 អំពាវនាវឲ្យបណ្តាប្រទេសប្រជាធិបតេយ្យផ្សេងទៀតធ្វើតាមសហរដ្ឋអាមេរិក ដាក់ទណ្ឌកម្មលើបុគ្គល និងអង្គភាពដែលពាក់ព័ន្ធនឹងអំពើឧក្រិដ្ឋកម្មនៅកម្ពុជា ដើម្បីស្ដារលទ្ធិប្រជាធិបតេយ្យតាមរដ្ឋធម្មនុញ្ញនៅកម្ពុជាឡើងវិញ។){kind=link}
ចលនាខ្មែរដើម្បីប្រជាធិបតេយ្យ (KMD) អំពាវនាវឲ្យបណ្តាប្រទេសប្រជាធិបតេយ្យផ្សេងទៀតធ្វើតាមសហរដ្ឋអាមេរិក ដាក់ទណ្ឌកម្មលើបុគ្គល និងអង្គភាពដែលពាក់ព័ន្ធនឹងអំពើឧក្រិដ្ឋកម្មនៅកម្ពុជា ដើម្បីស្ដារលទ្ធិប្រជាធិបតេយ្យតាមរដ្ឋធម្មនុញ្ញនៅកម្ពុជាឡើងវិញ។
ចលនាខ្មែរដើម្បីប្រជាធិបតេយ្យ បានចេញសេចក្តីថ្លែងការណ៍មួយកាលពីថ្ងៃទី១៨ ខែកញ្ញា ដែលត្រូវបានផ្សព្វផ្សាយនៅថ្ងៃទី១៩ កញ្ញា នេះថា ការសម្រេចចិត្តរបស់ក្រសួងហិរញ្ញវត្ថុសហរដ្ឋអាមេរិក ក្នុងការដាក់ទណ្ឌកម្មលើឧកញ៉ា លី យ៉ុងផាត់ ដែលជាសមាជិកព្រឹទ្ធសភានៃរបបកម្ពុជា ក្នុងការជាប់ពាក់ព័ន្ធអំពើរំលោភសិទ្ធិមនុស្ស គឺជាសក្ខីភាពមួយដែលបញ្ជាក់ពីការប្ដេជ្ញាចិត្តឥតងាករេរបស់ប្រទេសប្រជាធិបតេយ្យក្នុងការលើកកម្ពស់សិទ្ធិមនុស្សនៅកម្ពុជា។
ប្រភពដដែលអះអាងថា ការដាក់ទណ្ឌកម្មលើលោក លី យ៉ុងផាត់ ដោយសហរដ្ឋអាមេរិក ជាការព្រមានដ៏មានឥទ្ធិពលដល់អ្នកដែលបន្តបំពានអំណាច និងកេងប្រវ័ញ្ចលើប្រជាជនខ្មែរ ហើយតាមរយៈវិធានការនេះ ក៏បង្ហាញពីជំហររបស់សហរដ្ឋអាមេរិកកាន់តែច្បាស់ថា និទ្ទណ្ឌភាពនឹងមិនត្រូវបានអត់ឱនទៀតឡើយ។
ចលនាខ្មែរដើម្បីប្រជាធិបតេយ្យ អំពាវនាវឱ្យប្រទេសប្រជាធិបតេយ្យនានា ដាក់ទណ្ឌកម្មប្រឆាំងរបបដឹកនាំនៅកម្ពុជាបន្តទៀត ដើម្បីឱ្យពួកគេទទួលខុសត្រូវចំពោះការលុបបំបាត់លទ្ធិប្រជាធិបតេយ្យ ការគាបសង្កត់សិទ្ធិមនុស្ស និងអំពើពុករលួយដែលអ្នកទាំងនោះបានប្រព្រឹត្តអស់រយៈពេលជាយូរមកហើយនោះ។
KMD បញ្ជាក់ថា ដំណាក់កាលនេះគឺជាជំហានដ៏សំខាន់មួយឆ្ពោះទៅមុខ ដើម្បីសម្រេចបាននូវគោលដៅរបស់ប្រជាជនខ្មែរសម្រាប់ជ័យជម្នះនៃលទ្ធិប្រជាធិបតេយ្យនៅកម្ពុជា ដែលនឹងជំរុញឱ្យអ្នកតស៊ូដើម្បីប្រជាធិបតេយ្យកាន់តែមានកម្លាំងចិត្តជួយប្រជាជនកម្ពុជា ដែលត្រូវគេជិះជាន់រហូតដល់ឧក្រិដ្ឋជនទាំងអស់ត្រូវបានដាក់ទណ្ឌកម្ម ហើយប្រជាពលរដ្ឋខ្មែរមានសេរីភាពពេញលេញឡើងវិញ។
កាលពីថ្ងៃទី១២ ខែកញ្ញា ឆ្នាំ២០២៤ ការិយាល័យគ្រប់គ្រងទ្រព្យសកម្មបរទេសនៃក្រសួងរតនាគារសហរដ្ឋអាមេរិក ប្រកាសដាក់ទណ្ឌកម្មបង្កកទ្រព្យសម្បត្តិសមាជិកព្រឹទ្ធសភាមកពីបក្សកាន់អំណាច លោក លី យ៉ុងផាត់ និងអាជីវកម្មរបស់លោកមួយចំនួនផងដែរ ដែលជាប់ពាក់ព័ន្ធនឹងការជួញដូរមនុស្ស ការលាងលុយកខ្វក់ ការបង្ខំឲ្យធ្វើពលកម្មដោយខុសច្បាប់ និងការបោកប្រាស់តាមបណ្ដាញអ៊ីនធឺណិតតាមច្បាប់ Executive Order ១៣៨១៨ របស់អាមេរិក។
ក្រៅពីឧកញ៉ា លី យ៉ុងផាត់ ក៏មានឧកញ៉ា និងមន្ត្រីគ្រាក់ៗមួយចំនួនទៀតដែរក្នុងជួររដ្ឋាភិបាលកម្ពុជា ដែលរងនូវទណ្ឌកម្មរបស់សហរដ្ឋអាមេរិកសម្រាប់ការរំលោភសិទ្ធិមនុស្ស និងបទឧក្រិដ្ឋផ្សេងៗដែលពួកគេបានប្រព្រឹត្តកន្លងមក។
ជាក់ស្តែង កាលពីថ្ងៃទី១០ ខែវិច្ឆិកា ឆ្នាំ២០២១ សហរដ្ឋអាមេរិកបានសម្រេចអនុវត្តច្បាប់ស្ដីពីការទទួលខុសត្រូវ និងសិទ្ធិមនុស្ស Global Magnitsky Human Rights Accountability Acts លេខ១៣៨១៣ ដើម្បីដាក់ទណ្ឌកម្មមន្ត្រីជាន់ខ្ពស់នៃក្រសួងការពារជាតិកម្ពុជាពីររូប គឺលោក ចៅ ភិរុណ និងលោក ទៀ វិញ ដែលជាសមាជិកបក្សកាន់អំណាចរបស់លោក ហ៊ុន សែន ឲ្យស្ថិតនៅក្នុងបញ្ជីខ្មៅ ដោយសារពាក់ព័ន្ធនឹងអំពើពុករលួយ។
គិតត្រឹមឆ្នាំ២០២៤ នេះ យ៉ាងហោចណាស់មានមន្ត្រីជាន់ខ្ពស់របស់រដ្ឋាភិបាលក្រុងភ្នំពេញចំនួន ៦នាក់ហើយ រួមទាំងឈ្មួញទុច្ចរិតដែលស្និទ្ធនឹងលោក ហ៊ុន សែន ផងដែរ ដែលបានទទួលរងទណ្ឌកម្មបង្កកទ្រព្យសម្បត្តិ និងរឹតត្បិតទិដ្ឋាការពីសហរដ្ឋអាមេរិក រួមមានលោក ចៅ ភិរុណ លោក ទៀ វិញ លោក ហ៊ីង ប៊ុនហៀង លោក គន់ គីម លោក ទ្រី ភាព និងលោក លី យ៉ុងផាត់ ដែលរងនូវទណ្ឌកម្មនាពេលថ្មីៗនេះ។
ជាងនេះទៀត សហរដ្ឋអាមេរិកក៏បានដាក់ទណ្ឌកម្មលើក្រុមហ៊ុនគ្រប់គ្រងដោយរដ្ឋអំណាចចិន ឈ្មោះ UDG ដែលកំពុងអនុវត្តគម្រោងអភិវឌ្ឍន៍នៅតំបន់តារាសាគរ ក្នុងខេត្តកោះកុង ផងដែរ៕