អ្នកឃ្លាំមើលលើកឡើងថា យុទ្ធនាការធ្វើបាតុកម្មប្រឆាំងនឹងគម្រោងអភិវឌ្ឍន៍ត្រីកោណ (CLV) ប្រឆាំងការចាប់ខ្លួនសកម្មជនបរិស្ថាន និងទាមទារឱ្យរដ្ឋាភិបាលគោរពកិច្ចព្រមព្រៀងសន្តិភាពទីក្រុងប៉ារីស របស់ពលរដ្ឋខ្មែរ គឺជាសញ្ញាវិជ្ជមានមួយប្រាប់ទៅកាន់ពិភពលោកពីឆន្ទៈពលរដ្ឋខ្មែរបញ្ឈប់ការគាំទ្ររដ្ឋាភិបាលត្រកូលហ៊ុនឱ្យដឹកនាំកម្ពុជាបន្តទៀត។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី១១ តុលា នេះថា ដើម្បីរក្សាអធិបតេយ្យជាតិ ដើម្បីលើកស្ទួយប្រជាធិបតេយ្យ ដើម្បីលើកកម្ពស់សិទ្ធិមនុស្ស និងដើម្បីសិទ្ធិជាមូលដ្ឋានរបស់ពលរដ្ឋដែលបានចែងក្នុងរដ្ឋធម្មនុញ្ញ ពលរដ្ឋខ្មែរដែលមានសិទ្ធិសេរីភាពពេញលេញនៅក្រៅស្រុក គ្មានជម្រើសផ្សេងណាល្អជាងការធ្វើបាតុកម្មប្រឆាំងនឹងរដ្ឋាភិបាលខ្មែរដែលកំពុងដើរខុសពីឆន្ទៈរបស់ពលរដ្ឋម្ចាស់ប្រទេសឡើយ។
លោក គឹម សុខ លើកឡើងថា ការចេញមុខខ្វល់ខ្វាយពីប្រទេសជាតិរបស់ខ្លួនបែបនេះ បង្ហាញពីសេចក្តីក្លាហាន ឧត្ដមគតិ មនសិការជាតិ និងសេចក្តីថ្លៃថ្នូរក្នុងនាមជាពូជសាសន៍ខ្ពង់ខ្ពស់បំផុតដែលមិនព្រមឱ្យទឹកដីរបស់ខ្លួនធ្លាក់ទៅក្រោមការគ្រប់គ្រងរបស់មនុស្សមួយក្រុម ដែលគប់គិតគ្នាបំផ្លាញទឹកដី ដែលជាហេតុធ្វើឱ្យជាតិខ្មែរអាប់ឱនកិត្តិយសលើឆាកអន្តរជាតិរាប់ទសវត្សរ៍កន្លងមកហើយនោះ។
អ្នកវិភាគរូបនេះបញ្ជក់ថា រដ្ឋាភិបាលខ្មែរដែលកំពុងគ្រប់គ្រងដោយត្រកូលហ៊ុនជាង ៤ទសវត្សរ៍មកនេះ បានធ្វើឱ្យកេរ្តិ៍ឈ្មោះ និងកិត្តិយសរបស់ជាតិខ្មែរធ្លាក់ចុះធ្ងន់ធ្ងរ ដោយរងនូវការជិះជាន់ ព្រមទាំងរំលោភបំពានពីបរទេសជិតខាងស្ទើរតែងើបមុខលែងរួចទៅហើយ។
លោក គឹម សុខ ព្រមានថា ពលរដ្ឋខ្មែរមិនត្រូវទុកឱ្យប្រទេសជាតិត្រូវបានគ្រប់គ្រងដោយវង្សត្រកូលមួយដូចប្រទេសកូរ៉េខាងជើង ដាច់ខាត ព្រោះសញ្ញាដំបូងដែលកម្ពុជារំកិលទៅរកការដឹកនាំដូចប្រទេសកុម្មុយនីស្តមួយនេះ គឺការផ្ទេរអំណាចពីឪពុកទៅកូន ហើយបន្ទាប់មកទៀត គឺជាផែនការដែលពួកគេនឹងក្តោបក្តាប់អំណាចផ្ដាច់មុខសម្រាប់តែក្រុមគ្រួសាររបស់ពួកគេតែម្តង។
ប្រជាពលរដ្ឋខ្មែរក្នុងទឹកដីសហរដ្ឋអាមេរិក នឹងផ្តើមធ្វើបាតុកម្មចាប់ពីថ្ងៃទី១១ រហូតដល់ថ្ងៃទី១៤ ខែតុលា នេះ ដើម្បីទាមទារឱ្យប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ពិនិត្យអំពីការអនុវត្តកិច្ចសន្យាអន្តរជាតិនេះឡើងវិញ ក្នុងគោលបំណងធានាឱ្យមានការបោះឆ្នោតដោយសេរី ត្រឹមត្រូវ និងយុត្តិធម៌ និងដើម្បីឱ្យជួយជំរុញរដ្ឋាភិបាលកម្ពុជាស្ដារលទ្ធិប្រជាធិបតេយ្យ ការគោរពសិទ្ធិមនុស្ស និងការលើកកម្ពស់នីតិរដ្ឋនៅកម្ពុជាឡើងវិញផងដែរ។
ចំណែកប្រជាពលរដ្ឋខ្មែរក្នុងប្រទេសកូរ៉េខាងត្បូង ក៏នឹងធ្វើមហាបាតុកម្មទាមទារឱ្យដោះលែងអ្នកដែលត្រូវបានរដ្ឋាភិបាលចាប់ខ្លួនជុំវិញការរិះគន់គម្រោងត្រីកោណអភិវឌ្ឍន៍ ដោះលែងអ្នកទោសនយោបាយ បើកលំហសិទ្ធិសេរីភាព និងស្ដារលទ្ធិប្រជាធិបតេយ្យនៅថ្ងៃទី១៣ ខែតុលា ឆ្នាំ២០២៤ នេះដែរ ដែលនឹងមានអ្នកចូលរួមប្រមាណ ៥ម៉ឺននាក់។
ជាងនេះទៀត ប្រជាពលរដ្ឋខ្មែរដែលរស់នៅប្រទេសជប៉ុន ក៏បានប្រកាសធ្វើបាតុកម្មនៅទីក្រុងតូក្យូ នៅថ្ងៃទី២០ ខែតុលា ឆ្នាំ២០២៤ នេះ ដើម្បីទាមទារឱ្យរដ្ឋាភិបាលកម្ពុជាគោរពកិច្ចព្រមព្រៀងសន្តិភាពទីក្រុងប៉ារីស បញ្ឈប់គម្រោងអភិវឌ្ឍន៍ត្រីកោណ និងទាមទារឱ្យដោះលែងអ្នកទោសនយោបាយ និងអ្នកទោសមនសិការទាំងអស់ផងដែរ។
ដោយឡែកប្រជាពលរដ្ឋខ្មែរដែលរស់នៅប្រទេសបារាំង ក៏បានប្រកាសធ្វើបាតុកម្មក្នុងទីក្រុងប៉ារីស នៅថ្ងៃទី២៦ ខែតុលា ឆ្នាំ២០២៤ នេះដែរ ដើម្បីទាមទារឱ្យរដ្ឋាភិបាលកម្ពុជាគោរពកិច្ចព្រមព្រៀងសន្តិភាពទីក្រុងប៉ារីស និងជាការរំលឹកខួប ៣៣ឆ្នាំនៃកិច្ចព្រមព្រៀងស្ដីពីសន្តិភាពនៅកម្ពុជាមួយនេះដែរ៕
© 2024, . All rights reserved.