អង្គភាពប្រឆាំងអំពើពុករលួយ (ACU) បានបញ្ជូនខ្លួនអតីតអភិបាលស្រុកល្វាឯម លោក កន សុខកាយ ទៅសាលាដំបូងរាជធានីភ្នំពេញ នៅរសៀលថ្ងៃទី១២ ខែវិច្ឆិកា ក្នុងសំណុំរឿងសូកប៉ាន់លុយ ៣០ម៉ឺនដុល្លារតាមរយៈលោក លី សាម៉េត ដើម្បីបានតំណែងជាអភិបាលស្រុក។
អ្នកនាំពាក្យរបស់ ACU លោក សយ ច័ន្ទវិចិត្រ បានប្រាប់ក្រុមអ្នកសារព័ត៌មានក្នុងស្រុកថា ក្រុមជំនាញ ACU បានឃាត់ខ្លួនលោក កន សុខកាយ កាលពីថ្ងៃទី១០ ខែវិច្ឆិកា។ លោកថា ការឃាត់ខ្លួនលោក កន សុខកាយ ដោយសារសង្ស័យថាគាត់ជាប់ពាក់ព័ន្ធនឹងបទល្មើសប៉ុនប៉ងសូកប៉ាន់ដើម្បីបានតំណែង។
អ្នកនាំពាក្យរបស់ ACU រូបនេះបន្ថែមថា ក្នុងសំណុំរឿងពាក់ព័ន្ធនឹងសំណុំរឿងរបស់លោក លី សាម៉េត ACU បានឃាត់ខ្លួនមន្ត្រី និងអ្នកពាក់ព័ន្ធជាបន្តបន្ទាប់ រួមមានលោក មួង ឃីម លោក ដួង តារា លោក លី សាម៉េត លោក អ៊ុត ធី និងលោក ឡាយ វិសិដ្ឋ ជាដើម។
លោក មួង ឃីម ជាអតីតមន្ត្រីនគរបាល ហើយលោក អ៊ុត ធី ជាឈ្មួញរកស៊ីថ្ម ត្រូវបានឃាត់ខ្លួនកាលពីថ្ងៃទី៨ ខែវិច្ឆិកា ដើម្បីសាកសួរ មុននឹងបញ្ជូនខ្លួនទៅកាន់តុលាការនាព្រឹកថ្ងៃទី១១ ខែវិច្ឆិកា។ លោក ដួង តារា អស់តំណែងជារដ្ឋលេខាធិការទីស្ដីការគណៈរដ្ឋមន្ត្រី ក្រោយពេលលោកត្រូវបានឃាត់ខ្លួន និងត្រូវបានបញ្ជូនទៅឃុំនៅពន្ធនាគាររាជធានីភ្នំពេញ កាលពីថ្ងៃទី១៧ ខែតុលា ពីបទ «ឆបោក»។
រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក សេង ឌីណា បានប្រាប់ក្រុមអ្នកសារព័ត៌មានកន្លងមកថា ក្រុមមេធាវីរបស់លោក ហ៊ុន សែន បានទទួលពាក្យបណ្ដឹងជាបន្តបន្ទាប់ពីសំណាក់ជនរងគ្រោះដែលពាក់ព័ន្ធនឹងករណីលោក លី សាម៉េត។ លោកអះអាងថា លោកមិនអាចបង្ហាញចំនួនជនរងគ្រោះ និងចំនួនទឹកប្រាក់ដែលជនរងគ្រោះខាតបង់បាននៅឡើយទេ ដោយសារសំណុំរឿងនេះកំពុងស្ថិតក្នុងចំណាត់ការរបស់តុលាការ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ បានសរសេរលើគណនីហ្វេសប៊ុករបស់ខ្លួនថា អំពើឧក្រិដ្ឋកម្មបោកប្រាស់របស់ឧកញ៉ា លី សាម៉េត ត្រូវស៊ើបអង្កេតលើប្រធានគណបក្សប្រជាជនកម្ពុជា លោក ហ៊ុន សែន តែម្តង។
គិតត្រឹមថ្ងៃទី១២ ខែវិច្ឆិកា ឆ្នាំ២០២៤ ការចាប់ខ្លួនមន្ត្រី និងឧកញ៉ាយ៉ាងតិច ៦នាក់ បន្ទាប់ពីលោក ហ៊ុន សែន បានសរសេរសារនៅលើទំព័រហ្វេសប៊ុករបស់លោកកាលពីថ្ងៃទី០៧ ខែតុលា ឆ្នាំ២០២៤ ថា លោក លី សាម៉េត បានប្រើឈ្មោះរបស់លោកទៅបោកប្រាស់លុយគេរាប់សែនរាប់លានដុល្លារ៕
© 2024, . All rights reserved.