ប្រទេសដែលប្រឈមមុខនឹងជម្លោះដែនទឹកជាមួយចិន នៅតំបន់សមុទ្រចិនខាងត្បូង កំពុងពង្រឹងសមត្ថភាពយោធារបស់ខ្លួនដោយពង្រីកមូលដ្ឋានទ័ពជើងទឹកនៅក្នុងតំបន់ដែនទឹកមានជម្លោះ។
កាលពីថ្ងៃទី២៩ តុលា សារព័ត៌មានមួយឈ្មោះថា Benar News ដែលបានស្រង់ប្រភពព័ត៌មាន RFA ជាភាសាអង់គ្លេស បានឱ្យដឹងថា បើយោងតាមការបង្ហាញរូបភាពដោយផ្កាយរណបពីក្រុមហ៊ុន Planet Labs ប្រទេសវៀតណាម ស្ថាបនាជិតរួចរាល់ហើយនូវផ្លូវសម្រាប់យន្តហោះចម្បាំងឡើងចុះចតនៅតំបន់កោះមួយក្នុងប្រជុំកោះស្ព្រាតលី ក្នុងសមុទ្រចិនខាងត្បូង។
ប្រជុំកោះ Barque Canada ដែលវៀតណាម ហៅថាកោះ Bai Thuyen Chai វាជាប្រជុំកោះមួយក្នុងចង្កោមកោះធំស្ព្រាតលី ។ ប្រជុំកោះថ្មីមួយដែលប្រទេសវៀតណាម បានស្ថាបនាជាច្រើនឆ្នាំមកហើយពីការបូមខ្សាច់ពង្រីកកោះនោះ គេហៅថាកោះសិប្បនិម្មិត។
បើតាមប្រភពដដែលនេះ ផ្លូវសម្រាប់ចុះចតរបស់យន្តហោះចម្បាំងវៀតណាម លើកោះថ្មីទាំងនោះ វាមានចម្ងាយ ៣០០០ម៉ែត្រនៃកោះនីមួយៗ ហើយកោះនោះមានទំហំ ៤,៥គីឡូម៉ែត្រក្រឡា។ កោះសិប្បនិម្មិតនោះ ប្រទេសវៀតណាម ចាប់ស្ថាបនាតាំងពីឆ្នាំ២០២១ មានចំនួន ៣កោះ។
នាយកកម្មវិធីតម្លាភាពនៃតំបន់សមុទ្រអាស៊ី ដែលមានមូលដ្ឋាននៅទីក្រុងវ៉ាស៊ីនតោន Gregory Poling បានប្រាប់បណ្ដាញផ្សាយព័ត៌មាន RFA ថា កោះថ្មប៉ប្រះទឹក Barque Canada ជាផ្នែកនៃប្រជុំកោះស្ព្រាតលី ក្នុងសមុទ្រចិនខាងត្បូង ដែលវៀតណាម អះអាងថាជាតំបន់ខ្សែទឹករបស់ខ្លួន។
តាមលោក Gregory Poling ប្រទេសវៀតណាម មានផែនការយូរហើយក្នុងការស្ថាបនាផ្លូវសម្រាប់យន្តហោះចំបាំងឡើងចុះចត ឬយន្តហោះស៊ីវិល ដើម្បីល្បាតសមុទ្រ និងការដឹកជញ្ជូនតាមយន្តហោះពីការដឹកអ្វីមួយពីប្រទេសវៀតណាម។
លោក Gregory Poling ថាប្រទេសវៀតណាម ធ្វើការស្ថាបនាផ្លូវសម្រាប់ការចុះចតយន្តហោះជាការធ្វើតាមប្រទេសចិន ដែលបានស្ថាបនារួចហើយផ្លូវចុះចតសម្រាប់យន្តហោះចម្បាំងនៅលើកោះសិប្បនិម្មិតនៅតំបន់នៃកោះស្ព្រាតលី និងប៉ារ៉ាហ្សែល។
តាមប្រភពអ្នកស្រាវជ្រាវ ប្រទេសចិន បានស្ថាបនាកោះសិប្បនិម្មិតបានជាង ១០កោះ ដែលកោះទាំងនោះវាក្លាយជាមូលដ្ឋានទ័ពជើងទឹករបស់ចិន។
យ៉ាងណា មិនមានមន្ត្រីវៀតណាមណាម្នាក់ចេញមុខបញ្ជាក់ពីការបញ្ចេញរូបភាពរបស់ក្រុមហ៊ុនផ្កាយរណបរបស់ក្រុមហ៊ុន Planet Labs នោះទេ ខណៈ RFA បានស្នើសុំការឆ្លើយតប។ បើតាម RFA វៀតណាមមានផែនការស្ថាបនាផ្លូវសម្រាប់ការចុះចតយន្តហោះ និងស្ថាបនាកោះសិប្បនិម្មិតច្រើនទៀតនៅក្នុងប្រជុំកោះស្ព្រាតលី និងប៉ារ៉ាហ្សែល នាសមុទ្រចិនខាងត្បូង ក្នុងតំបន់ដែនទឹកដែលក្រុងហាណូយ អះអាងថាជាកម្មសិទ្ធិរបស់ខ្លួន។ នាពេលនេះ វៀតណាមស្ថាបនាបានកោះសិប្បនិម្មិតនៅក្នុងប្រជុំកោះថ្មប៉ប្រះទឹក Barque Canada បានចំនួន៣។
Tom Shugart អ្នកស្រាវជ្រាវម្នាក់នៃមជ្ឈមណ្ឌលសន្តិសុខថ្មីសហរដ្ឋអាមេរិក Center for New American Security ពន្យល់ថា វៀតណាមនៅតែជាប្រទេសមួយមានសមត្ថភាពខ្លាំងក្នុងការប្រើប្រាស់ឧទ្ធម្ភាគចក្រ និងយន្តហោះរយៈចម្ងាយមធ្យម ដែលវាងាយជួយដឹកជញ្ជូនភស្តុភារសម្រាប់កងទ័ពករណីមានសង្គ្រាម។
អ្នកជំនាញរូបនេះបន្ថែមថា មូលដ្ឋានទ័ពជើងទឹកវៀតណាម មាននៅលើកោះចំនួន ៣ នោះរួចទៅហើយនៅក្នុងសមុទ្រចិនខាងត្បូង ដែលស្ថិតដែនទឹកវៀតណាម។ ប្រទេសវៀតណាម បានកែលម្អកោះទាំងនោះឱ្យវាកាន់តែមានវិសាលភាពធំឡើង ដើម្បីពង្រីកទីតាំងឈរជើងសម្រាប់កងទ័ព។
រដ្ឋាភិបាលវៀតណាម ជឿថា ប្រជុំកោះថ្មប៉ប្រះទឹក Barque Canada ដែលវៀតណាម ហោះថា Bai Thuyen Chai ជាសម្បុកត្រីដែលអ្នកនេសាទវៀតណាម តែងតែបានផលប្រយោជន៍យ៉ាងច្រើនពីតំបន់នោះ។ តែជារឿយៗ ក៏ត្រូវបានប៉ះទង្គិចជាមួយនាវាល្បាតប្រទេសចិន ដែលបានបើកបុកទូកនេសាទវៀតណាម ឱ្យលិចទៀតផង។ ក្រុងប៉េកាំង ប្រកាសថាទូកនេសាទវៀតណាម បានចូលមកលួចយកត្រីនៅតំបន់ទឹករបស់ចិន។
កាលពីពេលថ្មីៗនេះ ក៏មានរឿងរ៉ាវនេះកើតឡើងម្ដងទៀត ទូកនេសាទវៀតណាមជាច្រើនគ្រឿងបានបើករត់ ខណៈនាវាល្បាតចិន តាមបណ្ដេញ និងបើកបុក។ ករណីនេះ បាននាំឱ្យក្រុងហាណូយ ដាក់ញត្តិទៅស្ថានទូតចិន ដោយទាមទារថា តំបន់ប្រជុំកោះថ្មប៉ប្រះទឹក Bai Thuyen Chai ជាតំបន់សេដ្ឋកិច្ចពិសេសរបស់វៀតណាម ដែលប្រទេសចិន មិនត្រូវវាតទីកាន់កាប់ឡើយ។ តែសម្រាប់ចិន បានត្រឹមតែបន្ថយប្រតិកម្មពីវៀតណាម ហើយនាវាចិនទាំងនោះត្រឡប់ទៅវិញ។
នៅក្នុងឆ្នាំ១៩៧៤ ចិននិងវៀតណាម ផ្ទុះសង្គ្រាមសមុទ្រជាមួយគ្នារយៈពេលខ្លី ដែលនៅពេលនោះ ចិនជាអ្នកឈ្នះសង្គ្រាម ដោយវាយដេញទ័ពវៀតណាម និងអ្នកនេសាទវៀតណាម ឱ្យឃ្លាតឆ្ងាយពីតំបន់ប្រទាញប្រទង់គ្នា។ នៅឆ្នាំ១៩៧៨ វៀតណាម បញ្ជូនទ័ពជើងទឹកមួយក្រុមចូលកាន់កាប់ប្រជុំកោះ Barque Canada ម្ដងទៀត តែក៏បានដកត្រឡប់វិញក្រោយពីចិន គំរាមជាខ្លាំង។
តាមការស្រាវជ្រាវ វៀតណាមធ្លាប់គ្រប់គ្រងកោះនៅតំបន់កោះស្ព្រាតលី និងប៉ារ៉ាហ្សែល លើ ២៧កោះក្នុងចំណោម ២៥០កោះ។ តែក្នុងរយៈពេល ៥០ឆ្នាំចុងក្រោយនេះ កោះទាំងនោះធ្លាក់ក្នុងដៃប្រទេសចិន ស្ទើរតែទាំងអស់។ កោះសិប្បនិម្មិតចំនួន៣ ដែលវៀតណាម ស្ថាបនាផ្លូវឡើងចុះចត វាស្ថិតខាងក្នុងខ្សែទឹកវៀតណាម នាពេលបច្ចុប្បន្ននេះ។
ប្រទេសក្នុងសមាគមអាស៊ានដែលកំពុងមានជម្លោះខ្សែទឹកសមុទ្រជាមួយចិន មានវៀតណាម ហ្វីលីពីន ម៉ាឡេស៊ី ឥណ្ឌូនេស៊ី និងប្រ៊ុយណេ។ ចំពោះហ្វីលីពីន កំពុងតែមានភាពតានតឹងជាមួយចិន រហូតបញ្ជូននាវាល្បាត នាវាចម្បាំងប្រឈមមុខដាក់គ្នា។
សមុទ្រចិនខាងត្បូង ដែលមានទំហំ ៣លាន ៥សែនគីឡូម៉ែត្រការ៉េ ប្រទេសចិន អះអាងថា ខ្លួនមានកម្មសិទ្ធិគ្រប់គ្រងដល់ទៅ ៩០ភាគរយ។ នេះវាបង្ហាញឲ្យឃើញថា ប្រទេសនីមួយៗយកចិត្តទុកដាក់បំផុតអំពីបញ្ហាដែនទឹកដីរបស់ខ្លួន ហៅថាអធិបតេយ្យជាតិរបស់គេ៕
© 2024, . All rights reserved.