លោក ហ៊ុន សែន គ្រោងបង្កើតច្បាប់ថ្មីមួយ ដើម្បីដាក់ក្រុមប្រឆាំងជ្រុលនិយមនៅកម្ពុជាទៅជាក្រុមភេរវកម្ម ក្រោមហេតុផលថា ពួកគេបានញុះញង់រឿងកោះគុត ដែលអាចឈានទៅដល់ការផ្ទុះអាវុធរវាងប្រទេសកម្ពុជា និងថៃ។
នៅថ្ងៃព្រហស្បតិ៍ ទី២១ ខែវិច្ឆិកា ឆ្នាំ២០២៤ នេះ ប្រធានព្រឹទ្ធសភាកម្ពុជា លោក ហ៊ុន សែន លើកឡើងក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី៣២ ឆ្នាំ២០២៤ ថា លោកកំពុងតាមដានសកម្មភាពក្រុមប្រឆាំងដែលកំពុងញុះញង់ពលរដ្ឋខ្មែរម្តងហើយម្តងទៀតឱ្យធ្វើបាតុកម្មប្រឆាំងនឹងរដ្ឋាភិបាលកម្ពុជា ដើម្បីអាចកំណត់បានថា តើល្មមដល់ពេលបង្កើតច្បាប់ដាក់អ្នកទាំងនោះឱ្យក្លាយក្រុមភេរវករហើយឬនៅ។
លោក ហ៊ុន សែន អះអាងថា ទង្វើក្រុមប្រឆាំងនៅពេលនេះមិនមែនត្រឹមតែធ្វើឱ្យមានទំនាស់ផ្ទៃក្នុងរបស់កម្ពុជាទេ ប៉ុន្តែនឹងនាំទៅដល់ការផ្ទុះអាវុធរវាងប្រទេសទាំងពីរថែមទៀត។ លោកថា ការមើលមុខគ្នាមិនត្រង់ជាមួយប្រទេសជិតខាង មិនមែនបញ្ហាតូចតាចឡើយ។
មេដឹកនាំបក្សកាន់អំណាចរូបនេះលើកឡើងថា ការដាក់ពាក្យបណ្ដឹងទៅតុលាការអន្តរជាតិ មិនមែនជារឿងងាយទេ ហើយក៏មិនទាន់ដឹងថានឹងត្រូវការឯកសារផ្លូវច្បាប់ប៉ុនណាដែរសម្រាប់ដាក់ពាក្យបណ្ដឹងលើរឿងនេះ ក្នុងនោះមិនដឹងថាតើកម្ពុជានឹងឈ្នះក្តីនេះ ឬអត់ផងនោះ។
លោក ហ៊ុន សែន ហាមមិនឱ្យកងទ័ពទាំងជើងទឹក និងកងទ័ពជើងគោករបស់កម្ពុជាទាំងអស់ ចល័តកម្លាំងទៅធ្វើសកម្មភាពនៅកោះគុតដាច់ខាតចំពោះរឿងនេះ។
រីឯនាយករដ្ឋមន្ត្រីកម្ពុជា លោក ហ៊ុន ម៉ាណែត លើកឡើងក្នុងពិធីចែកសញ្ញាបត្រជូននិស្សិតសាកលវិទ្យាល័យភូមិន្ទភ្នំពេញ នៅថ្ងៃទី២១ ខែវិច្ឆិកា ឆ្នាំ២០២៤ នេះដែរថា រាជរដ្ឋាភិបាលកម្ពុជានឹងមិនធ្វើឱ្យបាត់បង់ទឹកដីទៅប្រទេសជិតខាងឡើយ។
លោក ហ៊ុន ម៉ាណែត បញ្ជាក់ថា ការដោះស្រាយបញ្ហាព្រំដែន គឺឈរលើយន្តការព្រំដែន និងច្បាប់ដែលកំណត់ជាធរមានដោយផ្អែកលើមូលដ្ឋានជាក់ស្តែងក្នុងការប្រកាន់ជំហរការដោះស្រាយដោយសន្តិវិធី ជៀសវាងការប្រើហិង្សា ខណៈរាជរដ្ឋាភិបាល និងលេខាធិការដ្ឋានកិច្ចការព្រំដែនកម្ពុជា ក៏បានត្រៀមលក្ខណៈគ្រប់គ្រាន់ដើម្បីធ្វើការចរចាជាមួយភាគីថៃ និងគណៈកម្មាធិការព្រំដែនថៃ ដែរ។
យ៉ាងណាក៏ដោយ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត លើកឡើងថា ការស្ដីបន្ទោសរបស់លោក ហ៊ុន ម៉ាណែត និងលោក ហ៊ុន សែន ទៅកាន់ពលរដ្ឋខ្មែរដែលទាមទារឲ្យប្តឹងថៃ រឿងកោះគុត ទៅតុលាការអន្តរជាតិ គឺជាចេតនាបំបែកបំបាក់ស្មារតីខ្មែរ និងខ្មែរ និងនាំឲ្យជាតិខ្មែរចុះខ្សោយផងដែរ។
ទាក់ទិននឹងបញ្ហានេះ កាលពីថ្ងៃទី១៩ ខែវិច្ឆិកា ឆ្នាំ២០២៤ អ្នកនាំពាក្យកងទ័ពជើងទឹកថៃ លោក ថាសុគ្រី វីឡៃឡាក់ បានអះអាងថា កងទ័ពជើងទឹកថៃ ដែលរួមបញ្ចូលទាំងកងទ័ពអាកាស កងឆ្មាំសមុទ្រ កងទ័ពជើងទឹកភូមិភាគទី១ និងអង្គភាពប្រតិបត្តិការកោះគុត គ្រោងធ្វើសមយុទ្ធយោធារួមគ្នាប្រចាំឆ្នាំរយៈពេល ៣ថ្ងៃ ចាប់ពីថ្ងៃទី១០ ដល់ថ្ងៃទី១២ ខែធ្នូ នេះ នៅលើកោះគុត និងដែនសមុទ្រក្បែរនោះ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២០ វិច្ឆិកា ថា មានតុលាការអន្តរជាតិចំនួន ៣ ដែលកម្ពុជាអាចប្តឹងក្នុងការទាមទារយកកោះគុតមកគ្រប់គ្រងវិញ ដូចជា តុលាការយុត្តិធម៌អន្តរជាតិ តុលាការអាជ្ញាកណ្ដាលអន្តរជាតិ និងសាលាក្ដីស្តីអំពីច្បាប់សមុទ្រផងដែរ។
លោកថា ការប្តឹងផ្តល់នេះ កម្ពុជាមានភាគរយឈ្នះខ្ពស់បំផុត ព្រោះសាក្សីក្នុងរឿងនេះគឺបារាំង ដែលធ្លាប់ធ្វើជាអាណាព្យាបាលរបស់កម្ពុជា ហើយភស្តុតាងបញ្ជាក់រឿងនេះ គឺសន្ធិសញ្ញាបារាំង-សៀមឆ្នាំ១៩០៧ ដែលបារាំង បានព្រមព្រៀងគ្នាជាមួយសៀម នៅពេលនោះ។
កាលថ្ងៃទី១៧ ខែមេសា ឆ្នាំ១៩៤១ សង្គ្រាមបារាំង-សៀម បានផ្ទុះឡើងនៅលើកោះចាង ក៏ដោយសារតែបារាំង ការពារកោះគុត មិនឱ្យកងទ័ពថៃ ឈ្លានពានលើដែនអធិបតេយ្យភាពរបស់កម្ពុជាជុំវិញការដណ្តើមកាន់កាប់កោះគុតនេះដែរ៕
© 2024, . All rights reserved.