រដ្ឋសភាកម្ពុជា ចាត់ទុកអ្នកធ្វើអត្ថាធិប្បាយលើទូរទស្សន៍មនសិការខ្មែរ លោក អ៊ុន ឆាលី ដែលបានហៅទូរសព្ទទៅលោក ហ៊ុន សែន សួរនាំពីការធ្វើទុក្ខបុកម្នេញលើពលរដ្ឋខ្មែរកាលពីពេលថ្មីៗនេះ ថាជាមនុស្សទមិឡឥតសាសនា។
រដ្ឋសភាកម្ពុជាចេញសេចក្តីប្រកាសថ្កោលទោសនៅថ្ងៃទី១២ វិច្ឆិកា នេះថា ការប្រើពាក្យសម្ដីអសុរោះ និងឥរិយាបថមិនគប្បីទៅលើលោក ហ៊ុន សែន ដែលជាថ្នាក់ដឹកនាំកំពូលរបស់ជាតិ បានបង្ហាញឱ្យឃើញពីសារជាតិ «ទមិឡ» របស់ក្រុមប្រឆាំងដែលដឹកនាំដោយមេខ្លោងជាជនឧទ្ទាមក្រៅច្បាប់យ៉ាងច្បាស់ក្រឡែត។
ប្រភពដដែលលើកឡើងថា ពួកគេតែងប្រើតែពាក្យពេចន៍អុជអាល ព្យាបាទ គុំកួន គ្មានសន្តិភាពផ្លូវចិត្តជារៀងរហូតមក ដែលប្រាសចាកឆ្ងាយពីទំនៀមទម្លាប់ សុជីវធម៌ ឱ្យស័ក្តិសមជាកូនខ្មែរដែលមានពូជពង្សវង្សត្រកូលថ្លៃថ្នូរ មានចរិយាធម៌ខ្ពង់ខ្ពស់ ស្គាល់ចាស់ស្គាល់ទុំ ស្គាល់បុណ្យស្គាល់បាបឡើយ។
រដ្ឋសភាកម្ពុជា បញ្ជាក់ថា លោក ហ៊ុន សែន បានធ្វើពលិកម្មក្នុងការដឹកនាំប្រទេសជាតិឱ្យទទួលបានសុខសន្តិភាព និងត្រូវបានទទួលការគោរពយ៉ាងធំធេងពីសំណាក់ពលរដ្ឋខ្មែរនៅគ្រប់ទិសទី និងនៅលើឆាកអន្តរជាតិផងដែរ ថាជាមេដឹកនាំដែលប្រកាន់ខ្ជាប់នូវសីលធម៌ គុណធម៌ មេត្តាធម៌ ព្រហ្មវិហារធម៌ចំពោះជនរួមជាតិរបស់ខ្លួន។
កាលពីថ្ងៃទី១០ ខែវិច្ឆិកា ឆ្នាំ២០២៤ អ្នកធ្វើអត្ថាធិប្បាយលើទូរទស្សន៍មនសិការខ្មែរ លោក អ៊ុន ឆាលី បានហៅទូរសព្ទតាមប្រព័ន្ធវ័តអាប់ (WhatsApp) ទៅសួរលោក ហ៊ុន សែន ដោយផ្ទាល់អំពីល្បិចកលរបស់គាត់ដែលចង់កម្ទេចទូរទស្សន៍មនសិការខ្មែរមិនឱ្យផ្សព្វផ្សាយពីបញ្ហាសង្គម និងពលរដ្ឋខ្មែររងគ្រោះបន្តទៀត។
បន្ទាប់ពីលោក អ៊ុន ឆាលី បានសួរសំណួរនេះ លោក ហ៊ុន សែន ស្រាប់តែខឹងច្រឡោត និងជេរប្រមាថលើរូបលោក និងហៅលោកថាជាក្មេងព្រហើន ជាដើម។
ជុំវិញបញ្ហានេះ តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី១២ វិច្ឆិកា នេះថា សម្ដីរបស់លោក ហ៊ុន សែន មិនសមជាជនគំរូសម្រាប់ពលរដ្ឋខ្មែរក្នុងនាមជាមេដឹកនាំដែលមានសុជីវធម៌ សីលធម៌ និងគុណធម៌ដូចការអះអាងរបស់រដ្ឋសភាឡើយ ព្រោះក្នុងការឆ្លើយឆ្លងគ្នានេះ គាត់បានប្រើពាក្យប្រមាថជេររហូត ដែលគ្រាន់តែគេសាកសួរសំណួរប៉ុណ្ណោះ។
លោក អ៊ុំ សំអាន លើកឡើងថា សម្ដីរបស់លោក ហ៊ុន សែន បានបង្ហាញពីអត្តចរិតផ្ដាច់ការរបស់គាត់យ៉ាងច្បាស់ ព្រោះមនុស្សដែលមានអត្តចរិតបែបនេះ នៅពេលដែលគេសួរអ្វីដែលខ្លួនមិនពេញចិត្ត តែងប្រើអំណាចដែលខ្លួនមានដើម្បីគំរាមកំហែងគេ ឬបំបិទមាត់គេមិនឱ្យនិយាយតែម្តង។
អង្គការ Freedom House បានចាត់ទុកកម្ពុជាដែលកំពុងគ្រប់គ្រងដោយគណបក្សប្រជាជនកម្ពុជា របស់លោក ហ៊ុន សែន ជាប្រទេសផ្ដាច់ការមួយក្នុងចំណោមប្រទេសផ្ដាច់ការធំៗ ៥ ផ្សេងទៀត រួមមាន ភូមា ចិន និងរុស្ស៊ី ជាដើម ដែលប្រើវិធានការគាបសង្កត់សិទ្ធិសេរីភាពរបស់ពលរដ្ឋ៕
© 2024, . All rights reserved.