គណៈកម្មាធិការជាតិរៀបចំការបោះឆ្នោត (គ.ជ.ប) អះអាងថា អ្នកបោះឆ្នោតចំនួនជាង ១១ម៉ឺននាក់នឹងត្រូវលុបចេញពីបញ្ជីបោះឆ្នោត ដោយមូលហេតុមានការផ្លាស់ទីតាំង ស្លាប់ ឈ្មោះស្ទួន និងការដកហូតសិទ្ធិបោះឆ្នោតផ្អែកតាមឯកសារសំអាងត្រឹមត្រូវ និងច្បាស់លាស់។
សេចក្ដីប្រកាសព័ត៌មានរបស់ គ.ជ.ប ចេញថ្ងៃទី២២ តុលា បានបញ្ជាក់ថា អ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោត ដោយមូលហេតុផ្លាស់ចេញ ស្លាប់ ឈ្មោះស្ទួន ឬការដកសិទ្ធិបោះឆ្នោតផ្អែកតាមឯកសារសំអាងត្រឹមត្រូវ និងច្បាស់លាស់មានចំនួនសរុប ១១ម៉ឺន ១ពាន់ ប្រាំបីរយប៉ែតសិបប្រាំបួននាក់ (១១១៨៨៩នាក់)។
នៅក្នុងកិច្ចប្រជុំស្ដីពីការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោត ដែលនឹងត្រូវលុបចេញពីបញ្ជីបោះឆ្នោតនៅតាមឃុំ សង្កាត់ នាថ្ងៃទី២២ ខែតុលា លោក យិច សមិទ្ធិ សមាជិកគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា ការបិទបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីអ្នកបោះឆ្នោតនៅឆ្នាំ២០២៤ នេះ នឹងត្រូវធ្វើឡើងនៅថ្ងៃពុធ ទី២៣ ខែតុលា ឆ្នាំ២០២៤ នៅគ្រប់ឃុំ-សង្កាត់ទូទាំងប្រទេស។
ប្រភពខាងលើបញ្ជាក់ថា គ្រប់គ្នាអាចធ្វើបណ្តឹងតវ៉ាជុំវិញបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោត ទៅកាន់ក្រុមប្រឹក្សាឃុំ-សង្កាត់ក្នុងរយៈពេល ៥ថ្ងៃយ៉ាងយូរ បន្ទាប់ពីការបិទផ្សាយបញ្ជីទាំងនោះ។
គ.ជ.ប ក៏បានបង្ហាញដែរពីចំនួនអ្នកបោះឆ្នោតសរុបដែលមាននៅក្នុងបញ្ជីបច្ចុប្បន្ន គឺមានប្រាំបួនលាន ប្រាំបួនសែន ប្រាំបួនម៉ឺន ពីរពាន់ បួនរយសែសិបមួយនាក់ (៩៩៩២៤២១នាក់) ក្នុងនោះស្ត្រីមានចំនួនជាង ៥សែននាក់ (៥៣០៤៨៥៥នាក់) និងមានការិយាល័យបោះឆ្នោតសរុបជាង ២ម៉ឺន ៤ពាន់ការិយាល័យនៅទូទាំងប្រទេស។
ក្នុងឆ្នាំ២០២៤ នេះ អ្នកចុះឈ្មោះបោះឆ្នោតថ្មីមាន ១សែន ៧ម៉ឺននាក់ (១៧៧៥៦៨នាក់) ដែលស្មើនឹង ៧៩% នៃចំនួនពលរដ្ឋ ២សែន ២ម៉ឺន ៤ពាន់ ១៥៦នាក់ ដែល គ.ជ.ប ប៉ាន់ស្មានទុកថាគ្រប់អាយុចុះឈ្មោះបោះឆ្នោត៕
© 2024, . All rights reserved.