈប់គំនិតនេះ និងត្រូវដកខ្លួនជាបន្ទាន់ បើមិនចង់ជាប់គុកទេនោះ។
ជុំវិញបញ្ហានេះ អតីតតំណាងរាស្ត្រគណបក្សសង្គ្រោះជាតិលោក អ៊ុំ សំអាន បានលើកឡើងកាលពីពេលថ្មីៗនេះថា ផែនការរបស់មេដឹកនាំវៀតណាម លោក ហូ ជី មិញ ក្នុងដំណើរឆ្ពោះទៅទិសខាងលិច គឺដើម្បីលេបត្របាក់យកកម្ពុជា និងឡាវ ក្នុងបំណងបង្កើតសហព័ន្ធឥណ្ឌូចិន ដែលគ្រប់គ្រងដោយវៀតណាម។ លោកថា ផែនការនេះនឹងបានសម្រេចជាស្ថាពរ ឱ្យតែប្រទេសទាំងបីនេះដាក់បញ្ចូលគ្នាជាសហព័ន្ធតែមួយ។
មន្ត្រីបក្សប្រឆាំងរូបនេះបញ្ជាក់ថា វៀតណាមកំពុងជំរុញឱ្យមេដឹកនាំខ្មែរធ្វើកិច្ចសហការនានាជាមួយវៀតណាម ឱ្យកាន់តែឆាប់ មុនពេលដែលលោក ហ៊ុន សែន លែងមានជីវិតរស់នៅ ដើម្បីឱ្យពួកគេអាចកាត់យកដីខ្មែរទាំង ៤ខេត្តនេះ និងប្រែក្លាយតំបន់នេះទៅជាសហព័ន្ធឥណ្ឌូចិន ឱ្យបានកាន់តែឆាប់។
ចំណែកសកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន បានលើកឡើងមុនពេលសមត្ថកិច្ចរបស់លោក ហ៊ុន សែន ចាប់ខ្លួនកាលពីថ្ងៃទី២៣ ខែកក្កដា កន្លងទៅថា ការបង្កើតតំបន់អភិវឌ្ឍន៍ត្រីកោណរួមគ្នារវាងកម្ពុជា ឡាវ និងវៀតណាម គឺស្របតាមបំណងរបស់វៀតណាម ដែលមានផែនការបង្កើតតំបន់កន្ទុយនាគនេះឱ្យក្លាយទៅជាប្រទេសឥណ្ឌូចិន នៅថ្ងៃមុខ។
លោក ស្រ៊ុន ស្រ៊ន បញ្ជាក់ថា នៅពេលដែលកម្ពុជា វៀតណាម និងឡាវ ត្រូវដាក់បញ្ចូលគ្នាទៅជាឥណ្ឌូចិន នោះ គឺមានតែរដ្ឋាភិបាលវៀតណាម តែមួយគត់ដែលធ្វើជាអ្នកគ្រប់គ្រងលើរដ្ឋាភិបាលឥណ្ឌូចិនថ្មីនេះ៕