អ្នកស្រី Paetongtarn Shinawatra ដែលទើបចូលកាន់តំណែងនាយករដ្ឋមន្ត្រីថៃ បានជំរុញសមាគមអាស៊ានរួមគ្នាដើរតួនាទីជាគន្លឹះ និងសកម្ម ដើម្បីជួយបញ្ចប់សង្គ្រាមស៊ីវិលដែលកំពុងឆាបឆេះយ៉ាងខ្លាំងនៅប្រទេសភូមា។
ការថ្លែងរបស់អ្នកស្រី Paetongtarn ធ្វើឡើងនៅមុនជំនួបកំពូលនៃមេដឹកនាំអាស៊ាន ដែលនឹងធ្វើឡើងនៅក្នុងប្រទេសឡាវ ក្នុងសប្ដាហ៍នេះ ខណៈតំណាងរបបសឹកនៅភូមា ត្រូវបានអនុញ្ញាតឱ្យចូលរួមប្រជុំជាលើកដំបូងក្នុងរយៈពេល ៣ឆ្នាំក្រោយពីរដ្ឋប្រហារនៅខែកុម្ភៈ ឆ្នាំ២០២១។ នេះបើយោងតាមការចុះផ្សាយរបស់សារព័ត៌មាន បាងកកប៉ុស្តិ៍ នៅថ្ងៃទី៨ តុលា។
ចាប់តាំងពីការផ្ទុះរដ្ឋប្រហារនៅខែកុម្ភៈ ឆ្នាំ២០២១ ដែលពួកយោធាបានប្លន់អំណាចជាថ្មីទៀតពីរដ្ឋាភិបាលប្រជាធិបតេយ្យដឹកនាំដោយបក្សសម្ព័ន្ធជាតិដើម្បីប្រជាធិបតេយ្យ នៃក្រុមកម្លាំងអ្នកប្រជាធិបតេយ្យរបស់អ្នកស្រី អ៊ុងសាន ស៊ូជី ហើយវាបានទាញទៅរករលកបះបោរ និងសង្គ្រាមប្រយុទ្ធគ្នាឡើងវិញរវាងពួកយោធា និងកម្លាំងប្រឆាំង បាននាំឱ្យសហគមន៍អន្តរជាតិដាក់សម្ពាធពួកយោធាយ៉ាងខ្លាំង ដោយដកសិទ្ធិភូមា ចេញពីជំនួបកំពូលរបស់មេដឹកនាំអាស៊ាន។
តែឆ្នាំ២០២៤ នេះ ប្រទេសកុម្មុយនីស្តឡាវ ដែលជិតខាងភូមា គឺជាប្រធានអាស៊ានប្រចាំឆ្នាំ បានសម្របសម្រួលឱ្យរបបសឹកភូមា បញ្ជូនតំណាងរបស់ខ្លួនមកចូលរួមប្រជុំកំពូល។
នៅក្នុងព្រឹត្តិការណ៍មួយនៅក្រុងបាងកក អ្នកស្រី Paetongtarn សង្កត់ធ្ងន់ថា អាស៊ានត្រូវនាំសន្តិភាពត្រឡប់ទៅភូមា វិញ ឱ្យឆាប់កាន់តែល្អ។ ជាមួយគ្នានេះ អ្នកស្រីនាយករដ្ឋមន្ត្រីថៃ សន្យាថានឹងធ្វើការជាមួយប្រទេសម៉ាឡេស៊ី ដែលឆ្នាំ២០២៥ ម៉ាឡេស៊ី ជាប្រធានសមាគមអាស៊ាន ខណៈអ្នកស្រីជឿជាក់ថា ការប្រើប្រាស់វិធានការការទូតជាជម្រើសដ៏ល្អ តែត្រូវធ្វើជាមួយនឹងភាពសកម្មនៃតួនាទីរបស់សមាគម ដែលត្រូវតែមានកិច្ចព្រមព្រៀងដើម្បីបញ្ចប់សង្គ្រាមស៊ីវិលនៅភូមា។
កាលពីក្នុងខែមេសា លោក Srettha Thavisin ដែលកំពុងកាន់តំណែងនាយករដ្ឋមន្ត្រីនៅពេលនោះ បានថ្លែងថា ពួកយោធាភូមា ចាប់ផ្ដើមធ្លាក់ចុះខ្សោយក្នុងសមរភូមិប្រយុទ្ធជាមួយនឹងកម្លាំងប្រឆាំង ដែលអាចនាំទៅរកការចរចារវាងរបបសឹក និងតំណាងកម្លាំងប្រឆាំង។
អាស៊ាន បានដាក់ចុះនូវផែនការ ៥ចំណុច ដែលក្នុងនោះ របបសឹកត្រូវបើកឱ្យមានការចរចាជាមួយក្រុមប្រឆាំង ហើយត្រូវដោះលែងអ្នកទោសមនសិការទាំងអស់ ដោយរាប់ទាំងអតីតសមាជិកសភា ប្រធានាធិបតី និងអ្នកស្រី អ៊ុងសាន ស៊ូជី រដ្ឋមន្ត្រីការបរទេសភូមា ដែលជាមេដឹកនាំបក្សសម្ព័ន្ធជាតិដើម្បីប្រជាធិបតេយ្យ ជាបក្សដែលឈ្នះឆ្នោតនៅក្នុងការបោះឆ្នោតនៅក្នុងខែវិច្ឆិកា ឆ្នាំ២០២០។
តែបក្សរបស់ពួកយោធា ដែលជំទាស់ជ័យជម្នះរបស់បក្សអ្នកស្រី អ៊ុងសាន ស៊ូជី បានរុញឱ្យមានរដ្ឋប្រហារយោធាដែលជាការបិទបញ្ចប់របបប្រជាធិបតេយ្យទើបមានអាយុ ៥ឆ្នាំ។
រដ្ឋប្រហាររបស់ពួកយោធា បាននាំឱ្យប្រទេសដែលមានប្រជាជនជិត ៥៥លាននាក់នេះ ធ្លាក់ក្នុងរបបផ្ដាច់ការយោធាជាថ្មីម្ដងទៀត ខណៈប្រទេសនេះបានឆ្លងកាត់របបសឹកជាង ៦០ឆ្នាំមកហើយ។
តែយ៉ាងណា មេដឹកនាំរបបសឹក ឧត្ដមសេនីយ៍ មីន អ៊ុងឡាំង ដែលដំឡើងខ្លួនឯងជានាយករដ្ឋមន្ត្រី មិនត្រូវបានអនុញ្ញាតឱ្យមកចូលរួមប្រជុំកំពូលនៃមេដឹកនាំអាស៊ាននោះទេ។
យោងតាមប្រភពពីអ្នកការទូតអាស៊ានម្នាក់ បានប្រាប់ទីភ្នាក់ងារសារព័ត៌មាន AFP ថា ប្រទេសភូមា ដែលស្ថិតក្នុងចំណោមសមាជិកទាំង១០ របស់អាស៊ាន បានសម្រេចចិត្តបញ្ជូនមន្ត្រីជាន់ខ្ពស់ម្នាក់នៃក្រសួងការបរទេស ជាតំណាងរបស់ខ្លួន មកចូលរួមព្រឹត្តិការណ៍កិច្ចប្រជុំកំពូលរយៈពេល ៣ថ្ងៃនៅរដ្ឋធានីវៀងចន្ទន៍ នៃប្រទេសឡាវ ក្នុងសប្ដាហ៍នេះ។
លោក មីន អ៊ុងឡាំង មេរដ្ឋប្រហារ ធ្លាប់បានចូលរួមកិច្ចប្រជុំបន្ទាន់មួយរបស់អាស៊ានស្ដីពីវិបត្តិនៅភូមា កាលពីខែមេសា ឆ្នាំ២០២១ ប៉ុន្តែចាប់តាំងពីពេលនោះមក រាល់កិច្ចប្រជុំកំពូលមេដឹកនាំសមាគមអាស៊ាន ទោះបីតំណាងរបបសឹកក៏មិនត្រូវអនុញ្ញាតឡើយ។ តែលើកនេះជាលើកដំបូងហើយ។
ក្នុងស្ថានការណ៍សឹកដែលរបបសឹកមិនមានលទ្ធភាពវាយឈ្នះក្រុមកម្លាំងប្រឆាំង គេសង្កេតឃើញពួកយោធាចង់បក់ដៃទៅរកតុចរចាហើយ រហូតចង់ឱ្យមានការបោះឆ្នោតឡើងវិញទៀតផង។ ក្នុងស្ថានភាពនេះហើយមើលទៅដែលសមាគមអាស៊ានសាកល្បងឱ្យភូមា បញ្ជូនតំណាងរបស់ខ្លួនមកចូលរួមប្រជុំកំពូលអាស៊ាន។
អ្នកតាមដានភូមិសាស្ត្រនៅតំបន់អាស៊ាន មើលឃើញជំហរទន់ភ្លន់របស់របបសឹកពេលនេះក៏ដោយសារតែរដ្ឋាភិបាលភូមា កំពុងចុះខ្សោយកម្លាំងនៅសមរភូមិ រហូតចាញ់ប្រៀបក្រុមប្រឆាំងនៅលើសមរភូមិប្រយុទ្ធ។
តាមអ្នកសង្កេតការណ៍ ប្រទេសសមាជិកអាស៊ានព្យាយាមជួយរកដំណោះស្រាយឲ្យភូមា ក៏ព្រោះតែគេដឹងថាកម្លាំងប្រឆាំងដែលកំពុងមានប្រៀបនៅសមរភូមិ អាចរុញពួកយោធាចូលឱ្យខ្លួនទៅដោះស្រាយនៅចំពោះមុខអនាគតរបស់ខ្លួនកាន់តែបរាជ័យក្នុងការគ្រប់គ្រងអំណាចដែលមិនអាចរឹងមាំច្រើនឆ្នាំទៀតឡើយ៕
© 2024, . All rights reserved.