មន្ត្រីជាន់ខ្ពស់បក្សប្រឆាំង ជំរុញឱ្យមេដឹកនាំបក្សកាន់អំណាច លោក ហ៊ុន សែន ស្រាយបំភ្លឺទៅកាន់ប្រធានាធិបតីសហរដ្ឋអាមេរិកជាប់ឆ្នោតថ្មី លោក ដូណាល់ ត្រាំ (Donald Trump) ថា សហរដ្ឋអាមេរិកជាមេគំនិតក្នុងការគប់គិតផ្តួលរំលំរដ្ឋាភិបាលនៃប្រទេសកម្ពុជា ក្នុងសំណុំរឿងប្រធានគណបក្សសង្គ្រោះជាតិ លោក កឹម សុខា។
អតីតនាយកខុទ្ទកាល័យប្រធានគណបក្សសង្គ្រោះជាតិ លោក មុត ចន្ថា សរសេរលើទំព័រហ្វេសប៊ុករបស់ខ្លួននៅថ្ងៃទី៧ វិច្ឆិកា នេះថា ពេលលោក ដូណាល់ ត្រាំ នៅជាប្រធានាធិបតីក្នុងអាណត្តិដំបូងបានបដិសេធថា សហរដ្ឋអាមេរិកមិនបានស្វែងរកឱ្យមានការផ្លាស់ប្ដូររដ្ឋាភិបាលនៅប្រទេសកម្ពុជាឡើយ។
លោកថា ទោះបីជាលោក ត្រាំ បានបដិសេធជាផ្លូវការបែបនេះហើយក៏ដោយ ក៏អយ្យការតំណាងឱ្យរដ្ឋាភិបាលរបស់លោក ហ៊ុន សែន ដែលជាម្ចាស់បណ្ដឹងអាជ្ញានោះ នៅតែបន្តចោទសហរដ្ឋអាមេរិកថាជាមេគំនិតក្នុងបទឧក្រិដ្ឋក្បត់ជាតិនេះដដែល។
លោក មុត ចន្ថា ពន្យល់ថា ក្នុងសំណុំរឿងក្បត់ជាតិ តំណាងអយ្យការក្នុងនាមរដ្ឋាភិបាលលោក ហ៊ុន សែន បានចោទលោក កឹម សុខា ថាមានសហរដ្ឋអាមេរិកជាមេគំនិតនៅពីក្រោយខ្នង ដោយជ្រកក្រោមស្លាកគណបក្សសង្គ្រោះជាតិ ដែលក្នុងនោះ គឺមាន ភ្នាក់ងារអភិវឌ្ឍន៍អន្តរជាតិសហរដ្ឋអាមេរិក (USAID) ដែលជាភ្នាក់ងារនៃក្រសួងការបរទេសសហរដ្ឋអាមេរិកផងដែរ។ ជាងនេះទៀត វិទ្យាស្ថានជាតិប្រជាធិបតេយ្យសម្រាប់កិច្ចការអន្តរជាតិ (NDI) ដែលមាននិន្នាការជាមួយគណបក្សប្រជាធិបតេយ្យ ក៏ត្រូវបានចោទប្រកាន់ថាជាប់ពាក់ព័ន្ធក្នុងសំណុំរឿងនេះថែមទៀត។ បន្ថែមពីនេះ វិទ្យាស្ថានសាធារណរដ្ឋអន្តរជាតិ (IRI) ដែលមាននិន្នាការជាមួយគណបក្សសាធារណរដ្ឋ ខាងប្រធានាធិបតីថ្មី លោក ដូណាល់ ត្រាំ ក៏ជាប់ក្នុងការចោទប្រកាន់ថាជាមេគំនិតក្នុងការរៀបចំផែនការផ្តួលរំលំរដ្ឋាភិបាលស្របច្បាប់របស់លោក ហ៊ុន សែន នៅចន្លោះពីឆ្នាំ១៩៩៣ និងឆ្នាំ២០១៧ ដែរ។
លោក មុត ចន្ថា គូសបញ្ជាក់ថា សំណុំរឿងនេះ បើគ្មានសេចក្តីរាយការណ៍ចោទប្រកាន់ពីនគរបាលយុត្តិធម៌ និងគ្មានការយល់ព្រមពីរដ្ឋាភិបាលទេ ក៏អយ្យការមិនអាចបង្កើតសំណុំរឿងព្រហ្មទណ្ឌដើម្បីចោទប្រកាន់ដែរ ខណៈតុលាការ និងចៅក្រមសព្វថ្ងៃនេះសម្រេចក្តីតាមតែបញ្ជាពីអ្នកកាន់អំណាចកំពូលតែមួយប៉ុណ្ណោះ។
កាលពីថ្ងៃទី០៦ ខែវិច្ឆិកា ឆ្នាំ២០២៤ មេដឹកនាំបក្សកាន់អំណាច លោក ហ៊ុន សែន និងលោក ហ៊ុន ម៉ាណែត បានផ្ញើលិខិតអបអរសាទរលោក ដូណាល់ ត្រាំ ដែលឈ្នះឆ្នោតឡើងកាន់តំណែងប្រធានាធិបតីសហរដ្ឋអាមេរិក ថា ក្នុងនាមលោកជាប្រធានព្រឹទ្ធសភានៅតែបន្តប្ដេជ្ញាធ្វើការយ៉ាងជិតស្និទ្ធជាមួយលោក ដូណាល់ ត្រាំ ដើម្បីផលប្រយោជន៍ទៅវិញទៅមកនៃប្រទេស និងប្រជាជនទាំងពីរ។
នៅថ្ងៃទី៣ ខែកញ្ញា ឆ្នាំ២០១៧ មេដឹកនាំបក្សប្រឆាំង លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនពីបទ ឃុបឃិតជាមួយរដ្ឋបរទេស ដូចជាសហរដ្ឋអាមេរិក ជាដើម ពីបទ គប់គិតដើម្បីផ្តួលរំលំរដ្ឋាភិបាលប្រទេសកម្ពុជា។
ទោះជាយ៉ាងណាក៏ដោយ កាលពីលោក ដូណាល់ ត្រាំ នៅជាប្រធានាធិបតីអាណត្តិដំបូង លោកធ្លាប់បានបញ្ជូនលិខិតមួយច្បាប់ ចុះថ្ងៃទី០១ ខែវិច្ឆិកា ឆ្នាំ២០១៩ ទៅលោក ហ៊ុន សែន ដោយបានបដិសេធថា សហរដ្ឋអាមេរិកមិនស្វែងរកឱ្យមានការផ្លាស់ប្ដូររដ្ឋាភិបាលនៅប្រទេសកម្ពុជាឡើយ៕
© 2024, . All rights reserved.