ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត សម្ដែងការអបអរសាទរព្រះរាជក្រមរបស់ព្រះមហាក្សត្រខ្មែរ សម្តេចព្រះនរោត្តម សីហមុនី ដែលបានប្រកាសធ្វើនិរាករណ៍នូវកិច្ចព្រមព្រៀងតំបន់ត្រីកោណអភិវឌ្ឍន៍ (CLV-DTA) ជាមួយឡាវ និងវៀតណាម នៅពេលនេះ។
លោក ម៉ែន ណាត សរសេរលើគណនីហ្វេសប៊ុករបស់ខ្លួននៅថ្ងៃទី២២ វិច្ឆិកា នេះថា ក្រៅពីលុបកិច្ចព្រមព្រៀងនេះ រដ្ឋាភិបាលកម្ពុជាក៏ត្រូវពិនិត្យ និងលុបចោលកិច្ចព្រមព្រៀងអភិវឌ្ឍន៍ទាំងអស់ក្រោមឆត្រ CLV ផ្សេងទៀតដែរ ដូចជា ដកហូតដីសម្បទានសេដ្ឋកិច្ចពីយោធាវៀតណាម និងក្រុមហ៊ុនវៀតណាម ជាង ២៤ម៉ឺនហិកតាក្នុងតំបន់ CLV នេះ។
ជាមួយគ្នានេះ ក៏ត្រូវបណ្តេញជនអន្តោប្រវេសន៍វៀតណាមខុសច្បាប់ដែលកំពុងសាងសង់ផ្ទះ រស់នៅ និងធ្វើជាកម្មកររាប់ម៉ឺននាក់នៅលើដីសម្បទានសេដ្ឋកិច្ចឲ្យយោធាវៀតណាម និងក្រុមហ៊ុនវៀតណាម ទាំងជាង ២៤ម៉ឺនហិកតានេះដែរ។ លើសពីនេះ ក៏ត្រូវដោះលែងអ្នកជាប់ឃុំឃាំងក្នុងរឿង CLV និងអ្នកទោសមនសិការទាំងអស់ថែមទៀត។
លោក ម៉ែន ណាត លើកឡើងថា ក្រៅពីនេះ កម្ពុជាក៏ត្រូវពិនិត្យ និងអនុម័តលុបចោលនូវសន្ធិសញ្ញាបំពេញបន្ថែមឆ្នាំ២០០៥ និងសន្ធិសញ្ញាព្រំដែនឆ្នាំ២០១៩ បន្តទៀតដែរ ព្រោះការលុបចោលសន្ធិសញ្ញា និងកិច្ចព្រមព្រៀងទាំងនេះ គឺស្របតាមស្មារតីកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ និងរដ្ឋធម្មនុញ្ញត្រង់មាត្រា៥៥ នៃប្រទេសកម្ពុជា។
ប្រធានក្រុមប្រឹក្សាឃ្លាំមើលកម្ពុជារូបនេះសម្ដែងការអរគុណដល់កិច្ចប្រឹងប្រែងរបស់ពលរដ្ឋខ្មែរទាំងអស់នៅជុំវិញពិភពលោក ដែលបានរួមគ្នាជំរុញទាមទារជាច្រើនខែ ដើម្បីឲ្យរដ្ឋាភិបាល និងរដ្ឋសភាកម្ពុជាធ្វើនិរាករណ៍កិច្ចព្រមព្រៀងនេះជាផ្លូវការ ហើយលោកក៏សម្ដែងនូវការអរគុណដល់រាជរដ្ឋាភិបាល និងរដ្ឋសភា ដែលមានស្មារតីភ្ញាក់រឭកចំពោះបញ្ហានេះដែរ។
ព្រះមហាក្សត្រខ្មែរ ព្រះករុណាព្រះបាទសម្ដេចព្រះ បរមនាថ នរោត្តម សីហមុនី បានចេញព្រះរាជក្រមច្បាប់ ស្ដីពី «និរាករណ៍ច្បាប់ស្ដីពីការអនុម័តយល់ព្រមលើកិច្ចព្រមព្រៀងស្ដីពីការជំរុញ និងសម្រួលពាណិជ្ជកម្មតំបន់អភិវឌ្ឍន៍ត្រីកោណកម្ពុជា-ឡាវ-វៀតណាម» ឬជាត់ទុកជាមោឃៈកាលពីថ្ងៃទី២១ ខែវិច្ឆិកា ឆ្នាំ២០២៤។
ព្រះរាជក្រមនេះបញ្ជាក់ថា ច្បាប់ស្ដីពីការអនុម័តយល់ព្រមលើកិច្ចព្រមព្រៀងស្ដីពីការជំរុញ និងសម្រួលពាណិជ្ជកម្មតំបន់អភិវឌ្ឍន៍ត្រីកោណ កម្ពុជា-ឡាវ-វៀតណាម ដែលត្រូវបានប្រកាសឱ្យប្រើដោយព្រះរាជក្រមកាលពីដើមឆ្នាំ២០១៨ ត្រូវទុកជានិរាករណ៍ចាប់ពីពេលនេះតទៅ។
កាលពីថ្ងៃទី៨ ខែវិច្ឆិកា ឆ្នាំ២០២៤ រដ្ឋសភាកម្ពុជាបានអនុម័តលុបចោលនូវកិច្ចព្រមព្រៀងស្ដីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍នេះ ខណៈព្រឹទ្ធសភាក៏បានអនុម័តសេចក្ដីព្រាងច្បាប់ស្ដីពីការអនុម័តលុបចោលកិច្ចព្រមព្រៀងស្ដីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា ឡាវ វៀតណាម ឬហៅកាត់ថា CLV-DTA នៅថ្ងៃទី១៣ ខែវិច្ឆិកា កន្លងទៅដែរ៕
© 2024, . All rights reserved.