អង្គភាពប្រឆាំងអំពើពុករលួយ (ACU) បញ្ជូនខ្លួនលោក មួង ឃីម ជាអតីតមន្ត្រីនគរបាលពាក់ផ្កាយ៣ ចូលនិវត្តន៍ និងឧកញ៉ា អ៊ុត ធី ដែលរកស៊ីវាយថ្ម និងធ្វើផ្លូវ ទៅសាលាដំបូងរាជធានីភ្នំពេញ នៅព្រឹកថ្ងៃទី១១ ខែវិច្ឆិកា ឆ្នាំ២០២៤ នេះ ក្រោយពីបែកធ្លាយលិខិតមួយដែលបង្ហាញពីការជាប់ពាក់ព័ន្ធនឹងលោក លី សាម៉េត ហៅគ្រូមា។
អ្នកតាមដានខ្លះនិយាយថា អង្គភាពប្រឆាំងអំពើពុករលួយមើលទៅដូចធ្វើការស៊ើបអង្កេត និងចាប់បញ្ជូនមនុស្សដោយរើសមុខ រើសបក្ខពួក ខណៈអង្គភាពនេះស្ងាត់សកម្មភាពជ្រងំមួយរយៈយ៉ាងយូរ ខណៈដែលមានរឿងអាស្រូវពុករលួយទាក់ទងនឹងរឿងអាជីវកម្មឧក្រិដ្ឋខុសច្បាប់ល្បីពេញពិភពលោកនោះ។
អ្នកនាំពាក្យអង្គភាពប្រឆាំងអំពើពុករលួយ (ACU) លោក សយ ច័ន្ទវិចិត្រ បានប្រាប់អ្នកសារព័ត៌មានថា អង្គភាពប្រឆាំងអំពើពុករលួយបានបញ្ជូនលោក មួង ឃីម អតីតមន្ត្រីនគរបាល និងលោក អ៊ុត ធី ជាឈ្មួញរកស៊ីថ្ម ទៅតុលាការរាជធានីភ្នំពេញ នាព្រឹកថ្ងៃទី១១ ខែវិច្ឆិកា នេះ។
ពាក់ព័ន្ធនឹងករណីឃាត់ខ្លួន និងការបញ្ជូនជនសង្ស័យខាងលើទៅតុលាការនេះ អ្នកនាំពាក្យ ACU សុំមិនទាន់បង្ហាញព័ត៌មានលម្អិតឡើយ ដោយរង់ចាំតុលាការពិនិត្យសំណុំរឿងជាមុនសិន។
ប្រភពដដែលអះអាងថា ក្រុមជំនាញសម្រេចឃាត់ខ្លួនលោក មួង ឃីម និងលោកឧកញ៉ា អ៊ុត ធី កាលពីថ្ងៃទី៨ ខែវិច្ឆិកា។ រហូតដល់ថ្ងៃទី១០ ខែវិច្ឆិកា ACU បានរៀបចំសេចក្តីរាយការណ៍រួចរាល់ និងត្រៀមបញ្ជូនជនសង្ស័យទាំងពីរនាក់នេះទៅតុលាការ ប៉ុន្តែតុលាការសុំឱ្យបញ្ជូននៅព្រឹកថ្ងៃទី១១ វិញ ព្រោះស្ថានភាពពេលវេលា។
គេមិនទាន់បានបញ្ជាក់ពីបទល្មើសដែលនាំឲ្យអង្គភាពប្រឆាំងអំពើពុករលួយ ចាប់ខ្លួនបុគ្គលទាំងពីរនាក់នេះទេ តែការឃាត់ខ្លួននេះ បានធ្វើឡើងក្រោយមានការបែកធ្លាយលិខិតមួយដែលបង្ហាញពីការជាប់ពាក់ព័ន្ធនឹងលោក លី សាម៉េត ហៅគ្រូមា លោក ដួង តារា និងលោក ឡាច សំរោង ក្នុងអំពើឆបោក។
លោក មួង ឃីម ជាអតីតមន្ត្រីនគរបាលពាក់ផ្កាយ៣ មានមុខនាទីជាអនុប្រធាននាយកដ្ឋានកណ្តាលនគរបាលយុត្តិធម៌ ហើយពេលនេះលោកចូលនិវត្តន៍ហើយ។ ឧកញ៉ា អ៊ុត ធី គេស្គាល់ថារកស៊ីវាយថ្ម និងធ្វើផ្លូវ។
ជុំវិញករណីលោក លី សាម៉េត នេះ កាលពីថ្ងៃទី៧ ខែតុលា លោក ហ៊ុន សែន បានបញ្ជាឱ្យសមត្ថកិច្ចចាប់ខ្លួនលោក លី សាម៉េត ក្រោមហេតុផលថា បុគ្គលរូបនេះប្រព្រឹត្តអំពើឆបោកដោយប្រើឈ្មោះរបស់លោកដែលមានទាំងការបោកប្រាស់ស៊ីដាច់លុយគេផ្ញើឱ្យលោកចំនួន ១០លានដុល្លារសហរដ្ឋអាមេរិក និងលុយ ៣០ម៉ឺនដុល្លារសហរដ្ឋអាមេរិក សម្រាប់រត់ការយកតំណែងក្នុងជួររដ្ឋាភិបាលជាដើមថែមទៀត ប៉ុន្តែត្រូវលោក លី សាម៉េត រត់គេចខ្លួន។
អ្នកតាមដានបញ្ហាសង្គម និងនយោបាយកម្ពុជា ស្នើឱ្យតុលាការស៊ើបអង្កេតរឿងនេះឱ្យស៊ីជម្រៅដើម្បីនាំអ្នកពាក់ព័ន្ធមកផ្ដន្ទាទោស ដោយសារករណីចាប់ខ្លួនលោក លី សាម៉េត នេះ មានភាពមិនប្រក្រតីជាច្រើន។
លោក លី សាម៉េត ក៏ធ្លាប់និយាយថា លោកយកលុយដែលបានមកពីការបោកប្រាស់ប្រគល់ឱ្យទៅលោក ហ៊ុន សែន។
មានចម្ងល់ក្នុងមជ្ឈដ្ឋានពលរដ្ឋខ្មែរថា តើនៅស្រុកខ្មែរមានបុគ្គលប៉ុន្មាននាក់ដែលថ្លើមធំហ៊ានយកឈ្មោះមេដឹកនាំកំពូលផុតលេខ ដូចជាលោក ហ៊ុន សែន ទៅដើរបោកពលរដ្ឋរាប់ឆ្នាំនោះ?
អ្នកខ្លះនិយាយថា ទំនងជាលោក ហ៊ុន សែន មានប្រើបណ្ដាញមនុស្សរកលុយឲ្យគាត់មែន ពីព្រោះលោកធ្លាប់ពោលថា លោកក្រ មានប្រាក់ខែតែជាង ២ពាន់ដុល្លារប៉ុណ្ណោះមួយខែៗ ហើយរស់បានដោយមានកូនចៅរបស់លោកចិញ្ចឹម។
រឿងប្រើមនុស្សធ្វើការស្ងាត់ៗ តែល្គឹកណាបែកការណ៍ហើយ គេត្រូវតែកម្ចាត់អ្នកនោះ ដើម្បីលុបលាងកេរ្តិ៍ឈ្មោះបំបាត់ការមន្ទិលសង្ស័យក្នុងមជ្ឈដ្ឋានសាធារណៈ។
ជុំវិញបញ្ហានេះ អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ ធ្លាប់លើកឡើងថា អំពើឧក្រិដ្ឋកម្មបោកប្រាស់ដោយឧកញ៉ា លី សាម៉េត ត្រូវស៊ើបអង្កេតលើប្រធានគណបក្សប្រជាជនកម្ពុជា លោក ហ៊ុន សែន។ លោក គឹម សុខ ថាហេតុផលដែលត្រូវស៊ើបអង្កេតលើបុគ្គលទាំងនេះ គឺទី១ តាមរដ្ឋធម្មនុញ្ញ បុគ្គលគ្រប់រូបស្មើគ្នានៅចំពោះមុខច្បាប់។ ចំណែកឯទី២ យុត្តិធម៌ក្នុងរឿងឧក្រិដ្ឋកម្ម ទាមទារឲ្យមានការស៊ើបអង្កេតដោយហ្មត់ចត់ និងតម្លាភាពលើគ្រប់ជនសង្ស័យ ហើយទី៣ គឺជាវិធានការដែលត្រូវអនុវត្តតាមអត្ថន័យ «នីតិរដ្ឋ» ដែលលោក ហ៊ុន សែន ថ្លែងស្ទើរគ្រប់វេទិការៀងរហូតមកនោះ៕
© 2024, . All rights reserved.