អគ្គនាយកក្រុមហ៊ុន Maritime Group អ្នកឧកញ៉ា ហេង សិទ្ធី ដែលធ្លាប់បានអំពាវនាវឲ្យលោក ហ៊ុន ម៉ាណែត ចាត់វិធានការជាបន្ទាន់ទៅលើបុរសជនជាតិសិង្ហបុរីសញ្ជាតិខ្មែរ ឈ្មោះ Phua Gek Seng ហៅ Tak ដែលលោកអះអាងថាបានប្រើប្រាស់ប្រទេសកម្ពុជា ដើម្បីប្រតិបត្តិការកាស៊ីណូអនឡាញ និងលាងលុយនោះ បានដាក់ជាចម្ងល់ថា អស់រយៈពេល ១០ថ្ងៃមកហើយ អាជ្ញាធរនៅតែមិនទាន់អាចចាត់វិធានការផ្លូវច្បាប់ទៅលើបុរសរូបនោះនៅឡើយទេ ដោយបណ្តែតបណ្តោយឲ្យឧក្រិដ្ឋជនដើរហើរយ៉ាងមានសេរីភាពធ្វើព្រងើយ។
អ្នកឧកញ៉ា ហេង សិទ្ធី បានបង្ហោះសារនៅលើទំព័រហ្វេសប៊ុកឈ្មោះ ហេង សិទ្ធី ដើម្បីប្រជាជនកម្ពុជា នៅថ្ងៃទី៤ ខែធ្នូ ឆ្នាំ២០២៤ ថា «ល្បែងអនឡាញ និងកន្លែងរកស៊ីបោកប្រាស់អនឡាញគរដូចភ្នំបិទយ៉ាងម៉េច បើយូរហើយអត់ចាប់! ឥឡូវជនជាតិសិង្ហបុរីនោះហោះហើរដើរលេងធ្វើព្រងើយ។»
ប្រភពដដែលបានសរសេរថា «ចាប់តាំងពីលោកបានបង្ហាញភស្តុតាងជាសាធារណៈមក គឺមានរយៈពេលដប់ថ្ងៃហើយ។ កន្លែងដែលគេធ្វើសកម្មភាពនៅបឹងកេងកង នោះ បានបិទហើយ ប៉ុន្តែប្រមូលទៅផ្ទះនៅផ្លូវថៃហ្គឺ។ ចុះបើមានការសង្ស័យហើយ ឲ្យឧក្រិដ្ឋជនជនជាតិសាំងហ្គាពួរសញ្ជាតិខ្មែរ ចេញយ៉ាងម៉េច? ហោះថ្ងៃណា ទៅណា ចាំឲ្យខ្ញុំប្រាប់វិញ ឬយ៉ាងម៉េច?»
អ្នកឧកញ៉ារូបនោះបានចោទជាសំណួរថា «បើមិនហ៊ានចាប់ស្មើនឹងអ្វី? តិចទៀតទាល់តែគេដឹកឡានរបស់គេ និងកប៉ាល់របស់គេដែលចតនៅកំពង់សោមចេញ ទើបសមត្ថកិច្ចបានទៅដល់ហើយឆ្លើយថាអត់ឃើញមែន?»
អ្នកឧកញ៉ា ហេង សិទ្ធី បានសរសេរបន្ថែមទៀតថា ពេលដែលលោកបង្ហាញព័ត៌មានហើយ បុរសជនជាតិសិង្ហបុរីសញ្ជាតិខ្មែរឈ្មោះ Phua Gek Seng ហៅ Tak នៅតែអាចទៅចូលរួមកម្មវិធី Gumble 3000 និងនៅអាចឡើងលើឆាកទទួលពានរង្វាន់ Guinness world record ថែមទៀត។ លោកថា បើមិនហានបង្ក្រាបទេ នោះរដ្ឋាភិបាលកម្ពុជាទាំងមូលនឹងខ្មាសគេពេញ ASEAN ព្រោះមិនត្រឹមតែប្រជាជនខ្មែរទេដែលរងគ្រោះ ប៉ុន្តែប្រជាជនក្នុងតំបន់អាស៊ានច្រើនណាស់នឹងរងគ្រោះ។
លោកអះអាងថា រដ្ឋាភិបាលខំទៅហៅគេមកវិនិយោគ បើអាជ្ញាធរធ្វើតែអ៊ីចឹង នោះអ្នកវិនិយោគគេមកហើយ ក៏ទៅវិញអស់។ លោកបន្តថា លោកបានជួយដាក់ពាក្យបណ្តឹងទៅកាន់ប៉ូលិសសិង្ហបុរី រួចហើយ ហើយថានេះជាសារចុងក្រោយ។ ម្យ៉ាងទៀត លោកក៏មិនរំលឹកទៀតដែរ បើយល់ថាធ្វើទៅចំណេញ ធ្វើតាមហ្នឹងចុះ។
កន្លងមក អ្នកឧកញ៉ា ហេង សិទ្ធី បានបង្ហោះសារដោយជម្រាបជូនលោក ហ៊ុន ម៉ាណែត ថាមានប្រតិបត្តិការកាស៊ីណូអនឡាញធំជាងគេ ដែលបុរសជនជាតិសិង្ហបុរីសញ្ជាតិខ្មែរឈ្មោះ Phua Gek Seng ហៅ Tak កំពុងប្រើប្រទេសកម្ពុជាជាមូលដ្ឋានដើម្បីលាងលុយ និងបោកប្រាស់ពលរដ្ឋស្លូតត្រង់រាប់លាននាក់ រួមទាំងពលរដ្ឋខ្មែរ ថៃ ឡាវ មីយ៉ាន់ម៉ា តួកគី ចិន កូរ៉េ តៃវ៉ាន់ និងឥណ្ឌូនេស៊ី។
អ្នកឧកញ៉ា ហេង សិទ្ធី សរសេរថា លោកឧត្ដមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិក្រសួងមហាផ្ទៃ ជាអ្នកបញ្ជាឲ្យលោកឧត្ដមសេនីយ៍ទោ ប៉ុល រតនា អនុប្រធាននាយកដ្ឋានព្រហ្មទណ្ឌក្រសួងមហាផ្ទៃ លោកវរសេនីយ៍ទោ វុធ ស៊ែល អនុប្រធាននាយកដ្ឋាននគរបាលព្រហ្មទណ្ឌ ជាអ្នកការពារជនជាតិសិង្ហបុរី ដែលកំពុងរកស៊ីឆបោកលុយតាមអនឡាញមានឈ្មោះហៅក្រៅថា Tak (តាក់) នោះ៕
© 2024, . All rights reserved.