អ្នកស្រាវជ្រាវខាងការអភិវឌ្ឍផ្នត់គំនិត លោក សេក សុជាតិ លើកឡើងថា ញត្តិចំហរបស់អង្គការចលនាមាតាធម្មជាតិកម្ពុជាទៅកាន់ពលរដ្ឋខ្មែរ គឺជាសារដាស់តឿនមួយសម្រាប់រដ្ឋាភិបាល ត្រូវកែលម្អលើកស្ទួយសិទ្ធិមនុស្សឡើងវិញ ដើម្បីលុបបំបាត់រូបភាពកាន់តែអាក្រក់នៅលើឆាកអន្តរជាតិ។
អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១១ ធ្នូ នេះថា ការប្រើវិធានការរឹតត្បិតលើសកម្មជនបរិស្ថាន និងសកម្មជនដទៃទៀតដោយការចាប់ចងដើម្បីបំបិទសំឡេងរបស់ពួកគេ មិនមែនជាមធ្យោបាយល្អសម្រាប់រដ្ឋាភិបាលខ្លួនឯងទេ ព្រោះសហគមន៍អន្តរជាតិក៏នឹងដាក់សម្ពាធ ឬទណ្ឌកម្មលើរដ្ឋាភិបាលដូចគ្នា។
លោកថា អ្នកដែលខាតពិតប្រាកដ គឺរដ្ឋាភិបាលខ្លួនឯងប៉ុណ្ណោះ ត្បិតក្រោមវិធានការដ៏តានតឹងនេះ នឹងធ្វើឱ្យបាត់នូវសំឡេងការពារបរិស្ថាន បាត់នូវសំឡេងការពារសិទ្ធិមនុស្ស និងបាត់នូវសំឡេងការពារប្រជាធិបតេយ្យ ជាដើម ខណៈផលប្រយោជន៍ដែលកម្ពុជាធ្លាប់ទទួលបានពីបណ្តាប្រទេសដែលជំរុញឱ្យកម្ពុជាគោរពសិទ្ធិមនុស្ស និងលទ្ធិប្រជាធិបតេយ្យនោះ ក៏ត្រូវបាត់បង់ដូចគ្នាដែរ។
លោក សេក សុជាតិ លើកឡើងថា កង្វល់របស់សហគមន៍អន្តរជាតិកន្លងមក ទាំងការរិះគន់ និងការដាក់ទណ្ឌកម្មណាមួយក៏ដោយ គឺគ្រាន់តែមានបំណងចង់ឱ្យរដ្ឋាភិបាលកម្ពុជាក្លាយជាដៃគូសហការក្នុងការអភិវឌ្ឍ ការការពារសិទ្ធិមនុស្ស និងការការពារលទ្ធិប្រជាធិបតេយ្យ ដែលជាគុណប្រយោជន៍សម្រាប់ពលរដ្ឋខ្មែរប៉ុណ្ណោះ។
លោកបញ្ជាក់ថា អ្នកទោសមនសិការ សកម្មជនសង្គមនានា ជាពិសេសយុវជនបរិស្ថានដែលកំពុងត្រូវបានឃុំខ្លួននាពេលនេះ មានចំណែកគុណសម្បត្តិដ៏ធំធេងក្នុងការការពារធនធានធម្មជាតិរបស់កម្ពុជា ជុំវិញការការពារបរិស្ថានដែលត្រូវបានបំផ្លិចបំផ្លាញក្រោមរូបភាពនៃការអភិវឌ្ឍ និងការវិនិយោគដែលអនុញ្ញាតដោយរដ្ឋាភិបាលរហូតមក។
កាលពីថ្ងៃទី១០ ខែធ្នូ ឆ្នាំ២០២៤ ចលនាមាតាធម្មជាតិកម្ពុជា បានចេញញត្តិចំហមួយទៅកាន់ពលរដ្ឋខ្មែរជុំវិញការការឃុំខ្លួនសកម្មជនបរិស្ថានពីសំណាក់រដ្ឋាភិបាលកម្ពុជា ថា សកម្មជនចលនាមាតាធម្មជាតិ រួមមាន លោក លី ចាន់ដារ៉ាវុត កញ្ញា ភួន កែវរស្មី កញ្ញា ឡុង គន្ធា លោក ថុន រដ្ឋា និងលោក យីម លាងហ៊ី ត្រូវបានរបបសន្តិភាពឃុំខ្លួនទាំងអយុត្តិធម៌ចាប់ពី ៦ឆ្នាំទៅ ៨ឆ្នាំ ដែលជាអំពើរំលោភសិទ្ធិមនុស្សយ៉ាងសាហាវយង់ឃ្នងបំផុត។
គិតមកទល់នឹងពេលនេះ គឺមានរយៈពេល ១៦១ថ្ងៃហើយ ចាប់តាំងពីពួកគេត្រូវបានសមត្ថកិច្ចចាប់ខ្លួនកាលពីដើមខែកក្កដា មក។
ចលនាមាតាធម្មជាតិ លើកឡើងថា ការដឹកនាំក្រោមរបបសន្តិភាពនៅកម្ពុជាសព្វថ្ងៃនេះ បានប្រែក្លាយកម្ពុជាទៅជារបបមួយជា គុកឥតជញ្ជាំង ទៅហើយ ដែលជារបបសង្កត់សង្កិន ចាប់ចងអ្នកការពារសិទ្ធិមនុស្ស ជាពិសេសយុវជនដែលហ៊ាននិយាយពីបញ្ហាប្រទេសជាតិរបស់ខ្លួន។
ទិន្នន័យសង្គមស៊ីវិល បង្ហាញថា ចាប់តាំងពីអំឡុងខែកក្កដា ឆ្នាំ២០២៤ មក រដ្ឋាភិបាលកម្ពុជាបានចាត់វិធានការក្តៅចាប់ខ្លួនពលរដ្ឋដែលបញ្ចេញមតិរិះគន់ការដឹកនាំរបស់ខ្លួនជាបន្តបន្ទាប់ ទាំងសកម្មជននយោបាយ សកម្មជនសង្គម និងអ្នកសារព័ត៌មាន ជាដើម សូម្បីពលរដ្ឋខ្មែរដែលរស់នៅលើទឹកដីថៃ ក៏ត្រូវមេដឹកនាំបក្សកាន់អំណាច លោក ហ៊ុន សែន បញ្ជាឱ្យចាប់ខ្លួនបញ្ជូនទៅប្រទេសកម្ពុជាវិញដែរ៕
© 2024, . All rights reserved.