អតីតមេដឹកនាំបក្សប្រឆាំង លោក សម រង្ស៊ី ប្រកាសបង្កើតរដ្ឋាភិបាលតំណាងឱ្យឆន្ទៈពលរដ្ឋខ្មែរដោយពិតប្រាកដមួយ ចេញពីចលនាតស៊ូនៅក្រៅស្រុក ដើម្បីដណ្តើមប្រទេសកម្ពុជាពីរបបដឹកនាំត្រកូលហ៊ុន យកមកប្រគល់ជូនប្រជារាស្ត្រខ្មែរវិញ។
លោក សម រង្ស៊ី សរសេររលើទំព័រហ្វេសប៊ុកខ្លួននៅថ្ងៃទី២៩ តុលា នេះថា ចលនាជាតិខ្មែរតស៊ូ នឹងឈានទៅបង្កើតរដ្ឋាភិបាលមួយពេញលក្ខណៈនៅក្រៅប្រទេសជាបណ្ដោះអាសន្ន ដើម្បីឈរជាតំណាងឱ្យឆន្ទៈពិតប្រាកដរបស់ប្រជារាស្ត្រខ្មែរស្រឡាញ់ជាតិ សេរីភាព និងយុត្តិធម៌ ដែលកំពុងរងការគាបសង្កត់ក្រោមការដឹកនាំក្នុងរបបត្រកូលហ៊ុនសព្វថ្ងៃនេះ។
លោក សម រង្ស៊ី លើកឡើងថា បេសកកម្មជាប្រវត្តិសាស្ត្រនៃចលនាជាតិខ្មែរតស៊ូ គឺត្រូវតែដណ្តើមប្រទេសកម្ពុជាពីរបបដឹកនាំត្រកូលហ៊ុន យកមកប្រគល់សងជូនប្រជារាស្ត្រខ្មែរវិញ ដែលជាម្ចាស់ទឹកម្ចាស់ដីតែមួយគត់ ដោយមានការចូលរួមពីប្រជាពលរដ្ឋខ្មែរពីគ្រប់ទិសទីដែលជាអ្នកស្នេហាជាតិ ស្នេហាប្រជាធិបតេយ្យ ស្រឡាញ់សេរីភាព និងការពារយុត្តិធម៌សង្គម។
មេដឹកនាំបក្សប្រឆាំងរូបនេះបញ្ជាក់ថា តាមរយៈនៃការបោះឆ្នោតក្លែងក្លាយជាបន្តបន្ទាប់មកនេះ លោក ហ៊ុន សែន បានប្លន់អំណាចពីប្រជារាស្ត្រខ្មែរគ្រប់អាណត្តិ និងយកប្រទេសកម្ពុជាធ្វើជាកម្មសិទ្ធិឯកជនសម្រាប់ក្រុមគ្រួសារគាត់ថែមទៀត។
លោក សម រង្ស៊ី បន្តថា ត្រកូលហ៊ុន និងរបបខុសច្បាប់មួយនេះ គ្មានសិទ្ធិមកធ្វើជាតំណាងឱ្យឆន្ទៈប្រជារាស្ត្រខ្មែរឡើយ។
មេដឹកនាំបក្សកាន់អំណាច លោក ហ៊ុន សែន ធ្លាប់អះអាងកាលពីពេលកន្លងទៅថា អ្នកដែលចង់ជីករំលើងឫសគល់ត្រកូលហ៊ុន ទាល់តែពួកគេយកឈ្នះគណបក្សប្រជាជនកម្ពុជាជាមុនសិន ព្រោះថាសូម្បីមន្ត្រីជាន់ខ្ពស់បក្សកាន់អំណាច ក៏គ្មាននរណាម្នាក់ហ៊ានជីករំលើងឫសគល់ត្រកូលហ៊ុនដែរ។
លោក ហ៊ុន សែន អះអាងថា រដ្ឋាភិបាលដឹកនាំដោយគណបក្សប្រជាជនកម្ពុជា ហ៊ានធ្វើអ្វីៗគ្រប់បែបយ៉ាងដើម្បីកម្ចាត់ឱ្យអស់នូវអង្គការចាត់តាំងជ្រុលនិយមនៅក្រៅស្រុក ទោះក្នុងតម្លៃណាក៏ដោយ ដើម្បីទប់ស្កាត់នូវចរន្តដែលអាចនាំគ្រោះថ្នាក់ដល់ប្រទេសជាតិ។
ទាក់ទិននឹងបញ្ហានេះ ប្រធានវិទ្យុផ្សាយសំឡេងប្រជាធិបតេយ្យ វីអូឌី លោក ប៉ា ងួនទៀង បានលើកឡើងកាលពីពេលថ្មីៗនេះថា លោក ហ៊ុន សែន ជាមនុស្សដែលមានប្រវត្តិប្លន់អំណាចពីអ្នកដទៃដើម្បីផលប្រយោជន៍ខ្លួនឯង និងក្រុមគ្រួសាររបស់គាត់រហូតមក។
លោក ប៉ា ងួនទៀង រំលឹកថា ដើម្បីគ្រប់គ្រងអំណាចផ្ដាច់មុខ លោក ហ៊ុន សែន ហ៊ានបង្ក្រាបចលនាប្រឆាំងនឹងអំណាចគ្រួសាររបស់គាត់គ្រប់បែបយ៉ាង មិនថាក្រុមប្រឆាំង ឬមន្ត្រីគណបក្សប្រជាជនកម្ពុជាក្នុងសម្បុកតែមួយនោះឡើយ។
លោកបញ្ជាក់ថា កន្លងមក មន្ត្រីជាន់ខ្ពស់គណបក្សប្រជាជនកម្ពុជា ដូចជា លោក ប៉ែន សុវណ្ណ លោក ចាន់ ស៊ី និងលោក ជា ស៊ីម ជាដើម សុទ្ធសឹងតែត្រូវលោក ហ៊ុន សែន ប្លន់អំណាចដើម្បីឱ្យគ្រួសាររបស់គាត់អាចគ្រប់គ្រងប្រទេសកម្ពុជាដោយផ្ដាច់មុខរហូតដល់ពេលនេះ៕
© 2024, . All rights reserved.