សហគមន៍ ស្ថាប័នសារព័ត៌មាន និងអង្គការសង្គមស៊ីវិលចំនួន ៤៦ អំពាវនាវឱ្យមានការទម្លាក់ចោលរាល់បទចោទប្រកាន់ និងដោះលែងលោក ម៉ិច ដារ៉ា ពីពន្ធនាគារជាបន្ទាន់ បន្ទាប់ពីសាលាដំបូងរាជធានីភ្នំពេញបានចោទប្រកាន់ពីបទ “ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម” និងបានបញ្ជូនទៅឃុំខ្លួនបណ្ដោះអាសន្ននៅពន្ធនាគារខេត្តកណ្តាល។
យោងតាមសេចក្តីប្រកាសព័ត៌មានរបស់អង្គការការពារសិទ្ធិមនុស្សលីកាដូ (LICADHO) ដែលចេញផ្សាយកាលពីថ្ងៃទី១ ខែតុលា ឆ្នាំ២០២៤ បានឲ្យដឹងថា សហគមន៍ ស្ថាប័នសារព័ត៌មាន និងអង្គការសង្គមស៊ីវិលដែលមានចំនួន ៤៦ អំពាវនាវឱ្យមានការដោះលែងអ្នកសារព័ត៌មាន លោក ម៉ិច ដារ៉ា ជាបន្ទាន់ ដែលលោកត្រូវបានសាលាដំបូងរាជធានីភ្នំពេញចោទប្រកាន់ពីបទ “ញុះញង់” និងត្រូវបានបញ្ជូនទៅឃុំខ្លួនបណ្ដោះអាសន្ននៅថ្ងៃទី១ ខែតុលា ឆ្នាំ២០២៤។
ប្រភពខាងលើអះអាងថា ពួកគេសូមអំពាវនាវឱ្យរាជរដ្ឋាភិបាលទម្លាក់ចោលរាល់បទចោទប្រកាន់ និងដោះលែងលោក ម៉ិច ដារ៉ា ពីពន្ធនាគារជាបន្ទាន់ ហើយបញ្ឈប់ការធ្វើទុក្ខបុកម្នេញអ្នកសារព័ត៌មាន និងស្ថាប័នសារព័ត៌មានទាំងអស់។
សេចក្តីប្រកាសព័ត៌មានដដែលអះអាងថា ការចាប់ខ្លួនលោក ម៉ិច ដារ៉ា គឺជាការព្យាយាមបំភិតបំភ័យ បំបិទសំឡេងរបស់គាត់ និងអ្នកសារព័ត៌មានដទៃទៀតនៅក្នុងប្រទេស ដែលគួរតែមានសេរីភាពផ្នែកសារព័ត៌មាន។
ព្រះរាជអាជ្ញាអមសាលាដំបូងរាជធានីភ្នំពេញបានសាកសួរលោក ម៉ិច ដារ៉ា កាលពីព្រឹកថ្ងៃអង្គារ សម្រេចចោទប្រកាន់លោក ម៉ិច ដារ៉ា ពីបទ “ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម” យោងតាមមាត្រា ៤៩៤ និង ៤៩៥ នៃក្រមព្រហ្មទណ្ឌ ចំពោះការបង្ហោះនៅលើបណ្ដាញសង្គមរបស់លោក ដែលលោកបានបង្ហោះកាលពីថ្ងៃទី២០ ទី២៣ ទី២៦ ទី២៨ និងទី២៩ ខែកញ្ញា ថ្មីៗនេះ។
អង្គការលីកាដូបានអះអាងថា ការចោទប្រកាន់នេះ អាចនាំឱ្យលោក ម៉ិច ដារ៉ា ជាប់ពន្ធនាគាររហូតដល់ ២ឆ្នាំ ដែលបញ្ជាក់យ៉ាងច្បាស់ពីការព្យាយាមបំបិទសំឡេងអ្នកសារព័ត៌មានដ៏លេចធ្លោម្នាក់នេះ ដែលជាអ្នកសារព័ត៌មានសកម្មម្នាក់ក្នុងការស្រាវជ្រាវ និងតែងតែអំពាវនាវឱ្យអាជ្ញាធរទទួលខុសត្រូវយកចិត្តទុកដាក់ក្នុងករណីរំលោភសិទ្ធិមនុស្សជាច្រើន។
ឆ្លើយតបទៅនឹងការលើកឡើងនេះ នៅរសៀលថ្ងៃទី២ ខែតុលា អ្នកនាំពាក្យក្រសួងព័ត៌មាន បានចេញសេចក្តីថ្លែងការណ៍មួយថា សំណុំរឿងចាប់ខ្លួន និងចោទប្រកាន់លើលោក ម៉ិច ដារ៉ា មិនពាក់ព័ន្ធនឹងវិជ្ជាជីវៈសារព័ត៌មានទេ ដូច្នេះកុំឱ្យភ្ជាប់ករណីនេះនឹងការអនុវត្តវិជ្ជាជីវៈសារព័ត៌មាន និងវាយតម្លៃខុស និងគ្មានមូលដ្ឋានលើវិស័យសារព័ត៌មាននៅកម្ពុជា។
ប្រភពដដែលអះអាងថា សម្រាប់ក្រសួងព័ត៌មាន ការប្រឌិតព័ត៌មានក្លែងក្លាយ និងបង្ហោះសារផ្សព្វផ្សាយដែលមានលក្ខណៈញុះញង់ បំភ្លៃការពិត មួលបង្កាច់ ប្រឌិតព័ត៌មានមិនពិតផ្សេងៗដែលធ្វើឡើងក្នុងចេតនាទុច្ចរិត ញុះញង់ បញ្ឆេះកំហឹងប្រជាពលរដ្ឋឱ្យមានការយល់ច្រឡំ មិនមែនជាសេរីភាពនៃការបញ្ចេញមតិឡើយ។
លោក ម៉ិច ដារ៉ា ត្រូវបានសមត្ថកិច្ចចាប់ខ្លួនកាលពីរសៀលថ្ងៃទី៣០ ខែកញ្ញា អំឡុងពេលដែលលោកធ្វើដំណើរត្រឡប់ពីកម្សាន្តនៅខេត្តព្រះសីហនុ ទៅភ្នំពេញវិញ។ កងកម្លាំងបានចាប់ខ្លួនលោក ម៉ិច ដារ៉ា នៅចំណុចបញ្ជរបង់លុយលើផ្លូវល្បឿនលឿនត្រង់ផ្លូវបំបែកស្រែអំបិល។
លោក ម៉ិច ដារ៉ា ដែលត្រូវបានអះអាងថាជាអ្នកសារព័ត៌មានឯករាជ្យ ដែលតែងតែរាយការណ៍ពីការជួញដូរមនុស្ស ការឆបោកតាមប្រព័ន្ធអនឡាញ និងបញ្ហារសើបមួយចំនួនទៀតនៅក្នុងកម្ពុជា។
កាលពីឆ្នាំ២០២៣ លោក ម៉ិច ដារ៉ា ទទួលបានពានរង្វាន់ពីក្រសួងការបរទេសសហរដ្ឋអាមេរិក ស្ដីពីការរាយការណ៍នៃអំពើជួញដូរមនុស្ស។ អតីតអ្នកសារព័ត៌មាន VOD រូបនេះធ្លាប់បម្រើការងារនៅសារព័ត៌មាន The Cambodia Daily និងសារព័ត៌មានភ្នំពេញប៉ុស្តិ៍។
ទោះជាយ៉ាងណាក៏ដោយ នាយកសារព័ត៌មានដើមអម្ពិល លោក សយ សុភាព បានសរសេរនៅលើគណនីហ្វេសប៊ុករបស់លោកកាលពីរាត្រីថ្ងៃអង្គារ ថា លោក ម៉ិច ដារ៉ា ជាអ្នកកាសែតរួមអាជីពដូចរូបលោកដែរក្នុងការបំពេញតួនាទីជាអ្នកសារព័ត៌មាន ហើយគ្រាន់តែជាអ្នកកាសែតដើម្បីជីវភាពតែប៉ុណ្ណោះ។
លោក សយ សុភាព បន្តថា ក្នុងនាមលោកជាប្រធានសមាគមអ្នកសារព័ត៌មានកម្ពុជា-ចិន លោកសូមអំពាវនាវរដ្ឋមន្ត្រីក្រសួងព័ត៌មាន លោក នេត្រ ភក្ដ្រា ជួយពិនិត្យតាមផ្លូវច្បាប់ស្ដីពីរបបសារព័ត៌មានឆ្នាំ១៩៩៥ ដើម្បីឱ្យលោក ម៉ិច ដារ៉ា មានសេរីភាពរួចផុតពីការចោទប្រកាន់របស់អាជ្ញាធរខេត្តព្រៃវែង ផង៕
© 2024, . All rights reserved.