អ្នកឃ្លាំមើលសង្គមអះអាងថា បើសម្ព័ន្ធភាពឆ្ពោះទៅអនាគតមិនរៀបចំបទបញ្ជាផ្ទៃក្នុង លក្ខន្តិកៈ និងគោលការណ៍សម្រាប់គណបក្សនយោបាយដែលបានចូលរួមឱ្យមានការឯកភាពគ្នាជាធ្លុងមួយទេ នោះសម្ព័ន្ធភាពនេះក៏អាចប្រឈមនឹងការបែកបាក់នៅពេលដែលពួកគេបែងចែកតំណែងគ្នាមិនត្រូវដែរ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី១៥ តុលា នេះថា ការបែងចែកតួនាទីដឹកនាំសម្ព័ន្ធភាពនេះអាចនឹងបង្កជាកត្តាចម្បងដែលនាំឱ្យសម្ព័ន្ធភាពនេះបែកបាក់សាមគ្គីគ្នា ព្រោះចាប់តាំងពីសម្ព័ន្ធភាពនេះបង្កើតមក គេនៅមិនទាន់ឃើញមានការបែងចែកតួនាទីដឹកនាំសម្រាប់គណបក្សដែលបានចូលរួមចងសម្ព័ន្ធនេះនៅឡើយទេ។
លោក សេក សុជាតិ លើកឡើងថា រហូតមកដល់ពេលនេះ លោកមិនទាន់ឃើញសម្ព័ន្ធភាពឆ្ពោះទៅអនាគតបង្ហាញគោលការណ៍រួមនៃការរួបរួមរបស់គណបក្សដែលបានរួបរួមសម្ព័ន្ធនេះនៅឡើយទេ ខណៈផែនការនយោបាយរយៈពេលខ្លី និងរយៈពេលមធ្យមសម្រាប់ទាក់ទាញការគាំទ្រពីប្រជាពលរដ្ឋក្នុងការចូលរួមការបោះឆ្នោតឆ្នាំ២០២៧ និងឆ្នាំ២០២៨ ខាងមុខនេះ ក៏នៅមិនទាន់ឃើញសម្ព័ន្ធភាពនេះដាក់ចេញនោះដែរ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា បើសម្ព័ន្ធភាពនេះបែកបាក់ វាក៏ជាការបរាជ័យមួយក្នុងដំណើរនៃការប្រមូលកម្លាំងអ្នកប្រជាធិបតេយ្យដែរ ស្របពេលដែលសម្ព័ន្ធភាពរវាងបក្សក្រៅរដ្ឋាភិបាលខ្លះជាមួយនឹងគណបក្សប្រជាជនកម្ពុជា ហាក់កំពុងឯកភាពគ្នាជាធ្លុងមួយក្រោមគោលការណ៍ដែលពួកគេបានដាក់ចេញកន្លងមក។
លោក សេក សុជាតិ គូសបញ្ជាក់ថា ជម្រើសមានតែមួយគត់សម្រាប់សម្ព័ន្ធភាពឆ្ពោះទៅអនាគត ដើម្បីធានាភាពរឹងមាំយូរអង្វែង គឺត្រូវតែអនុវត្តគោលការណ៍ប្រជាធិបតេយ្យផ្ទៃក្នុងរបស់ខ្លួនក្រោមលក្ខខណ្ឌរួមមួយ ដែលគណបក្សក្នុងសម្ព័ន្ធភាពនេះឯកភាពទាំងអស់គ្នា ដើម្បីជ្រើសរើសអ្នកមានសមត្ថភាពដឹកនាំពិតប្រាកដ ទោះគណបក្ស ឬបុគ្គលដែលត្រូវបានជ្រើសរើសនោះមិនធ្លាប់ល្បីល្បាញ ឬទទួលបានការគាំទ្រពីមុនមកក៏ដោយ។
កាលពីថ្ងៃទី១៣ ខែតុលា ឆ្នាំ២០២៤ បក្សកម្ពុជានិយម បានចូលរួមក្នុងសម្ព័ន្ធភាពឆ្ពោះទៅអនាគត ដែលធ្វើឱ្យសម្ព័ន្ធភាពនេះកើនគណបក្សមួយបន្ថែមទៀត ដែលគិតជាសរុប គឺមានចំនួន ៥គណបក្សហើយនៅពេលនេះ គឺគណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន គណបក្សកែទម្រង់កម្ពុជា និងគណបក្សកម្ពុជានិយម។
ជុំវិញបញ្ហានេះ អតីតមន្ត្រីខុទ្ទកាល័យប្រធានគណបក្សសង្គ្រោះជាតិ លោក មុត ចន្ថា សរសេរលើទំព័រហ្វេសប៊ុករបស់ខ្លួនកាលពីថ្ងៃទី១៣ តុលា នេះថា ការបង្រួបបង្រួមរបស់សម្ព័ន្ធភាពនេះ គឺដើម្បីរង់ចាំការកម្ទេចឱ្យដូចផេះប៉ុណ្ណោះ ព្រោះនៅក្នុងបរិបទនយោបាយនៅកម្ពុជាសព្វថ្ងៃនេះ ការបែកបាក់កម្លាំងប្រជាធិបតេយ្យកើតឡើងដោយសារបក្សកាន់អំណាចប្រើគ្រប់ឧបាយកលដើម្បីបំបែកបំបាក់ និងកម្ទេច។
លោក មុត ចន្ថា បញ្ជាក់ថា ការបែកបាក់នោះក៏បណ្តាលមកពីកម្លាំងប្រជាធិបតេយ្យមិនស្មោះត្រង់នឹងគ្នាដែរ ជាក់ស្តែងគឺគណបក្សភ្លើងទៀន តែម្តង។
ទាក់ទិននឹងបញ្ហានេះ កាលពីអំឡុងខែមិថុនា ឆ្នាំ២០២៤ មេដឹកនាំបក្សកាន់អំណាច លោក ហ៊ុន សែន បានបញ្ជាទៅកាន់សមាជិកបក្សកាន់អំណាចគ្រប់រាជធានី-ខេត្ត ឱ្យនាំគ្នាប្រើយុទ្ធសាស្ត្របំផ្លាញក្រុមប្រឆាំងឱ្យអស់នៅមុនការបោះឆ្នោត៕
© 2024, . All rights reserved.