ឯកអគ្គរាជទូតអង់គ្លេស ជំរុញឱ្យរដ្ឋាភិបាលលោក ហ៊ុន ម៉ាណែត បញ្ឈប់ការរឹតត្បិតសិទ្ធិពលរដ្ឋ និងនយោបាយ ព្រមទាំងបើកលំហសេរីភាពនៃការបញ្ចេញមតិ និងសារព័ត៌មាន។
ការជំរុញនេះ ក្នុងជំនួបរវាងឯកអគ្គរាជទូតអង់គ្លេស លោក Dominic Williams ជាមួយប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី កាលពីថ្ងៃទី១០ ខែតុលា។
ក្នុងជំនួបនេះ លោក Dominic Williams បានស្វាគមន៍ចំពោះការចូលរួមរបស់កម្ពុជាក្នុងវេទិកាសិទ្ធិមនុស្សអន្តរជាតិ និងជាមួយការិយាល័យឧត្ដមស្នងការសិទ្ធិមនុស្ស និងអ្នករាយការណ៍ពិសេសស្ដីពីស្ថានភាពសិទ្ធិមនុស្សនៅកម្ពុជា។ លោកថា ចក្រភពអង់គ្លេស ប្ដេជ្ញាក្នុងការធ្វើការប្រកបដោយលក្ខណៈស្ថាបនា ក្នុងនាមជាមិត្ត និងដៃគូក្នុងការលើកកម្ពស់សិទ្ធិមនុស្សនៅកម្ពុជា។
ក្រៅពីប្ដេជ្ញាចិត្តនោះ ឯកអគ្គរាជទូតអង់គ្លេស លោក Dominic Williams បានលើកឡើងពីកង្វល់ទាក់ទងនឹងការរឹតត្បិតសិទ្ធិពលរដ្ឋ និងសិទ្ធិនយោបាយ ក៏ដូចជាសេរីភាពនៃការបញ្ចេញមតិ និងសេរីភាពសារព័ត៌មាន ដែលអាចរារាំងដល់ការចូលរួមប្រកបដោយបរិយាបន្នពីតួអង្គមិនមែនរដ្ឋាភិបាលក្នុងការអភិវឌ្ឍសង្គម។
ការលើកឡើងរបស់ឯកអគ្គរាជទូតអង់គ្លេស នេះ ធ្វើឡើងស្របពេលអ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា លោក វីទិត ម៊ុនតាប៊ន បានទាមទាររដ្ឋាភិបាលកម្ពុជាដឹកនាំដោយលោក ហ៊ុន ម៉ាណែត បញ្ឈប់ការការបង្ក្រាបសំឡេងប្រឆាំង និងបើកលំហសេរីភាពនៃការបញ្ចេញមតិឡើងវិញ។
ក្នុងសម័យប្រជុំនៅសម័យប្រជុំលើកទី៥៧ នៃក្រុមប្រឹក្សាសិទ្ធិមនុស្សនៅទីក្រុងហ្សឺណែវ ប្រទេសស្វីស កាលពីថ្ងៃទី០៧ ខែតុលា លោក វីទិត ម៊ុនតាប៊ន ក៏បានរិះគន់ការផ្ទេរអំណាចពីលោក ហ៊ុន សែន ទៅលោក ហ៊ុន ម៉ាណែត ជាកូន នៅខែកក្កដា ឆ្នាំ២០២៣ ថា ធ្វើឡើងតែនៅក្នុងក្រុមគ្រួសារ និងបក្ខពួក។ លោកចាត់ទុកការផ្ទេរអំណាចបែបនេះថាជាការបន្តក្តោបក្តាប់អំណាចដោយគ្មានលក្ខណៈប្រជាធិបតេយ្យ និងគ្មានតម្លាភាពនោះទេ៕
© 2024, . All rights reserved.