អង្គភាពប្រឆាំងអំពើពុករលួយ (ACU) បញ្ជូនស្ត្រីពីររូបទៀតទៅតុលាការភ្នំពេញ ដើម្បីចាត់វិធានការតាមផ្លូវច្បាប់ ពាក់ព័ន្ធនឹងការយកលុយ ៣០ម៉ឺនដុល្លារទៅឲ្យលោក លី សាម៉េត អតីតទីប្រឹក្សាលោក ហ៊ុន សែន ដើម្បីរត់ការយកតំណែងជាមន្ត្រីគយឱ្យកូន។
អ្នកនាំពាក្យអង្គភាពប្រឆាំងអំពើពុករលួយ លោក សយ ច័ន្ទវិចិត្ត បានប្រាប់អ្នកសារព័ត៌មានថា នៅថ្ងៃទី២៩ ខែវិច្ឆិកា នេះក្រុមជំនាញ ACU សម្រេចបញ្ជូនស្ត្រីពីរនាក់ទៅតុលាការ។ លោកថា ស្ត្រីទាំងពីរនាក់នេះពាក់ព័ន្ធនឹងការប៉ុនប៉ងសូកប៉ាន់ ដោយប្រើប្រាស់លុយ ៣០ម៉ឺនដុល្លាររកកន្លែងឱ្យកូនបានចូលធ្វើគយនៅខេត្តបាត់ដំបង ដែលជាប់ពាក់ព័ន្ធបន្តក្នុងសំណុំរឿងលោក លី សាម៉េត។
លោក សយ ច័ន្ទវិចិត្ត បានបន្ថែមថា អង្គភាព ACU បានឃាត់ខ្លួនស្ត្រីពីររូបនៅថ្ងៃទី២៧ វិច្ឆិកា គឺអ្នកស្រី ឆាយ សុវណ្ណារី និងអ្នកស្រី ហ៊ើង ទិត្យរាត្រីល័ក្ខណ៍។ ស្ត្រី ២នាក់នោះដែលជាអ្នកនាំយកលុយចរចាជាមួយលោក មួង ឃីម និងលោក លី សាម៉េត។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានថ្លែងនៅថ្ងៃទី២៨ ខែវិច្ឆិកា ឆ្នាំ២០២៤ ក្នុងកិច្ចប្រជុំក្រុមប្រឹក្សាជាតិប្រឆាំងអំពើពុករលួយថា ករណីប៉ុនប៉ងសូកប៉ាន់ប្រព្រឹត្តដោយលោក មួង ឃីម និងបក្សពួកឲ្យយុវជនម្នាក់ទើបជាប់បរិញ្ញាបត្រ ឲ្យបានចូលក្របខ័ណ្ឌគយ ហើយឲ្យបានធ្វើគយនៅខេត្តបាត់ដំបង ជាថ្នូរនឹងប្រាក់ ៣០ម៉ឺនដុល្លារអាមេរិក។
លោកបន្តថា រាល់ករណីប៉ុនប៉ងសូកប៉ាន់ខាងលើបានបរាជ័យមិនអាចសម្រេច ដោយថ្នាក់លើមិនដែលធ្វើការតែងតាំងមន្ត្រីដោយសំណូកឡើយ។
ជុំវិញសំណុំរឿងលោក លី សាម៉េត គិតត្រឹមថ្ងៃទី២៩ ខែវិច្ឆិកា ឆ្នាំ២០២៤ នេះ សមត្ថកិច្ចបានឃាត់ខ្លួនអ្នកជាក់ពាក់ព័ន្ធ ៧នាក់ហើយ រួមមាន លោក អ៊ុត ធី, លោក មួង ឃីម, លោក ដួង តារា, លោក ឡាយ វិសិដ្ឋ, លោក កន សុខកាយ, អ្នកស្រី ឆាយ សុវណ្ណារី និងអ្នកស្រី ហ៊ើង ទិត្យរាត្រីល័ក្ខណ៍។
ការឃាត់ខ្លួននេះ ក្រោយពីលោក ហ៊ុន សែន បានសរសេរសារនៅលើទំព័រហ្វេសប៊ុករបស់លោកកាលពីថ្ងៃទី០៧ ខែតុលា ឆ្នាំ២០២៤ ថា លោក លី សាម៉េត បានប្រើឈ្មោះរបស់លោកទៅបោកប្រាស់លុយគេរាប់សែនរាប់លានដុល្លារ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ បានសរសេរលើគណនីហ្វេសប៊ុករបស់ខ្លួនកន្លងមកថា អំពើឧក្រិដ្ឋកម្មបោកប្រាស់របស់ឧកញ៉ា លី សាម៉េត ត្រូវស៊ើបអង្កេតលើប្រធានគណបក្សប្រជាជនកម្ពុជា លោក ហ៊ុន សែន តែម្តង៕
© 2024, . All rights reserved.