ប្រមុខរាជរដ្ឋាភិបាលកម្ពុជា លោក ហ៊ុន ម៉ាណែត ទទូចឱ្យបណ្តាប្រទេសទាំងអស់បន្តរួបរួមគ្នាដើម្បីកសាងពិភពលោកមួយដែលគ្មានគ្រោះថ្នាក់ដោយសារគ្រាប់មីន។
ថ្លែងក្នុងពិធីបើកកិច្ចប្រជុំកំពូលសៀមរាប-អង្គរ ស្តីអំពី «ពិភពលោកមួយគ្មានមីន» នៅថ្ងៃទី២៥ ខែវិច្ឆិកា នេះ លោកនាយករដ្ឋមន្ត្រី ហ៊ុន ម៉ាណែត អះអាងថា ដើម្បីកសាងពិភពលោកមួយដែលមានសន្តិភាព និងមានសុវត្ថិភាពជាងមុនសម្រាប់មនុស្សបច្ចុប្បន្ន និងសម្រាប់មនុស្សជំនាន់ក្រោយៗ ភាគីទាំងអស់ត្រូវតែបង្កើនកិច្ចខិតខំប្រឹងប្រែងក្នុងការចុះសិក្សា និងបោសសម្អាតគ្រាប់មីន ពង្រីកកម្មវិធីអប់រំ និងការយល់ដឹង និងពង្រីកការផ្តល់ជំនួយដល់ជនរងគ្រោះនៅទូទាំងពិភពលោក។
លោកនាយករដ្ឋមន្ត្រីបានបញ្ជាក់ថា ប្រទេសកម្ពុជាបានធ្លាក់ចូលក្នុងជម្លោះភូមិសាស្ត្រនយោបាយនៃសង្គ្រាមត្រជាក់កាលពី ៥៤ឆ្នាំមុន និងបានឆ្លងកាត់សោកនាដកម្មដ៏សោកសង្រេង មានទាំងការទម្លាក់គ្រាប់បែកយ៉ាងធ្ងន់ធ្ងរជាច្រើនលើក មានទាំងអំពើប្រល័យពូជសាសន៍ និងសង្គ្រាមស៊ីវិលរាប់ទសវត្សរ៍។ ប្រជាជនប្រទេសកម្ពុជារាប់លាននាក់បានបាត់បង់ជីវិត ហើយផ្ទៃដីរាប់ពាន់គីឡូម៉ែត្រក្រឡាកប់រាយប៉ាយដោយគ្រាប់មីន និងសំណល់គ្រាប់មិនទាន់ផ្ទុះផ្សេងទៀត។
លោកថា គ្រាប់មីននៅតែបន្តគំរាមកំហែងធ្ងន់ធ្ងរជីវិតពលរដ្ឋនៃប្រទេសកម្ពុជា និងដំណើរការស្ដារប្រទេសឡើងវិញ។ លើសពីនេះ សង្គ្រាមក៏បង្កផលប៉ះពាល់ធ្ងន់ធ្ងរដល់សតិអារម្មណ៍ និងស្មារតីរបស់ប្រជាពលរដ្ឋខ្មែរដែរ។
លោក ហ៊ុន ម៉ាណែត បន្ថែមថា ការរស់នៅជាមួយគ្រាប់មីន បានធ្វើឱ្យប្រជាជនខ្មែរជាច្រើនមានការលំបាកទទួលយកការពិតនៃសន្តិភាព និងស្រមៃដល់អនាគតដ៏ភ្លឺស្វាងនោះ។ ស្លាកស្នាមដែលគ្រាប់មីនបានបន្សល់ទុក ទាំងផ្លូវកាយ និងផ្លូវចិត្ត គឺជាការរំឭកដ៏រន្ធត់ប្រចាំថ្ងៃអំពីភាពរន្ធត់កាលពីអតីតកាល។
ប្រទេសកម្ពុជាបានបំផ្លាញមីនប្រឆាំងមនុស្សជាង ១លានគ្រាប់ និងសំណល់ជាតិផ្ទុះចំនួន ៣លានគ្រាប់។ មានផ្ទៃដីពោរពេញដោយមីនជាង ៣ពាន់គីឡូម៉ែត្រការ៉េត្រូវបានបោសសម្អាតដោយបានប្រែក្លាយរាជធានី-ខេត្តចំនួន១៥ ក្នុងចំណោម ២៥រាជធានី-ខេត្តជាតំបន់ដែលអស់គ្រាប់មីន។
រីឯចំនួនជនរងគ្រោះក៏បានធ្លាក់ចុះជាមធ្យមពីជាង ៤៣០០នាក់ក្នុង ១ឆ្នាំក្នុងឆ្នាំ១៩៩៦ មកនៅតិចជាង ១០០នាក់ក្នុង ១ឆ្នាំនារយៈពេល ១០ឆ្នាំចុងក្រោយនេះ។ ៨០% នៃផ្ទៃដីដែលត្រូវបានបោសសម្អាតត្រូវបានយកទៅប្រើប្រាស់សម្រាប់វិស័យកសិកម្ម ហើយផ្ទៃដីនៅសល់ត្រូវបានប្រើប្រាស់សម្រាប់លំនៅឋាន និងការអភិវឌ្ឍហេដ្ឋារចនាសម្ព័ន្ធសំខាន់ៗ។
តែទោះជាយ៉ាងនេះក្តី ប្រទេសកម្ពុជានៅមានផ្ទៃដីមានគ្រាប់មីនជាង ១៦០០គីឡូម៉ែត្រក្រឡាដែលបង្កផលប៉ះពាល់ដល់ការរស់នៅរបស់ប្រជាជនប្រមាណ ១លាននាក់៕
© 2024, . All rights reserved.