អ្នកតាមដានការអភិវឌ្ឍសង្គម លើកឡើងថា ចំនួនលុយដែលរដ្ឋាភិបាលបានបោះពុម្ពប្រមាណជាង ១ពាន់លានដុល្លារអាមេរិក គឺមានតួលេខប្រហាក់ប្រហែលគ្នានឹងចំនួនលុយដែលរដ្ឋាភិបាលកំពុងខ្វះខាតសម្រាប់គម្រោងចំណាយក្នុងឆ្នាំ២០២៤។
អ្នកស្រាវជ្រាវអំពីការអភិវឌ្ឍសង្គម បណ្ឌិត សេង សារី លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី១៧ តុលា នេះថា តាមតួលេខដែលស៊ីសង្វាក់គ្នានេះ អាចសន្និដ្ឋានបានថារដ្ឋាភិបាលកំពុងខ្វះលុយសម្រាប់បង្គ្រប់ការចំណាយរបស់ខ្លួននៅពេលនេះ ព្រោះបើផ្អែកលើទំហំសេដ្ឋកិច្ចរបស់កម្ពុជាសព្វថ្ងៃនេះ រដ្ឋាភិបាលកម្ពុជាអាចរកចំណូលបានប្រមាណជា ៦ ទៅ ៧ពាន់លានដុល្លារអាមេរិកប៉ុណ្ណោះក្នុង ១ឆ្នាំ។
ប្រភពដដែលអះអាងថា រូបិយប័ណ្ណប្រាក់រៀលដែលកំពុងចរាចរទ្រទ្រង់សេដ្ឋកិច្ចកម្ពុជាបច្ចុប្បន្ននេះមានចំនួន ១៤ទ្រីលានរៀល ឬ ១៤ពាន់ពាន់លានរៀល ដែលស្មើនឹងប្រមាណជា ៣៥០០លានដុល្លារអាមេរិក ក្នុងទំហំសេដ្ឋកិច្ចទាំងមូលរបស់កម្ពុជាប្រមាណជា ៣៥ពាន់លានដុល្លារអាមេរិក។
លោកថា ចំពោះការបកស្រាយរបស់ធនាគារជាតិនៃកម្ពុជា ដែលថាការបោះពុម្ពក្រដាសប្រាក់ថ្មីនេះ ដើម្បីជំនួសក្រដាសប្រាក់ចាស់ ទក់ រហែក ដែលបានដកចេញបញ្ឈប់ការប្រើប្រាស់នោះ គឺជាហេតុផលមិនសមទំនងឡើយ ព្រោះគ្មានរបាយការណ៍ណាមួយបានបញ្ជាក់ពីក្រដាសប្រាក់ចាស់ ទក់ រហែកនោះទេ។
ជាងនេះទៀត កម្ពុជាក៏អាចបោះពុម្ពលុយសម្រាប់ប្រើប្រាស់ដូចបណ្តាប្រទេសផ្សេងៗដែរ ប៉ុន្តែកម្រិតដែលកម្ពុជាត្រូវបោះពុម្ព គឺត្រូវធ្វើឡើងក្នុងកម្រិតស្តង់ដាអន្តរជាតិប្រមាណជា ១០% នៃលុយរបស់ខ្លួនដែលកំពុងចរាចរប៉ុណ្ណោះ គឺប្រមាណជា ៣០០ ទៅ ៤០០រយលានដុល្លារអាមេរិក។
បណ្ឌិត សេង សារី លើកឡើងថា ការបោះពុម្ពក្រដាសប្រាក់ប្រភេទថ្មីនេះ ក៏អាចដោយសារកម្ពុជាខ្ចីលុយបរទេសដើម្បីបង្គ្រប់ការចំណាយរបស់ខ្លួនសម្រាប់ឆ្នាំ២០២៤ នេះលែងបានដែរ ជាពិសេសកម្ចីពីរដ្ឋាភិបាលចិន ខណៈចិន ក៏កំពុងធ្លាក់ចុះសេដ្ឋកិច្ចដែរនៅពេលនេះ។
រដ្ឋាភិបាលកម្ពុជា កាលពីថ្ងៃទី១៦ ខែតុលា បានចេញអនុក្រឹត្យអនុញ្ញាតឲ្យធ្វើចរាចរ និងប្រើប្រាស់ក្រដាសប្រាក់ប្រភេទថ្មី ២០ម៉ឺនរៀល (២០០០០០រៀល) ចំនួន ២០លានសន្លឹក។
នាយកវិទ្យុផ្សាយសំឡេងប្រជាធិបតេយ្យ វីអូឌី លោក ប៉ា ងួនទៀង បានលើកឡើងក្នុងកម្មវិធីនេះដែរថា ជុំវិញការបោះពុម្ពក្រដាសប្រាក់នេះ ជារឿងគួរឱ្យសង្ស័យបំផុតដែលថារដ្ឋាភិបាលកំពុងខ្វះលុយ។ លោកថា បើពិនិត្យលើផែនការរបស់រដ្ឋាភិបាលថ្មីនេះនាពេលកន្លងមក ក៏បង្ហាញពីចំណុចដែលខ្វះខាតថវិកាដែរ ដូចជា ការប្រកាសរឹតបន្តឹងការអភិវឌ្ឍថ្នាក់ក្រោមជាតិកាលពីអំឡុងខែឧសភា កន្លងទៅ ជាដើម។
លោកថា នៅពេលដែលរូបិយប័ណ្ណប្រាក់រៀលធ្លាក់ចុះជាងពេលបច្ចុប្បន្ន ឬហៅម្យ៉ាងទៀតថា ប្រាក់រៀលហើម ដូចជា ១ដុល្លារអាមេរិកស្មើនឹងប្រាក់រៀលចាប់ពី ៤២០០រៀលឡើងទៅនោះ គឺបញ្ជាក់ច្បាស់ហើយថា រដ្ឋាភិបាលពិតជាខ្វះលុយមែន ទើបបោះពុម្ពក្រដាសប្រាក់ ២សែនរៀលនេះ។
អ្នកតាមដានសង្គមដាក់ការសង្ស័យថា រដ្ឋាភិបាលកម្ពុជាកំពុងខ្វះលុយទ្រទ្រង់ដំណើរការនៅចុងឆ្នាំ២០២៤ នេះ ជាពិសេសគឺប្រាក់បៀវត្សសម្រាប់បើកឱ្យមន្ត្រីរាជការតែម្តង ព្រោះរដ្ឋាភិបាលអាចប្រមូលលុយតាមរយៈនៃការបង់ពន្ធជាដើម បានត្រឹមតែប្រមាណជា ៨ពាន់លានដុល្លារអាមេរិកប៉ុណ្ណោះ ខណៈច្បាប់ថវិកាជាតិឆ្នាំ២០២៤ ដែលរដ្ឋសភាបានអនុម័ត គឺប្រមាណជា ៩ពាន់លានដុល្លារអាមេរិកឯណោះ៕
© 2024, . All rights reserved.