ប្រធានរដ្ឋសភាវៀតណាម លោក ជិន ថាញ់មិន នឹងធ្វើទស្សនកិច្ចផ្លូវការនៅកម្ពុជា រយៈពេល ៤ថ្ងៃ ចាប់ពីថ្ងៃទី២១-២៤ ខែវិច្ឆិកា បន្ទាប់ពីកម្ពុជាបានប្រកាសដកខ្លួនចេញពីតំបន់អភិវឌ្ឍន៍ត្រីកោណ (CLV-DTA)។
បើតាមសេចក្ដីប្រកាសព័ត៌មានរបស់រដ្ឋសភាកម្ពុជា ចេញផ្សាយនៅថ្ងៃទី១៨ ខែវិច្ឆិកា ឲ្យដឹងថា នៅក្នុងដំណើរទស្សនកិច្ចនេះ លោក ជិន ថាញ់មិន និងគណៈប្រតិភូ នឹងចូលក្រាបថ្វាយបង្គំព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រកម្ពុជា។ លោកក៏នឹងចូលសម្ដែងការគួរសមជាមួយលោក ហ៊ុន សែន ប្រធានព្រឹទ្ធសភាកម្ពុជា និងលោក ហ៊ុន ម៉ាណែត នាយករដ្ឋមន្ត្រីកម្ពុជា។
គណៈប្រតិភូសភាវៀតណាម ក៏គ្រោងចូលជួបជាមួយលោក ហេង សំរិន ប្រធានកិត្តិយសនៃឧត្ដមក្រុមប្រឹក្សាផ្ទាល់របស់ព្រះមហាក្សត្រ និងអ្នកស្រី ម៉ែន សំអន សមាជិកាឧត្ដមក្រុមប្រឹក្សាផ្ទាល់ព្រះមហាក្សត្រ។
តាមសេចក្ដីប្រកាសព័ត៌មាន បានឲ្យដឹងថា បន្ទាប់មក ប្រធានរដ្ឋសភាវៀតណាម និងឥស្សរជនជាន់ខ្ពស់កម្ពុជា-វៀតណាម មួយចំនួនទៀត នឹងចូលរួមសម្ពោធអគាររដ្ឋបាលថ្មីរបស់រដ្ឋសភា ដែលជាអំណោយរបស់វៀតណាម ដែរ។
នៅក្នុងឱកាសនេះ លោក ជិន ថាញ់មិន នឹងដឹកនាំគណៈប្រតិភូជាន់ខ្ពស់រដ្ឋសភាវៀតណាម ចូលរួមថ្លែងសុន្ទរកថាក្នុងពិធីបើកសន្និសីទអន្តរជាតិនៃគណបក្សនយោបាយអាស៊ី (ICAPP) និងថ្លែងសុន្ទរកថាក្នុងពិធីបើកសម័យប្រជុំពេញអង្គនៃសភាអន្តរជាតិលើកទី១១ ដែលរដ្ឋសភាកម្ពុជាធ្វើជាម្ចាស់ផ្ទះ។
ប្រធានអង្គការប្រជាធិបតេយ្យខ្មែរ លោក ស៊ឹង សែនករុណា អះអាងថា ដំណើរទស្សនកិច្ចរបស់ប្រធានសភាវៀតណាម មកកម្ពុជានេះ មានសារសំខាន់ ដោយសារកម្ពុជា និងវៀតណាមនាពេលថ្មីៗនេះ ហាក់មានភាពរកាំរកូសគ្នាពាក់ព័ន្ធនឹងគម្រោងព្រែកជីកហ្វូណនតេជោ និងកម្ពុជាបានប្រកាសដកចេញពីតំបន់អភិវឌ្ឍន៍ត្រីកោណ (CLV-DTA)។
លោកអះអាងថា វៀតណាមនឹងជំរុញបន្ថែមនូវកិច្ចសហប្រតិបត្តិការផ្នែកសេដ្ឋកិច្ច ពង្រីកសក្ដានុពលរបស់ខ្លួនក្នុងវិស័យវិនិយោគ ក៏ដូចជាក្នុងវិស័យទេសចរណ៍រវាងប្រទេសទាំងពីរ ពង្រីកការធ្វើដំណើរ ក៏ដូចជាពង្រីកហេដ្ឋារចនាសម្ព័ន្ធតភ្ជាប់ពីកម្ពុជាទៅវៀតណាម ឱ្យកាន់តែទូលំទូលាយ។
លោកបន្តថា ពេលជួបជាមួយនាយករដ្ឋមន្ត្រី និងប្រធានព្រឹទ្ធសភា ភាគីវៀតណាម អាចនឹងពិភាក្សាលើបញ្ហាសន្តិសុខអ៊ីនធឺណិត ការឆបោកតាមប្រព័ន្ធអនឡាញ ការជួញដូរគ្រឿងញៀន ជាពិសេសបញ្ហាការចាត់ចែងប្រព័ន្ធហិរញ្ញវត្ថុឲ្យមានតម្លាភាព។
បើតាមសេចក្ដីប្រកាសព័ត៌មាន បានឲ្យដឹងថា ដំណើរទស្សនកិច្ចនេះ គឺជាទស្សនកិច្ចដ៏សំខាន់មួយក្នុងការពង្រឹងកិច្ចសហប្រតិបត្តិការកម្ពុជា-វៀតណាម ជាពិសេសរវាងរដ្ឋសភានៃប្រទេសទាំងពីរឱ្យកាន់តែមានភាពរឹងមាំ ស៊ីជម្រៅ គ្រប់ជ្រុងជ្រោយ និងបង្កើនកម្រិតនៃកិច្ចសហប្រតិបត្តិការទាំងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិឱ្យកាន់តែប្រសើរឡើង៕
© 2024, . All rights reserved.