មន្ត្រីជាន់ខ្ពស់បក្សប្រឆាំង ជំរុញឱ្យលោក ហ៊ុន សែន និងលោក ហ៊ុន ម៉ាណែត បញ្ជាក់ប្រាប់ពលរដ្ឋខ្មែរឱ្យបានច្បាស់អំពីការលើកឡើងរបស់នាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ ដែលថាកោះគុតជារបស់ថៃ។
អ្នកវិភាគភូមិសាស្ត្រនយោបាយអាស៊ីប៉ាស៊ីហ្វិក និងជាអ្នកជំនាញកិច្ចការការទូតអន្តរជាតិ លោក សេង វណ្ណលី ក៏បានថ្លែងក្នុងកិច្ចសម្ភាសន៍ជាមួយសារព័ត៌មាន The Cambodia Daily ដែរក្នុងកម្មវិធី Idea Talk កាលពីថ្ងៃព្រហស្បតិ៍ ទី២១ ខែវិច្ឆិកា ថា រាជរដ្ឋាភិបាលត្រូវបញ្ជាក់អំពីគោលជំហរប្រទេសកម្ពុជាឲ្យបានច្បាស់ កុំឲ្យពលរដ្ឋខ្មែរមន្ទិលសង្ស័យអំពីបញ្ហាកោះគុត ដែលភាគីថៃ ថាជារបស់គេតាំងពីយូរមកហើយនោះ។
រឿងទាំងអស់នេះ កើតឡើងក្រោមការគ្រប់គ្រង ដឹកនាំរបស់លោក ហ៊ុន សែន ដែលចរចារឿងកោះគុតជាមួយប្រទេសថៃឡង់ដ៍ នៅឆ្នាំ២០០១ ដោយមានការចុះអនុស្សរណៈយោគយល់គ្នាផង។ នាយករដ្ឋមន្ត្រីថៃ អភិសិទ្ធ វេជ្ជជិវៈ (Abhisit Vejjajiva) សម្រេចលុបចោលអនុស្សរណៈយោគយល់គ្នានៅខែវិច្ឆិកា ឆ្នាំ២០០៩ បន្ទាប់ពីលោក ហ៊ុន សែន តែងតាំងអតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ ជាទីប្រឹក្សាសេដ្ឋកិច្ច។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន សរសេរលើទំព័រហ្វេសប៊ុករបស់ខ្លួននៅថ្ងៃទី២២ វិច្ឆិកា នេះថា អតីតនាយករដ្ឋមន្ត្រីខ្មែរលោក ហ៊ុន សែន និងនាយករដ្ឋមន្ត្រីតត្រកូលលោក ហ៊ុន ម៉ាណែត មិនបានបញ្ជាក់ថា មួយចំណែកនៃកោះគុតជារបស់កម្ពុជានោះទេ។
លោកបញ្ជាក់ថា ជាងនេះទៀត ពីរនាក់ឪពុកនិងកូននេះ ក៏មិនបានអះអាងថា កម្ពុជានឹងទាមទារយកមួយចំណែកនៃកោះគុតដែលជាកម្មសិទ្ធិរបស់កម្ពុជាមកវិញដែរ។
មន្ត្រីបក្សប្រឆាំងរូបនេះលើកឡើងថា បើពលរដ្ឋខ្មែរមិនតវ៉ារឿងកោះគុតឱ្យរដ្ឋាភិបាលកម្ពុជាប្តឹងទៅតុលាការអន្តរជាតិទេ លោក ហ៊ុន សែន ប្រាកដជានឹងមិនទាមទារយកចំណែក ២ភាគ៣ នៃកោះគុតពីថៃ មកវិញឡើយ ព្រោះគាត់ខ្លាចប៉ះពាល់ផលប្រយោជន៍ជាមួយបងប្អូនធម៌របស់គាត់ គឺអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់។
លោកបន្តថា បើរដ្ឋាភិបាលខ្មែរប្តឹងថៃ ទៅតុលាការអន្តជាតិ នោះប្រទេសកម្ពុជានឹងឈ្នះថៃ លើកោះគុត ១០០% ដូចករណីប្រាសាទព្រះវិហារដែរ ប៉ុន្តែបើចរចាទ្វេភាគីជាមួយថៃ នោះ ១០០% ប្រទេសកម្ពុជានឹងមិនបានទទួលចំណែកនៃកោះគុតដែលជាទឹកដីរបស់ខ្លួនមកវិញឡើយ។
លោក អ៊ុំ សំអាន បញ្ជាក់ថា បើពលរដ្ឋខ្មែរទាំងគ្រប់និន្នាការនយោបាយមិនក្រោកឡើងឱ្យស្រុះគ្នាទេ នោះត្រកូលហ៊ុននឹងកាត់កោះគុតឱ្យថៃ ដូចលោក ហ៊ុន សែន កាត់កោះត្រល់ឱ្យវៀតណាម កាលពីឆ្នាំ១៩៨២ ដូច្នោះដែរ។
កាលពីថ្ងៃទី២១ ខែវិច្ឆិកា ប្រធានព្រឹទ្ធសភាកម្ពុជា លោក ហ៊ុន សែន លើកឡើងក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី៣២ ឆ្នាំ២០២៤ នេះថា ការដាក់ពាក្យបណ្ដឹងទៅតុលាការអន្តរជាតិមិនមែនជារឿងងាយទេ ហើយក៏មិនទាន់ដឹងថានឹងត្រូវការឯកសារផ្លូវច្បាប់ប៉ុនណាដែរ ក្នុងនោះមិនដឹងថាតើកម្ពុជានឹងឈ្នះក្តីនេះឬអត់ផងនោះ។
លោក ហ៊ុន សែន ចាត់ទុកការជំរុញឱ្យមានការទាមទារកោះគុតដោយការប្តឹងថៃ ទៅតុលាការអន្តរជាតិ ជាទង្វើញុះញង់ អុជអាល ដែលអាចនាំឱ្យមានការផ្ទុះអាវុធរវាងកម្ពុជា និងថៃ។ លោកចង់ធ្វើច្បាប់ប្រជាពលរដ្ឋខ្មែរណាដែលនិយាយរឿងកោះគុតជាភេរវករ។
ចំណែកឯនាយករដ្ឋមន្ត្រីកម្ពុជា លោក ហ៊ុន ម៉ាណែត លើកឡើងកាលពីថ្ងៃទី២១ វិច្ឆិកា ដែរថាការដោះស្រាយបញ្ហាព្រំដែន គឺឈរលើយន្តការព្រំដែន និងច្បាប់ដែលកំណត់ជាធរមានដោយផ្អែកលើមូលដ្ឋានជាក់ស្តែងនិយម ក្នុងការប្រកាន់ជំហរការដោះស្រាយដោយសន្តិវិធី ជៀសវាងការប្រើហិង្សា ខណៈរាជរដ្ឋាភិបាល និងលេខាធិការដ្ឋានកិច្ចការព្រំដែនកម្ពុជា ក៏បានត្រៀមលក្ខណៈគ្រប់គ្រាន់ដើម្បីធ្វើការចរចាជាមួយភាគីថៃ និងគណៈកម្មាធិការព្រំដែនថៃ ដែរ។
យ៉ាងណាក៏ដោយ កាលពីដើមខែវិច្ឆិកា ឆ្នាំ២០២៤ នាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ បានអះអាងទៅកាន់ប្រជាពលរដ្ឋថៃ ថា គ្មានការសង្ស័យទេ កោះគុតជាទឹកដីអធិបតេយ្យរបស់ថៃ ផ្ដាច់មុខទៅហើយ។ នាយករដ្ឋមន្ត្រីថៃ រូបនេះបញ្ជាក់ថា ទាំងថៃ និងកម្ពុជា បានទទួលស្គាល់រួមគ្នារួចហើយថា កោះគុតជាទឹកដីថៃ ក្រោមសន្ធិសញ្ញាបារាំង ដោយភាគីកម្ពុជាមិនបានទាមទារយកកោះនេះឡើយ៕
© 2024, . All rights reserved.