មន្ត្រីជាន់ខ្ពស់ក្នុងក្រសួងបរិស្ថាន ទទូចឱ្យនាយករដ្ឋមន្ត្រីកម្ពុជា លោក ហ៊ុន ម៉ាណែត និងមេដឹកនាំបក្សកាន់អំណាច លោក ហ៊ុន សែន ដកតំណែងលោក អ៊ាង សុផល្លែត ចេញពីរដ្ឋមន្ត្រីក្រសួងបរិស្ថាន ព្រោះរដ្ឋមន្ត្រីរូបនេះធ្វើឱ្យបែកបាក់ផ្ទៃក្នុងរបស់ក្រសួង ដោយការប្រើអំណាចគាបសង្កត់មន្ត្រីថ្នាក់ក្រោម។
មន្ត្រីជាន់ខ្ពស់ក្នុងក្រសួងបរិស្ថាន បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី៣ ធ្នូ នេះថា ការដឹកនាំក្រសួងបរិស្ថានរបស់លោក អ៊ាង សុផល្លែត ជាង ១ឆ្នាំមកនេះ កំពុងធ្វើឱ្យបាត់ទំនុកចិត្តពីមន្ត្រីក្នុងក្រសួងជាបន្តបន្ទាប់ ដោយសារតែការដឹកនាំការងារក្នុងក្រសួងមិនបានល្អ ជាមនុស្សឆេវឆាវ អំនួត និងមានអត្តចរិតជាអភិជនចំពោះមន្ត្រីថ្នាក់ក្រោម។
ប្រភពមន្ត្រីដដែលលើកឡើងថា ការដាក់ចេញនូវ “យុទ្ធនាការថ្ងៃនេះ ខ្ញុំមិនប្រើប្រាស់ថង់ប្លាស្ទិកទេ” ដែលត្រូវអនុវត្តការងារដោយការដើររើសសំរាម និង “យុទ្ធនាការបណ្ដុះកូនឈើ ១០ម៉ឺនដើមសម្រាប់មួយមន្ទីរក្នុងមួយឆ្នាំ” ដោយគ្មានការផ្តល់ថវិកាពីក្រសួង ត្រូវរដ្ឋមន្ត្រីរូបនេះប្រើប្រាស់ជាវិធានការសម្រាប់ដកតំណែងមន្ត្រីថ្នាក់ក្រោមដែលខ្លួនមិនពេញចិត្តចេញប៉ុណ្ណោះ។
មន្ត្រីក្រសួងបរិស្ថានទាំងនេះបញ្ជាក់ថា លោក អ៊ាង សុផល្លែត បានប្រើអំណាចដកតំណែងមន្ត្រីគ្មានកំហុសតាមអំពើចិត្ត ដោយគ្មានការស៊ើបអង្កេតពីក្រុមប្រឹក្សាវិន័យអ្វីទាំងអស់ ដូច្នេះប្រសិនបើរដ្ឋមន្ត្រីរូបនេះនៅតែបន្តកាន់តួនាទីដោយការគាបសង្កត់មន្ត្រីថ្នាក់ក្រោមដូចពេលកន្លងមកទៀត មន្ត្រីក្នុងក្រសួងច្បាស់ជាងើបឡើងបាតុកម្មតវ៉ានៅថ្ងៃណាមួយជាមិនខាន។
លោក អ៊ាង សុផល្លែត ដែលត្រូវជាកូនប្រសាមន្ត្រីជាន់ខ្ពស់ក្នុងជួរបក្សកាន់អំណាច លោក ជា សុផារ៉ា ត្រូវបានតែងតាំងជារដ្ឋមន្ត្រីក្រសួងបរិស្ថាន ក្នុងព្រះរាជក្រឹត្យតែងតាំងសមាសភាពរាជរដ្ឋាភិបាលអាណត្តិទី៧ កាលពីថ្ងៃទី២២ ខែសីហា ឆ្នាំ២០២៣ កន្លងទៅ ដែលគិតមកទល់នឹងពេលនេះ គឺមានរយៈពេល ១៥ខែហើយ។
ក្នុងរយៈពេលជាង ១ឆ្នាំមកនេះ រដ្ឋាភិបាលអាណត្តិថ្មីនេះបានកែសម្រួលសមាសភាពសមាជិកគណៈរដ្ឋមន្ត្រីចំនួន ២លើករួចមកហើយ គឺដកតំណែងរដ្ឋមន្ត្រីក្រសួងទេសចរណ៍ លោក សុខ សូកេន ដោយសារការប្រព្រឹត្តអំពើពុករលួយ និងការប្រកាន់បក្ខពួក និងការដកតំណែងរដ្ឋមន្ត្រីក្រសួងការបរទេស និងកិច្ចសហប្រតិបត្តិការអន្តរជាតិ លោក សុខ ចិន្តាសោភា ក្រោមហេតុផលដើម្បីពង្រឹងការដឹកនាំក្រសួង និងប្រសិទ្ធភាពការងារ។
ជុំវិញបញ្ហានេះ សារព័ត៌មាន The Cambodia Daily នៅមិនទាន់អាចទាក់ទងសុំការបំភ្លឺពីលោក អ៊ាង សុផល្លែត បាននៅឡើយទេរហូតដល់ម៉ោងផ្សាយនេះ៕
© 2024, . All rights reserved.