លោក ប្រាក់ សុខុន បំពេញទស្សនកិច្ចផ្លូវរដ្ឋ ៤ថ្ងៃនៅប្រទេសចិន ក្រោយពីឡើងកាន់តំណែងជាថ្មី

លោក ប្រាក់ សុខុន រដ្ឋមន្ត្រីការបរទេស ធ្វើដំណើរទៅកាន់ប្រទេសចិន ចាប់ពីថ្ងៃទី២៨ ខែវិច្ឆិកា ដល់ថ្ងៃទី០១ ខែធ្នូ ឆ្នាំ២០២៤ តបតាមការអញ្ជើញរបស់ភាគីចិន ក្នុងគោលដៅរឹតចំណងទ្វេភាគីនៃប្រទេសទាំងពីរឱ្យកាន់តែស្អិតល្មួត។

យោងតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា ដំណើរទស្សនកិច្ចនេះ លោក ប្រាក់ សុខុន នឹងមានជំនួបដាច់ដោយឡែកជាមួយរដ្ឋមន្ត្រីការបរទេសចិន លោក វ៉ាង យី និងរដ្ឋមន្ត្រីទំនាក់ទំនងអន្តរជាតិមជ្ឈិមបក្សកុម្មុយនីស្តចិន លោក លីវ ជានឆាវ។ ក្រៅពីនេះ លោក ប្រាក់ សុខុន ក៏គ្រោងជួបបុគ្គលសំខាន់ៗផ្សេងទៀតដែរ។

មុនដំណើរទស្សនកិច្ច ២ថ្ងៃ ពីថ្ងៃទី២៦ ខែវិច្ឆិកា ឆ្នាំ២០២៤ លោក ប្រាក់ សុខុន ក៏បានជួបជាមួយលោក វ៉ាង វិនពីន ឯកអគ្គរដ្ឋទូតចិនប្រចាំកម្ពុជា ដោយបានពិភាក្សាគ្នាពាក់ព័ន្ធនឹងការជំរុញកិច្ចសហប្រតិបត្តិការរវាងប្រទេសទាំងពីរ សំដៅកសាងអនាគតរួមគ្នា និងជជែកគ្នាដើម្បីត្រៀមរៀបចំដំណើរទស្សនកិច្ចរបស់ប្រធានព្រឹទ្ធសភា លោក ហ៊ុន សែន ទៅកាន់ប្រទេសចិន នាពេលខាងមុខនេះផងដែរ។

អ្នកឃ្លាំមើលអះអាងថា ដំណើរទស្សនកិច្ចរបស់លោក ប្រាក់ សុខុន ទៅកាន់ប្រទេសចិន នៅពេលនេះ គ្មានអ្វីក្រៅតែទៅពឹងពាក់ចិន បន្តគម្រោងជីកព្រែកហ្វូណនតេជោតែប៉ុណ្ណោះ បន្ទាប់ពីគម្រោងជីកព្រែកនោះបានជាប់គាំងមិនដំណើរការក្រោយពីសម្ពោធរួច។

ប្រភពដដែលអះអាងថា រដ្ឋាភិបាលកម្ពុជាមិនមានថវិកាដើម្បីសាងសង់គម្រោងព្រែកជីកហ្វូណនតេជោ ដែលធ្វើឱ្យគម្រោងនេះជាប់គាំង។ ភាគីរដ្ឋាភិបាលកុម្មុយនីស្តចិន មិនមានលុយសម្រាប់ផ្ដល់ឱ្យរដ្ឋាភិបាលកម្ពុជាសាងសង់ព្រែកជីកនេះទេ ដូច្នេះហើយទើបលោក ប្រាក់ សុខុន ឡើងទៅអង្វរចិន ឲ្យជួយ។

នេះជាទស្សនកិច្ចក្រៅប្រទេសលើកដំបូងរបស់រដ្ឋមន្ត្រីការបរទេសកម្ពុជា លោក ប្រាក់ សុខុន ក្រោយពីលោកត្រូវបានតែងតាំងជាប្រមុខការទូតកម្ពុជាសាជាថ្មីនៅថ្ងៃទី២០ វិច្ឆិកា៕

នយោបាយ

លោក ប្រាក់ សុខុន បំពេញទស្សនកិច្ចផ្លូវរដ្ឋ ៤ថ្ងៃនៅប្រទេសចិន ក្រោយពីឡើងកាន់តំណែងជាថ្មី

By ឌឹ ខេមបូឌា ដេលី

November 30, 2024