ចលនាប្រជាធិបតេយ្យខ្មែរ (KMD) ចាត់ទុកសកម្មភាពរដ្ឋាភិបាលថៃ ដែលបានសហការជាមួយរដ្ឋាភិបាលកម្ពុជា ចាប់ខ្លួនជនភៀសខ្លួននយោបាយខ្មែរនៅពេលនេះ គឺជាដៃគូដែលត្រូវបានបង្កើតឡើងដើម្បីដោះដូរការគាបសង្កត់ជនភៀសខ្លួននយោបាយនៅក្នុងតំបន់។
ចលនាខ្មែរដើម្បីលទ្ធិប្រជាធិបតេយ្យ (Khmer Movement for Democracy) ចេញសេចក្តីប្រកាសព័ត៌មាននៅថ្ងៃទី២៨ វិច្ឆិកា នេះថា សកម្មភាពនៃការគាបសង្កត់ឆ្លងដែនដែលរដ្ឋាភិបាលថៃ បានសហការជាមួយរដ្ឋាភិបាលកម្ពុជា គឺជាទង្វើរំលោភបំពានយ៉ាងខ្លាំងលើអនុសញ្ញារបស់អង្គការសហប្រជាជាតិស្ដីពីការធ្វើទារុណកម្មដែលប្រទេសថៃ បានអនុម័តកាលពីឆ្នាំ២០០៧ កន្លងទៅ។
KMD បញ្ជាក់ថា សកម្មជនដែលត្រូវបានចាប់ខ្លួនបញ្ជូនទៅកម្ពុជា ឱ្យរដ្ឋាភិបាលខ្មែរដាក់ទោសទាំងនោះ សុទ្ធតែជាអ្នកគាំទ្រគណបក្សសង្គ្រោះជាតិ ដែលក្នុងចំណោមនោះក៏មានអ្នកធ្លាប់ជាប់ពន្ធនាគារកាលពីអំឡុងឆ្នាំ២០២១ ម្តងរួចមកហើយក្រោមការគាបសង្កត់របស់រដ្ឋាភិបាលខ្មែរ។
ចលនាខ្មែរដើម្បីលទ្ធិប្រជាធិបតេយ្យ អំពាវនាវឱ្យរដ្ឋាភិបាលជាដៃគូទាំងអស់ជំរុញឱ្យរដ្ឋាភិបាលថៃ បំពេញកាតព្វកិច្ចផ្លូវច្បាប់ក្នុងស្រុក និងអន្តរជាតិ ដើម្បីបញ្ចប់នូវអំពើនៃការគាបសង្កត់ឆ្លងដែនដែលរដ្ឋាភិបាលថៃ កំពុងសហការជាមួយរដ្ឋាភិបាលកម្ពុជានៅពេលនេះ។
កាលពីថ្ងៃទី២៧ ខែវិច្ឆិកា ឆ្នាំ២០២៤ អគ្គនាយកដ្ឋានពន្ធនាគារកម្ពុជាបានអះអាងថា សកម្មជននយោបាយបក្សប្រឆាំងភៀសខ្លួនទៅរស់នៅលើទឹកដីថៃ ទាំង ៦នាក់ ដែលត្រូវបានចាប់ខ្លួន បានបញ្ជូនទៅដល់ប្រទេសកម្ពុជាហើយនៅពេលនេះ និងត្រូវបានកាត់ទោសពីបទ «ក្បត់ជាតិ» ដែលប្រឈមនឹងការជាប់គុកចាប់ពី ៧ឆ្នាំដល់ ៣០ឆ្នាំ។
កាលពីថ្ងៃទី២៤ ខែវិច្ឆិកា អាជ្ញាធរថៃ បានចាប់បញ្ជូនសកម្មជននយោបាយខ្មែរចំនួន ៦នាក់ នៅខេត្តប៉ាធុមធានី (Pathum Thani) ប្រទេសថៃ ទៅដាក់ពន្ធនាគារនៅប្រទេសកម្ពុជា តាមការស្នើរបស់អាជ្ញាធរខ្មែរ បើទោះបីជាមានការស្នើសុំពីអង្គការសហប្រជាជាតិកុំឱ្យបញ្ជូនពួកគេទៅប្រទេសកម្ពុជាវិញក៏ដោយ។
ទាក់ទិននឹងបញ្ហានេះ នាយកប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស អ្នកស្រី Elaine Pearson លើកឡើងថា «អាជ្ញាធរថៃ បានបង្កើនការចូលរួមនៅក្នុង ‘Swap Mart ឬផ្សារជួញដូរ ក្នុងប្រទេសថៃ ជាមួយរដ្ឋាភិបាលប្រទេសជិតខាង ដើម្បីផ្លាស់ប្ដូរអ្នកប្រឆាំងគ្នាទៅវិញទៅមកដោយខុសច្បាប់ ក្នុងនោះក៏មានប្រទេសកម្ពុជា ដែរ»៕
© 2024, . All rights reserved.