ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បញ្ជាក់ថា កញ្ញាមិនប្តូរជំហរការពារសិទ្ធិ និងការងារតស៊ូមតិឱ្យបុគ្គលិកកម្មករនៅកាស៊ីណូណាហ្គាវើលដ៍ជាដាច់ខាត បន្ទាប់ពីសាលាដំបូងរាជធានីភ្នំពេញដោះលែងឱ្យមានសេរីភាពឡើងវិញនៅថ្ងៃចន្ទនេះ ក្រោយពីបានអនុវត្តទោសក្នុងពន្ធនាគារអស់រយៈពេលជិត ២ឆ្នាំ។
កញ្ញា ឈឹម ស៊ីថរ នៅថ្ងៃទី១៦ ខែកញ្ញា ឆ្នាំ២០២៤ នេះ បានចាកចេញពីពន្ធនាគារព្រៃស ឬមណ្ឌលអប់រំកែប្រែ ម២ ហើយបន្ទាប់ពីកញ្ញាត្រូវបានសមត្ថកិច្ចចាប់ឃុំខ្លួនតាំងពីចុងខែវិច្ឆិកា ឆ្នាំ២០២២ មក ហើយបើគិតមកទល់នឹងពេលនេះ កញ្ញាត្រូវបានឃុំខ្លួនក្នុងពន្ធនាគារអស់រយៈពេល ២១ខែ ១៩ថ្ងៃ។
កញ្ញា ឈឹម ស៊ីថរ បានបញ្ជាក់ប្រាប់អ្នកសារព័ត៌មានក្រោយពីចេញពីពន្ធនាគារថា កញ្ញាមិនប្តូរជំហរការពារសិទ្ធិ និងការងារតស៊ូមតិឱ្យបុគ្គលិកកម្មករនៅកាស៊ីណូណាហ្គាវើលដ៍ជាដាច់ខាត។
កញ្ញាបានបន្ថែមថា កញ្ញាប្ដេជ្ញាថានឹងដឹកនាំក្រុមសហជីពក្នុងក្រុមហ៊ុនកាស៊ីណូណាហ្គាវើលដ៍ ដើម្បីទាមទារនូវអ្វីដែលពួកគេបានធ្វើជាច្រើនឆ្នាំកន្លងមក រហូតទទួលបានដំណោះស្រាយសមស្របមួយដែលអាចទទួលយកបាន។
នៅថ្ងៃទី១៦ ខែកញ្ញា នេះ ស្ថានទូតអាមេរិកប្រចាំកម្ពុជា ចេញសេចក្តីប្រកាសព័ត៌មានលើទំព័រហ្វេសប៊ុកផ្លូវការរបស់ខ្លួនថា នៅទីបំផុត កញ្ញា ឈឹម ស៊ីថរ មានសេរីភាពឡើងវិញហើយបន្ទាប់ពីជាប់ពន្ធនាគារជិតពីរឆ្នាំ ដោយសារតែការដឹកនាំសហជីព និងការការពារសិទ្ធិការងារ។
ប្រភពដដែលថា កញ្ញា ស៊ីថរ បានទទួលពានរង្វាន់អ្នកការពារសិទ្ធិមនុស្សពីក្រសួងការបរទេសសហរដ្ឋអាមេរិក អំឡុងឆ្នាំ២០២២ ប៉ុន្តែការជាប់ពន្ធនាគារបានរារាំងកញ្ញាក្នុងការធ្វើដំណើរទៅរដ្ឋធានីវ៉ាស៊ីនតុន ដើម្បីទទួលពានរង្វាន់នេះ។
ស្ថានទូតអាមេរិក បញ្ជាក់ថា សហរដ្ឋអាមេរិកនៅតែបន្តប្ដេជ្ញាចិត្តចំពោះប្រជាជនកម្ពុជា និងក្តីប៉ងប្រាថ្នារបស់ពួកគេសម្រាប់ប្រទេសមួយដែលរាល់សំឡេងបញ្ចេញមតិត្រូវបានស្តាប់ និងគោរព រួមទាំងសំឡេងអ្នកដែលអំពាវនាវឲ្យមានលក្ខខណ្ឌការងារល្អប្រសើរផងដែរ។
ជុំវិញបញ្ហានេះ សហជីពម្ហូបអាហារអន្តរជាតិ (IUF) និងសហព័ន្ធសហភាពអន្តរជាតិ (ITUC) ក៏បានចេញសេចក្តីប្រកាសព័ត៌មានរបស់ខ្លួននៅថ្ងៃទី១៦ កញ្ញា នេះដែរថា IUF និង ITUC រួមទាំងសហជីពនៅជុំវិញពិភពលោកដទៃទៀត បានធ្វើយុទ្ធនាការដើម្បីឱ្យមានការដោះលែង ក៏ដូចជាការទម្លាក់ការចោទប្រកាន់ប្រឆាំងនឹងថ្នាក់ដឹកនាំសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ទាំងអស់រហូតមក។
អគ្គលេខាធិការ IUF លោក Sue Longley បញ្ជាក់ថា ភាពក្លាហាន និងកម្លាំងរបស់កញ្ញា ឈឹម ស៊ីថរ គឺជាការលើកទឹកចិត្តដល់ IUF ទាំងមូល ហើយសហជីពជុំវិញពិភពលោកក៏អបអរសាទរចំពោះការដោះលែងសមាជិកទាំងអស់នៃក្រុមគ្រួសាររបស់សហជីពនៃក្រុមហ៊ុនណាហ្គាវើលដ៍ផងដែរ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១៦ កញ្ញា នេះថា ពិតមែនតែកញ្ញា ឈឹម ស៊ីថរ ត្រូវបានចាប់ខ្លួន និងអនុវត្តទោសទៅតាមសាលក្រមរបស់តុលាការរួចហើយក្តី ប៉ុន្តែលោកនៅតែយល់ឃើញថា តុលាការគួរពិចារណាចំពោះសំណុំរឿងរបស់ប្រធានសហជីពរូបនេះឡើងវិញ។
លោកអះអាងថា រឿងក្ដីនេះនៅមានមន្ទិលសង្ស័យ និងភាពមិនប្រក្រតីជាច្រើនដែលមហាជនមើលឃើញថា ការសម្រេចរបស់តុលាការលើករណីនេះ គឺជារឿងអយុត្តិធម៌ដែលជាហេតុនាំឱ្យប៉ះពាល់ដល់កិត្តិយសរបស់រដ្ឋាភិបាល ដែលបានរងនូវការរិះគន់ពីមជ្ឈដ្ឋានជាតិ និងអន្តរជាតិជាបន្តបន្ទាប់រហូតមក។
កញ្ញា ឈឹម ស៊ីថរ ត្រូវបានសមត្ថកិច្ចក្រុងភ្នំពេញចាប់ឃុំខ្លួនលើកទី១ នៅថ្ងៃទី៤ ខែមករា ឆ្នាំ២០២២ និងលើកទី២ នៅថ្ងៃទី២៦ ខែវិច្ឆិកា ឆ្នាំ២០២២ ដដែល ប៉ុន្តែរហូតដល់ថ្ងៃទី២៥ ខែឧសភា ឆ្នាំ២០២៣ ទើបតុលាការសម្រេចផ្ដន្ទាទោសឱ្យជាប់ពន្ធនាគាររយៈពេល ២ឆ្នាំ ពីបទ ញុះញង់បង្កភាពវឹកវរក្នុងសង្គម តាមមាត្រា៤៩៤ និង៤៩៥ នៃក្រមព្រហ្មទណ្ឌ៕
© 2024, . All rights reserved.