តំណាងរាស្ត្រគណបក្សសង្គ្រោះជាតិ ជំរុញឱ្យរដ្ឋាភិបាលខ្មែរចេញមុខបំភ្លឺជុំវិញការព្រមានរបស់រដ្ឋមន្ត្រីការពារជាតិថៃ ជុំវិញការប្រកាសសង្គ្រាមជាមួយនឹងកម្ពុជា ទាក់ទិននឹងការសហការនៅតំបន់ត្រួតស៊ីគ្នា។
លោក អ៊ុំ សំអាន ប្រាប់សារព័ត៌ មាន The Cambodia Daily នៅថ្ងៃទី១៨ វិច្ឆិកា នេះថា ពលរដ្ឋខ្មែរកំពុងរង់ចាំការបំភ្លឺរបស់រដ្ឋាភិបាលលោក ហ៊ុន ម៉ាណែត ទាក់ទិនទៅនឹងការកាន់កាប់កោះគុតពីសំណាក់ប្រទេសថៃ រួមទាំងការសហការរកស៊ីរួមគ្នានៅដែនសមុទ្រត្រួតស៊ីគ្នាដែលកម្ពុជាបានចុះកិច្ចព្រមព្រៀងជាមួយថៃ កន្លងមក។
លោក អ៊ុំ សំអាន លើកឡើងថា អ្វីដែលកម្ពុជាត្រូវដោះស្រាយនៅពេលនេះ មិនមែនការធ្វើសង្គ្រាមទេ គឺគ្រាន់តែប្តឹងទៅតុលាការអាជ្ញាកណ្ដាលអន្តរជាតិឱ្យរកយុត្តិធម៌ប៉ុណ្ណោះ ប៉ុន្តែការគំរាមកំហែងកម្ពុជាដោយយកសង្គ្រាមមកដាក់ពីមុខ បង្ហាញថាថៃ កំពុងមើលស្រាលលើអធិបតេយ្យជាតិរបស់កម្ពុជាយ៉ាងធ្ងន់ធ្ងរ។
មន្ត្រីបក្សប្រឆាំងរូបនេះបញ្ជាក់ថា ថៃមិនគួរព្រួយបារម្ភនៅពេលដែលកម្ពុជាយកបញ្ហានេះប្តឹងទៅតុលាការអន្តរជាតិក្រុងឡាអេ ដើម្បីកំណត់ដែនសមុទ្ររវាងប្រទេសទាំងពីរ មុននឹងចុះអនុស្សរណៈយោគយល់រកស៊ីជាមួយគ្នានោះទេ ប្រសិនបើថៃ ប្រាកដថាដែនសមុទ្រ និងកោះគុតដែលពួកគេកាន់កាប់សព្វថ្ងៃនេះ មិនបានរំលោភយកពីកម្ពុជានោះ។
កាលពីថ្ងៃទី១៥ ខែវិច្ឆិកា ឆ្នាំ២០២៤ រដ្ឋមន្ត្រីការពារជាតិថៃ លោក ភូមិថាំ វេឆាយាឆៃ (Phumtham Wechayachai) អះអាងថា ភាគីកម្ពុជា និងថៃ ត្រូវតែអនុលោមទៅតាមអនុស្សរណៈយោគយល់គ្នាឆ្នាំ២០០១ (MOU44) ស្តីអំពីការអភិវឌ្ឍរួមគ្នាសម្រាប់វិស័យធនធានថាមពល (OCA) ដោយសន្តិវិធី។
លោក ភូមិថាំ វេឆាយាឆៃ ព្រមានថា បើប្រទេសទាំងពីរមិនអនុវត្តតាមអនុស្សរណៈយោគយល់គ្នានេះទេ នឹងមានសង្គ្រាមដោយប្រើអាវុធប្រឆាំងគ្នាទៅវិញទៅមកជាមិនខាន ក្នុងករណីដែលកម្ពុជាយកសំណុំរឿងតំបន់ «ត្រួតស៊ីគ្នា» នេះ ប្ដឹងទៅស្ថាប័នតុលាការអន្តរជាតិ។
ប្រភពដដែលបញ្ជាក់ថា យោធា មន្ត្រីរាជការ និងពលរដ្ឋថៃ បានត្រៀមខ្លួនរួចជាស្រេចចំពោះរឿងនេះ។
កាលពីថ្ងៃទី៨ ខែវិច្ឆិកា ឆ្នាំ២០២៤ នាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ (Pae Thongthan Shinawatra) បានអះអាងក្រោយជួបជាមួយនាយករដ្ឋមន្ត្រីកម្ពុជា លោក ហ៊ុន ម៉ាណែត នៅក្នុងកិច្ចប្រជុំមួយនៅប្រទេសចិន ថា រដ្ឋាភិបាលរបស់អ្នកស្រីនឹងចរចាជាមួយកម្ពុជា លើបញ្ហាតំបន់ «ត្រួតស៊ីគ្នា» នៅអំឡុងខែវិច្ឆិកា នេះ។
អ្នកស្រី ផែថងថាន ស៊ីណាវ៉ាត់ លើកឡើងថា កម្ពុជានឹងជួយដល់ថៃ ប្រសិនបើត្រូវការសហការពីកម្ពុជាក្នុងកិច្ចព្រមព្រៀងអនុស្សរណៈយោគយល់គ្នានេះ (MOU)។ ជាងនេះទៅទៀត កម្ពុជាក៏មិនមានបញ្ហានឹងរឿងកោះគុតដែរ ប៉ុន្តែអ្វីដែលកម្ពុជាបារម្ភនោះ គឺទាក់ទងនឹងពេលវេលាដែលគណៈកម្មាធិការបច្ចេកទេស (JTC) រួមគ្នាត្រូវបង្កើតឡើង ដើម្បីចាប់ផ្ដើមការចរចាប៉ុណ្ណោះ។
សារព័ត៌មាន The Cambodia Daily មិនអាចទាក់ទងមន្ត្រីទទួលបន្ទុកកិច្ចការព្រំដែន លោក ឡាំ ជា ដើម្បីសុំបំភ្លឺជុំវិញរឿងនេះបាននៅឡើយទេ រហូតដល់ម៉ោងផ្សាយនេះ៕
© 2024, . All rights reserved.