មន្ត្រីជាន់ខ្ពស់ក្រសួងការងារ អះអាងថា បញ្ហាប្រព័ន្ធអនុគ្រោះពន្ធ (EBA) នឹងមិនជះឥទ្ធិពលធ្ងន់ធ្ងរដល់កម្ពុជានោះទេ ប៉ុន្តែស្នើឲ្យសភាអឺរ៉ុប គួរតែពិចារណាអំពីទំនាក់ទំនងល្អ និងផលប្រយោជន៍រវាងប្រជាជាតិអឺរ៉ុប និងកម្ពុជា ប្រសើរជាង។
អ្នកនាំពាក្យក្រសួងការងារ លោក កត្តា អ៊ន អះអាងថា តួលេខនៃការនាំចេញផលិតផលវាយនភណ្ឌកាត់ដេរមានការកើនឡើងក្នុងរង្វង់ ២៤% បើប្រៀបធៀបទៅឆ្នាំ២០២៣។
ប្រភពដដែលអះអាងថា កម្ពុជាបានត្រៀមខ្លួនរួចស្រេចដើម្បីក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ដូច្នេះកម្ពុជានឹងឈប់ទទួលបានប្រព័ន្ធអនុគ្រោះ EBA នេះជាផ្លូវការនៅពេលខាងមុខ។
លោក កត្តា អ៊ន ថ្លែងថា សេដ្ឋកិច្ចកម្ពុជាមានភាពសម និងមិនមានបញ្ហាប្រឈមច្រើនទេ ហើយការស្នើរបស់សភាអឺរ៉ុប លោកយល់ថាអឺរ៉ុបគួរពិចារណាពីទំនាក់ទំនងល្អ និងផលប្រយោជន៍រវាងប្រជាជាតិអឺរ៉ុប និងកម្ពុជា ប្រសើរជាង ព្រោះប្រព័ន្ធ EBA នេះវាផ្តល់ផលប្រយោជន៍ដល់ប្រជាជាតិទាំងសងខាង។
អ្នកតាមដានភូមិសាស្ត្រនយោបាយនៅតំបន់អាស៊ីអាគ្នេយ៍ លោក សេង វណ្ណលី បានប្រាប់សារព័ត៌មាន The Cambodia Daily កាលពីពេលកន្លងមកថា បើកម្ពុជាបាត់បង់ប្រព័ន្ធអនុគ្រោះពន្ធបន្ថែមទៀត នោះអ្នកវិនិយោគបរទេសដែលកំពុងបណ្ដាក់ទុននៅកម្ពុជានឹងចាកចេញពីកម្ពុជា ប្តូរទៅរកស៊ីនៅប្រទេសផ្សេងៗវិញ។
លោកថា ចំណែកអ្នកវិនិយោគដែលត្រៀមទៅរកស៊ីនៅកម្ពុជា ក៏នឹងមិនហ៊ានទៅបណ្ដាក់ទុនវិនិយោគនៅកម្ពុជាដែរ ព្រោះអ្វីដែលពួកគេសង្ឃឹមពីការបណ្ដាក់ទុននេះ គឺដោយសារតែមានការបើកចំហពីទីផ្សារអឺរ៉ុប និងអាមេរិកកន្លងមក ជាពិសេសប្រព័ន្ធអនុគ្រោះពន្ធដែលគេបានផ្តល់ឱ្យកម្ពុជារហូតមកនោះ។
លោក សេង វណ្ណលី លើកឡើងថា បើកម្ពុជាមិនព្យាយាមរក្សាប្រព័ន្ធអនុគ្រោះពន្ធដែលនៅសេសសល់ ៨០% នេះឱ្យនៅគង់វង្សទេ នោះកម្ពុជាក៏កាន់តែចង្អៀតក្នុងការទាក់ទាញអ្នកវិនិយោគឱ្យទៅរកស៊ីនៅក្នុងប្រទេសរបស់ខ្លួនកាន់តែខ្លាំងបន្ថែមទៀតដែរ។
កាលពីខែសីហា ឆ្នាំ២០២០ គណៈកម្មាធិការអឺរ៉ុប បានសម្រេចផ្ដាច់ EBA ពីកម្ពុជា ២០%។ នៅថ្ងៃទី២៨ ខែវិច្ឆិកា ឆ្នាំ២០២៤ នេះ សភាអឺរ៉ុប បានសើរើសំណុំរឿង EBA ជំរុញឱ្យគណៈកម្មការអឺរ៉ុបពិនិត្យឡើងវិញដែលនៅសល់ចំនួន ៨០% ទៀត។ សភាអឺរ៉ុប ជំរុញឱ្យមានការពិនិត្យបន្ថែមលើការដាក់ទណ្ឌកម្មក្រុមមន្ត្រីកម្ពុជាដែលពាក់ព័ន្ធនឹងការរំលោភសិទ្ធិមនុស្ស។
សភាអឺរ៉ុប សង្កេតឃើញស្ថានភាពសង្គមស៊ីវិលនៅកម្ពុជាកាន់តែរួមតូចទៅ ហើយបានអំពាវនាវឱ្យមានការដោះលែងអ្នកទោសនយោបាយ សកម្មជននានា រួមទាំងបញ្ឈប់ការធ្វើទុក្ខបុកម្នេញលើពួកគេ និងក្រុមសង្គមស៊ីវិល។
ប្រភពដដែលអំពាវនាវឱ្យអាជ្ញាធរកម្ពុជាទម្លាក់ចោលរាល់បទចោទដែលមានចរិតនយោបាយប្រឆាំងនឹងអង្គការសង់ត្រាល់ (CENTRAL) និងសមាជិកអង្គការនេះផងដែរ៕
© 2024, . All rights reserved.