ក្រុមអ្នកតស៊ូមតិកម្ពុជា ដែលហៅកាត់ថា CAT ចាត់ទុកការចាប់ខ្លួនអ្នកសារព័ត៌មានឯករាជ្យ លោក ម៉ិច ដារ៉ា ជាទង្វើបំពានច្បាប់ជាតិ និងច្បាប់អន្តរជាតិ និងជាសកម្មភាពថ្មីមួយទៀតនៃការបង្ក្រាបសេរីភាពសារព័ត៌មាននៅកម្ពុជា ដែលធ្វើឲ្យសេរីភាពសារព័ត៌មាននៅកម្ពុជាកាន់តែធ្លាក់ចុះធ្ងន់ធ្ងរ។
ក្រុមអ្នកតស៊ូមតិកម្ពុជា ចេញសេចក្តីថ្លែងការណ៍នៅថ្ងៃទី៧ តុលា នេះថា ការចាប់ខ្លួនអ្នកសារព័ត៌មានឯករាជ្យ លោក ម៉ិច ដារ៉ា គឺជាសកម្មភាពថ្មីមួយទៀតនៃការបង្ក្រាបសេរីភាពសារព័ត៌មាននៅកម្ពុជារបស់រដ្ឋាភិបាលក្រោមការដឹកនាំរបស់គណបក្សប្រជាជនកម្ពុជាសព្វថ្ងៃនេះ។
ប្រភពដដែលលើកឡើងថា CAT មានការព្រួយបារម្ភយ៉ាងខ្លាំងពីការធ្លាក់ចុះនៃសេរីភាពសារព័ត៌មាននៅកម្ពុជា ដែលកំពុងរងនូវយុទ្ធនាការបង្ក្រាបយ៉ាងស្រួចស្រាល់ពីរដ្ឋាភិបាលខ្មែរដែលកំពុងគ្រប់គ្រងដោយឪពុកកូន គឺលោក ហ៊ុន សែន និងលោក ហ៊ុន ម៉ាណែត នាពេលនេះ។
ក្រុមអ្នកតស៊ូមតិកម្ពុជា បញ្ជាក់ថា លោក ម៉ិច ដារ៉ា ជាអ្នកសារព័ត៌មានដែលទទួលបានពានរង្វាន់ TIP Hero ពីក្រសួងការបរទេសអាមេរិក ក្នុងការលាតត្រដាងអំពើឧក្រិដ្ឋជួញដូរមនុស្ស និងអំពើឆបោកតាមប្រព័ន្ធអនឡាញ ប៉ុន្តែលោកបែរជាត្រូវបានសមត្ថកិច្ចកម្ពុជាចាប់ខ្លួនក្រោយសហរដ្ឋអាមេរិកសម្រេចដាក់ទណ្ឌកម្មលើសមាជិកព្រឹទ្ធសភាគណបក្សប្រជាជនកម្ពុជា លោក លី យ៉ុងផាត់ ដែលជាប់ពាក់ព័ន្ធនឹងអំពើជួញដូរមនុស្ស និងអំពើឆបោកតាមអនឡាញទៅវិញ។
កាលពីថ្ងៃទី៣០ ខែកញ្ញា ឆ្នាំ២០២៤ លោក ម៉ិច ដារ៉ា ត្រូវបានសមត្ថកិច្ចចាប់ខ្លួនពីបទ “ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម” ចំពោះការបង្ហោះសារនៅលើបណ្ដាញសង្គមរបស់លោក ដែលទាក់ទិននឹងការកាយដីរំលាយភ្នំមួយនៅក្នុងស្រុកបាភ្នំ ខេត្តព្រៃវែង កាលពីចុងខែកញ្ញា កន្លងទៅថ្មីៗនេះ។
មួយថ្ងៃមុនពេលចាប់ខ្លួន លោក ម៉ិច ដារ៉ា បានបង្ហោះរូបភាពចំនួនពីរសន្លឹកជាប់គ្នា ដោយមួយបង្ហាញពីសកម្មភាពកាយយកថ្មភ្នំ ដោយសរសេរអក្សរបិទលើរូបភាពនោះថា «បាភ្នំឥឡូវ» និងមួយទៀតបង្ហាញពីជណ្ដើរថ្មឡើងទៅកាន់រមណីយដ្ឋានបាភ្នំ ដែលមានសរសេរអក្សរបិទលើរូបថា «បាភ្នំពីដើម» ដោយភ្ជាប់ជាមួយសំណេរលើរូបភាពទាំងនេះថា «ការអភិវឌ្ឍដ៏អស្ចារ្យ»។
យ៉ាងណាក៏ដោយ ស្ថានទូតសហរដ្ឋអាមេរិកប្រចាំនៅកម្ពុជា សហគមន៍ ស្ថាប័នសារព័ត៌មាន និងអង្គការសង្គមស៊ីវិល រួមទាំងអ្នកច្បាប់ជាច្រើន អំពាវនាវឱ្យមានការទម្លាក់ចោលរាល់បទចោទប្រកាន់ និងដោះលែងលោក ម៉ិច ដារ៉ា ពីពន្ធនាគារជាបន្ទាន់ និងចាត់ទុកចំណាត់ការរបស់រដ្ឋាភិបាលលើអ្នកសារព័ត៌មានឯករាជ្យរូបនេះ ថាមិនមែនជាការអនុវត្តច្បាប់ទេ តែជាការធ្វើទុក្ខបុកម្នេញលើសេរីភាពសារព័ត៌មានតែប៉ុណ្ណោះ។
អង្គការអ្នកសារព័ត៌មានគ្មានព្រំដែន (RSF) បានចេញផ្សាយពីសន្ទស្សន៍សេរីភាពសារព័ត៌មានសម្រាប់ឆ្នាំ២០២៣ និងឆ្នាំ២០២៤ កាលពីដើមខែសីហា ឆ្នាំ២០២៤ នេះ ដោយចាត់ចំណាត់ថ្នាក់ប្រទេសកម្ពុជាឱ្យជាប់លេខ១៥១ ដែលបង្ហាញថា សេរីភាពសារព័ត៌មានរបស់ប្រទេសកម្ពុជាដាំក្បាលចុះធ្ងន់ធ្ងរក្នុងរយៈពេល ២ឆ្នាំចុងក្រោយនេះ ដោយសារតែគេរកឃើញថា រដ្ឋាភិបាលកម្ពុជាបានវាយប្រហារ និងគាបសង្កត់លើសេរីភាពសារព័ត៌មានឯករាជ្យកាន់តែធ្ងន់ធ្ងរសព្វថ្ងៃនេះ៕
© 2024, . All rights reserved.