មេដឹកនាំកំពូលអ៊ីរ៉ង់ លោក Ayatollah Ali Khamenei បានបញ្ជាឱ្យថ្នាក់ដឹកនាំរបស់លោក រៀបចំឆ្លើយតបល្អបំផុតទៅនឹងការវាយប្រហារតាមអាកាសរបស់អ៊ីស្រាអែល កាលពីថ្ងៃសៅរ៍កន្លងទៅនេះ។
តាមទីភ្នាក់ងារសារព័ត៌មានផ្លូវការរបស់អ៊ីរ៉ង់ IRNA លោក Ali Khamenei បាននិយាយថា ការវាយប្រហាររបស់អ៊ីស្រាអែល មិនគួរត្រូវបានមើលរំលង ឬបំផ្លើសអ្វីឡើយ ប៉ុន្តែលោកអួតថា អ៊ីរ៉ង់ ត្រូវតែបង្ហាញអំណាចរបស់ខ្លួនដល់អ៊ីស្រាអែល បើអ៊ីរ៉ង់ មិនឆ្លើយតប គឺអ៊ីរ៉ង់ មិនអាចការពារសម្ព័ន្ធភាពរបស់ខ្លួននៅក្នុងតំបន់បានឡើយ។
កាលពីថ្ងៃទី១ តុលា អ៊ីរ៉ង់បានវាយប្រហារដោយមីស៊ីលបាលិស្ទីកជាង ២០០គ្រាប់ទៅលើអ៊ីស្រាអែល ដែលជាការវាយប្រហារសងសឹកលើកទី២ របស់ទីក្រុងតេហេរ៉ង់។ ភ្លាមៗ អ៊ីស្រាអែលសច្ចាវាយសងសឹកលើអ៊ីរ៉ង់ ឱ្យខាងតែបាន។
កាលពីពេលទៀបភ្លឺនៅថ្ងៃទី២៦ ខែតុលា អ៊ីស្រាអែលបានបើកការវាយប្រហារសងសឹកប្រឆាំងនឹងអ៊ីរ៉ង់ ដោយបានកំណត់គោលដៅទៅលើទីតាំងផលិតមីស៊ីល និងទីតាំងយោធាផ្សេងទៀតនៅក្នុងប្រទេសអ៊ីរ៉ង់។
តាមការចុះផ្សាយរបស់សារព័ត៌មាន The Times of Israel ការវាយប្រហារដោយយន្តហោះចម្បាំងរបស់អ៊ីស្រាអែល រាប់សិបគ្រឿង បានហោះវាយទៅលើគោលដៅយោធាអ៊ីរ៉ង់ ដល់ទៅជាង ២០ទីតាំង ក្នុងនោះមានទីតាំងស្តុកគ្រាប់មីស៊ីល ទីតាំងស្តុកដ្រូន ទីតាំងផលិតមីស៊ីល ទីតាំងប្រព័ន្ធការពារដែនអាកាស S-300 និងការវាយប្រហារទៅលើមូលដ្ឋានទ័ពអ៊ីរ៉ង់ នៅកណ្ដាលក្រុងតេហេរ៉ង់ ទៀតផង។
បើតាមសារព័ត៌មាន Jerusalem Post អ៊ីស្រាអែលបញ្ចេញយន្តហោះចម្បាំងវាយប្រហារលើអ៊ីរ៉ង់ ១០០គ្រឿង ដោយប្រតិបត្តិការ ៣លើក ដែលក្នុងមួយលើក យន្តហោះជាង ៣០គ្រឿងហោះវាយប្រហារ។
ជាមួយគ្នានេះ យន្តហោះស៊ើបការណ៍ចំនួន ១០គ្រឿង ក៏បានហោះជួយអន្តរាគមន៍យន្តហោះចម្បាំងផងដែរ។ តាមប្រភពដដែលនេះ អ៊ីស្រាអែលបញ្ចេញយន្តហោះ ៣ក្រុមវាយប្រហារអ៊ីរ៉ង់ មានយន្តហោះចម្បាំង F-35, F-16- និង F-15។
ចំពោះលំហអាកាសដែលអ៊ីស្រាអែល ប្រើប្រាស់វាយប្រហារអ៊ីរ៉ង់ មានលំហអាកាសប្រទេសអ៊ីរ៉ាក់ ប្រទេសហ្សកដានី និងលំហអាកាសសមុទ្រនៅតំបន់មជ្ឈិមបូព៌ា។
អ្នកជំនាញថា អ៊ីស្រាអែលជ្រើសរើសការវាយសងសឹកលើអ៊ីរ៉ង់ មានសភាពធ្ងន់ធ្ងរ ដែលយន្តហោះ ១០០គ្រឿងហោះវាយប្រហារចំនួន ៣លើក បានត្រឡប់ទៅអ៊ីស្រាអែលវិញដោយសុវត្ថិភាព ជាការបញ្ជាក់ថាប្រព័ន្ធការពារដែនអាកាសរបស់អ៊ីរ៉ង់ ពុំមានប្រសិទ្ធភាពក្នុងការបាញ់ទម្លាក់យន្តហោះចម្បាំងរបស់អ៊ីស្រាអែល ឡើយ។
ឆ្លើយតបចំពោះទង្វើរបស់អ៊ីស្រាអែល មិនថាឡើយមេដឹកនាំកំពូលអ៊ីរ៉ង់ លោក Ayatollah Ali Khamenei ដែលប្រតិកម្មដោយបញ្ជាឱ្យរៀបចំសងសឹក គេសង្កេតឃើញថ្នាក់ដឹកនាំអ៊ីរ៉ង់ជាន់ខ្ពស់ជាច្រើន ក្នុងនោះមានទាំងប្រធានាធិបតីដែលជាមេដឹកនាំទី២ នៃរបបសាធារណរដ្ឋឥស្លាមអ៊ីរ៉ង់ ក៏បានប្រតិកម្មដែរ។
លោក Masoud Pezeshkian បាននិយាយថា អ៊ីរ៉ង់ត្រូវតែសងសឹក ប៉ុន្តែលោកថាអ៊ីរ៉ង់មិនចង់ធ្វើសង្គ្រាមជាមួយអ៊ីស្រាអែល នោះទេ។
លោកប្រធានាធិបតី Pezeshkian បានអះអាងថា អ៊ីរ៉ង់បានត្រៀមជាស្រេចដើម្បីចាត់វិធានការឆ្លើយតបឱ្យបានសមស្របទៅនឹងការវាយប្រហាររបស់អ៊ីស្រាអែល។ ថ្លែងទៅកាន់កិច្ចប្រជុំគណៈរដ្ឋមន្ត្រី លោក Pezeshkian បានបញ្ជាក់ថា អ៊ីរ៉ង់មិនចង់ធ្វើសង្គ្រាមឡើយ ប៉ុន្តែក្រុងតេហេរ៉ង់ ត្រូវការពារសិទ្ធិរបស់ប្រជាជាតិ និងប្រទេសរបស់ខ្លួន។
លោកបន្ថែមថា អ៊ីរ៉ង់នឹងធ្វើការឆ្លើយតបយ៉ាងសមស្របមួយទៅនឹងការឈ្លានពានរបស់របប Zionist នៃប្រទេសអ៊ីស្រាអែល។
ជាមួយគ្នានេះ រដ្ឋមន្ត្រីការបរទេសអ៊ីរ៉ង់ លោក Abbas Araghchi បានថ្លែងថា គ្មានឡើយព្រំដែនកំណត់ចំពោះការប្ដេជ្ញាចិត្តរបស់អ៊ីរ៉ង់ ដើម្បីការពារខ្លួន ព្រោះអ៊ីរ៉ង់ មានសិទ្ធិ និងកាតព្វកិច្ចក្នុងការការពារខ្លួនឯងស្របតាមច្បាប់អន្តរជាតិ។ លោក Araqchi បានថ្កោលទោសសកម្មភាពរបស់អ៊ីស្រាអែល ថាជាការគំរាមកំហែងដល់សន្តិភាព និងសន្តិសុខអន្តរជាតិ។
នៅក្នុងលិខិតមួយទៅកាន់ក្រុមប្រឹក្សាសន្តិសុខអង្គការសហប្រជាជាតិ ប្រមុខការទូតអ៊ីរ៉ង់ ទាមទារថា សកម្មភាពរបស់អ៊ីស្រាអែល ជាការគំរាមកំហែងយ៉ាងធ្ងន់ធ្ងរដល់សន្តិភាព និងសន្តិសុខអន្តរជាតិ និងធ្វើឱ្យមានអស្ថិរភាពដល់តំបន់ដែលផុយស្រួយរួចទៅរកសង្គ្រាម។
លោក Araqchi ទាមទារឱ្យក្រុមប្រឹក្សាសន្តិសុខរួមគ្នាថ្កោលទោសអ៊ីស្រាអែល។
ក្រុមអ្នកការទូតបាននិយាយថា ក្រុមប្រឹក្សាសន្តិសុខរំពឹងថានឹងជួបប្រជុំគ្នានៅថ្ងៃចន្ទ ទី២៨ តុលា នេះ ដើម្បីពិភាក្សាអំពីការវាយប្រហាររបស់អ៊ីស្រាអែល ទៅលើអ៊ីរ៉ង់។
ក្រោយការវាយសងសឹកនេះ អ៊ីស្រាអែលបានព្រមានអ៊ីរ៉ង់ ថានឹងត្រូវលះបង់តម្លៃមួយយ៉ាងធ្ងន់ធ្ងរ ប្រសិនបើហ៊ានវាយប្រហារសងសឹកលើអ៊ីស្រាអែល។
អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឱ្យភាគីទាំងអស់បញ្ឈប់អំពើហិង្សា និងងាកមករកការចរចា។
ចំណែកសហរដ្ឋអាមេរិក អាល្លឺម៉ង់ ចក្រភពអង់គ្លេស សហភាពអឺរ៉ុប បានទទូចឱ្យអ៊ីរ៉ង់ កុំសងសឹកអ៊ីស្រាអែល ដោយចាត់ទុកការវាយសងសឹករបស់អ៊ីស្រាអែល ជាតុល្យភាពឆ្លើយតបការវាយប្រហាររបស់អ៊ីរ៉ង់ លើអ៊ីស្រាអែល ចំនួនពីរលើកមកហើយ៕
© 2024, . All rights reserved.