អ្នកឧកញ៉ា ទ្រី ភាព អគ្គនាយកក្រុមហ៊ុន ទ្រី ភាព គ្រុប ដែលត្រូវបានអង្គការសង្គមស៊ីវិលជាតិ និងអន្តរជាតិធ្វើការចោទប្រកាន់ថាជាឧក្រិដ្ឋជនបំផ្លាញព្រៃឈើនៅស្រុកខ្មែរ ដោយជ្រកក្រោមសិទ្ធិវិនិយោគលើដីសម្បទានសេដ្ឋកិច្ចដើម្បីធ្វើការកាប់បំផ្លាញព្រៃឈើនាំទៅក្រៅប្រទេស ត្រូវបានគេរកឃើញថា ក្រុមហ៊ុន ទ្រី ភាព ស្ថិតក្នុងតំបន់សេដ្ឋកិច្ចពិសេស MDS «ថ្មដា» មានបុគ្គលិក ១ម៉ឺននាក់ ភាគច្រើនជាជនជាតិចិន ជនជាតិថៃ និងជនជាតិវៀតណាម កំពុងរកស៊ីឧក្រិដ្ឋកម្មអនឡាញខ្នាតធំដោយគ្មានអាជ្ញាធរហ៊ានចុះបង្ក្រាប។
ស្តេចគ្រញូងដែលគេស្គាល់គ្រប់គ្នាថា អ្នកឧកញ៉ា ទ្រី ភាព ជាមេឧក្រិដ្ឋជនព្រៃឈើ និងមិនចេះអក្សរ មានទ្រព្យសម្បត្តិដ៏មហាសាលសរុបត្រួសៗប្រមាណ ១២៧៣លានដុល្លារអាមេរិក វិនិយោគក្នុងក្រុមហ៊ុន ទ្រី ភាព គ្រុប។ ក្រុមហ៊ុននេះមានគម្រោងសាងសង់សណ្ឋាគារ និងកាស៊ីណូក្នុងតំបន់សេដ្ឋកិច្ចពិសេស ថ្មដា នៅស្រុកវាលវែង ខេត្តពោធិ៍សាត់ ជាប់ព្រំដែនកម្ពុជា-ថៃ ក្នុងទឹកប្រាក់ប្រមាណ ១០០លានដុល្លារ ($98,977,230) ត្រូវបានរកឃើញថាកំពុងបើកអាជីវកម្មឧក្រិដ្ឋកម្មអនឡាញ ដែលមានបុគ្គលិកជាង ១ម៉ឺននាក់ ភាគច្រើនជាជនជាតិចិន ជនជាតិថៃ និងវៀតណាម ដែលពួកគេត្រូវបានធ្វើទារុណកម្ម និងបង្ខាំងមិនឲ្យចេញទៅក្រៅនោះឡើយ។
អ្នកឧកញ៉ា ទ្រី ភាព អគ្គនាយកក្រុមហ៊ុន ទ្រី ភាព គ្រុប និងក្រុមហ៊ុន MDS ដែលត្រូវបានអង្គការសង្គមស៊ីវិលជាតិ និងអន្តរជាតិធ្វើការចោទប្រកាន់ថាជាឧក្រិដ្ឋជនបំផ្លាញព្រៃឈើនៅស្រុកខ្មែរ ដោយជ្រកក្រោមសិទ្ធិវិនិយោគលើដីសម្បទានសេដ្ឋកិច្ចដើម្បីធ្វើការកាប់បំផ្លាញព្រៃឈើនាំទៅក្រៅប្រទេស។
យោងតាមប្រភពដែលជាបុគ្គលិករបស់ក្រុមហ៊ុនលោក ទ្រី ភាព បានប្រាប់សារព័ត៌មាន ឌឹ ខេមបូឌា ដេលី ដោយសុំមិនបញ្ចេញឈ្មោះដើម្បីសុវត្ថិភាព បានឲ្យដឹងថា សម្រាប់តែខេត្តពោធិ៍សាត់ ក្នុងស្រុកវាលវែង តែមួយ ក្រុមហ៊ុន MDS របស់លោក ទ្រី ភាព មានបុគ្គលិកដល់ទៅជាង ១ម៉ឺននាក់ ភាគច្រើនជាជនជាតិចិន។
អ្នកទាំងនោះភាគច្រើនត្រូវបានគេទិញ និងត្រូវបានគេបោកឲ្យមកធ្វើការនៅក្នុងក្រុមហ៊ុនរបស់លោក ទ្រី ភាព ដោយតម្រូវឲ្យមានចំណូលក្នុង ១ខែ ១០លានដុល្លារ ឬស្មើនឹង ១២០លានដុល្លារក្នុង១ឆ្នាំ។
ប្រភពដដែលអះអាងថា នេះសម្រាប់តែខេត្តពោធិ៍សាត់ ក្នុងស្រុកវាលវែង មួយប៉ុណ្ណោះ ដែលគេនៅមិនទាន់រាប់តំបន់ផ្សេងៗទៀតក្នុងប្រទេសកម្ពុជា ដូចជានៅក្រុងប៉ោយប៉ែត និងនៅតាមបណ្តាខេត្តមួយចំនួនជាប់ព្រំដែនវៀតណាម ផ្សេងទៀតនៅឡើយទេ។
ប្រភពដដែលអះអាងថា នៅក្នុងតំបន់សេដ្ឋកិច្ចពិសេសដែលមានការយាមកាមយ៉ាងហ្មត់ចត់នោះ មានអាជីវកម្មល្បែងអនឡាញ អាជីវកម្មរ៉ែដែលនាំចេញដោយគេចពន្ធ អាជីវកម្មឈើប្រណិត និងមានកន្លែងសម្រាប់បង្ខាំងមនុស្សដោយប្រើដំបងឆក់ថែមទៀត ហើយការបង្ខាំងមនុស្សមានករណីខ្លះរហូតដល់ស្លាប់ ប៉ុន្តែពុំដែលមានសមត្ថកិច្ចណាចុះទៅបង្ក្រាបនោះទេ។
ប្រភពដដែលអះអាងថា ប្រសិនបើបុគ្គលិកណាមានកិច្ចការចាំបាច់ត្រូវចេញក្រៅ មានរថយន្តក្រុងធំៗសម្រាប់ដឹកជញ្ជូនពួកគេ។ រថយន្តដែលដឹកជញ្ជូននោះដាក់ឈ្មោះជាភាសាចិន និងអង់គ្លេសថា MDS HENG HE PURSAT THMOR DAR SPECIAL ECONOMIC ZONE SPECIAL LINE CAR។
ប្រភពដដែលបានអះអាងថា ឧក្រិដ្ឋកម្មអនឡាញនេះ លោក ទ្រី ភាព បានរកស៊ីបានប្រហែល ២ឆ្នាំមកហើយ។ ក្រុមម៉ាហ្វីយ៉ាចិន បានចាប់ដៃរកស៊ីជាមួយលោក ទ្រី ភាព ជាទ្រង់ទ្រាយធំ។
ចំណែកធនាគារ ហេង ហ៊ី (ខេមបូឌា) ខមមើសល ប៊ែង ម.ក HENG HE (CAMBODIA) COMMERCIAL BANK PLC) ជាក្រុមហ៊ុននេះជាប់សង្ស័យថាជាបណ្ដាញឧក្រិដ្ឋកម្មឆបោក និងជួញដូរមនុស្សនៅកម្ពុជា ដែលសហការជាមួយឧក្រិដ្ឋជនជនជាតិចិន នោះ ក៏រកស៊ីនៅទីនោះដែរ។
ធនាគារនេះក៏ត្រូវគេដឹងថា មានភាគហ៊ុនរបស់ឧកញ៉ា ហ៊ុន តូ ដែរ ដែលស្ថាប័នហិរញ្ញវត្ថុអន្តរជាតិកំពុងធ្វើការស៊ើបអង្កេតករណីលាងលុយកខ្វក់ និងការចរាចរលុយឌីជីថល ឬហៅថា Cryto Currency ដែរ ហើយបញ្ហានេះធនាគារជាតិនៃកម្ពុជា មិនទាន់បើកការស៊ើបអង្កេត និងផ្អាកដំណើរការរបស់ធនាគារ ហេង ហ៊ី នៅឡើយទេ។
លោក ហ៊ុន តូ ដែលល្បីឈ្មោះខាងរកស៊ីគ្រឿងញៀនឆ្លងដែនខុសច្បាប់ ត្រូវជាបងប្អូនជីដូនមួយរបស់លោក ហ៊ុន ម៉ាណែត និងជាក្មួយប្រុសបង្កើតរបស់ប្រធានគណបក្សកាន់អំណាច លោក ហ៊ុន សែន ត្រូវបានរកឃើញជាថ្មីជាប់ពាក់ព័ន្ធនឹងការរកស៊ីទីផ្សារអនឡាញខ្មៅងងឹត ឆបោករូបិយប័ណ្ណគ្រីបតូក្នុងតម្លៃទឹកប្រាក់រហូតដល់ជាង ៤៩ពាន់លានដុល្លារអាមេរិក ចាប់តាំងពីឆ្នាំ២០២១ មក។
ប្រភពដដែលអះអាងថា នៅក្នុងប្រទេសកម្ពុជាបច្ចុប្បន្នគេសង្កេតឃើញក្រុមឧក្រិដ្ឋជនចិន មានវត្តមាននៅតាមកាស៊ីណូក្នុងព្រះរាជាណាចក្រកម្ពុជាសឹងគ្រប់ទីកន្លែងទាំងអស់ ហើយនាយករដ្ឋមន្ត្រីថ្មីនៅមិនទាន់មានវិធានការបណ្តេញពួកគេចេញពីកម្ពុជា ដើម្បីស្ដារមុខមាត់ប្រទេសលើឆាកអន្តរជាតិ និងសេដ្ឋកិច្ចជាតិនៅឡើយទេ។
អង្គការអន្តជាតិបានធ្វើការវាយតម្លៃ និងធ្វើការបូកសរុបឲ្យឃើញថា លុយសូកប៉ាន់របស់ក្រុមឧក្រិដ្ឋជនអនឡាញដែលបានសូកប៉ាន់ដល់សមត្ថកិច្ចកម្ពុជាឲ្យការពារមុខរបររកស៊ីបោកប្រាស់តាមអនឡាញ និងចាប់ជំរិតតាមអនឡាញរបស់ពួកគេមានចំនួនជាង ៧ពាន់លានដុល្លារក្នុង ១ឆ្នាំ ដែលលុយទាំងនោះមិនបានយកមកជួយសេដ្ឋកិច្ចជាតិ និងពលរដ្ឋខ្មែរនោះឡើយ ស្របពេលដែលប្រជាពលរដ្ឋកំពុងជំពាក់ស្ថាប័នមីក្រូហិរញ្ញវត្ថុវ័ណ្ឌក ដែលមានទឹកប្រាក់សរុបទាំងអស់មានចំនួន ៩,4ពាន់លានដុល្លារសព្វថ្ងៃនេះ។
ប្រភពពីបុគ្គលិករបស់លោក ទ្រី ភាព ដដែលបានឲ្យដឹងថា កាលពីពេលថ្មីៗនេះ កូនប្រសារបស់លោក ហ៊ុន សែន គឺលោក ឌី វិជ្ជា បានចុះចាប់ក្រុមឧក្រិដ្ឋជនអនឡាញនៅផ្លូវជាតិលេខ៣ ក្នុងខេត្តកំពង់ស្ពឺ បានចំនួនជាង ១០០០នាក់ ប៉ុន្តែចំនួនឧក្រិដ្ឋជនពិតប្រាកដមានចំនួនជាង ៨ពាន់នាក់ក្នុងអគារធំៗមួយចំនួននៅទីនោះ។
ហេតុអ្វីចំនួនឧក្រិដ្ឋជនជាង ៨ពាន់នាក់ តែចាប់តែជាង ១ពាន់នាក់ទៅវិញ ?
ប្រភពដដែលឲ្យដឹងថា អ្នកដែលត្រូវចាប់ខ្លួនអាចសូកប៉ាន់លុយជាង ១ម៉ឺនទៅ ២ម៉ឺនដុល្លារ ដើម្បីរួចខ្លួនចេញមកវិញ។
ប្រភពដដែលអះអាងថា លុយដែលលោក ទ្រី ភាព រកបាននេះបានបង់បន្តិចបន្តួចទៅឲ្យលោក ហ៊ុន សែន តែប៉ុណ្ណោះ ហើយចំណែកដ៏ច្រើនសន្ធឹកសន្ធាប់រាប់រយលានផ្សេងទៀត ត្រូវបានលាក់ទុកជាសាច់ប្រាក់នៅទីស្នាក់ការកណ្តាលរបស់លោកស្ថិតនៅលើមហាវិថីព្រះនរោត្តម។ បុគ្គលិករបស់លោក ទ្រី ភាព រូបនោះបានបន្តទៀតថា លោក ទ្រី ភាព បានឲ្យមនុស្សជំនិតរបស់លោកមួយក្រុមបង្កើតគណនី Crypto Currency ដែលមានឈ្មោះថា USDT និង USDC។
ចំណែកប្រភពពីមន្ត្រីរបស់គណបក្សកាន់អំណាចប្រចាំនៅកាកបាទក្រហមកម្ពុជាខ្លះឲ្យដឹងថា សព្វថ្ងៃនេះមានមន្ត្រីជាន់ខ្ពស់ក្នុងជួររដ្ឋាភិបាល ឬក្នុងជួរគណបក្សប្រជាជនកម្ពុជាកំពុងមានទំនាស់ក្នុងការចែកទីតាំងការពារឧក្រិដ្ឋជនអនឡាញ ដើម្បីទទួលបានផលប្រយោជន៍ពីក្រុមសង្គមងងឹតទាំងឡាយដែលយកប្រទេសកម្ពុជាជាឋានសួគ៌របស់ពួកគេ។
ឧកញ៉ា ទ្រី ភាព គឺជាបុគ្គលមួយរូបក្នុងចំណោមបុគ្គលមួយចំនួនទៀតដែលត្រូវបានសហរដ្ឋអាមេរិកដាក់ទណ្ឌកម្ម ដោយការបង្កកទ្រព្យសម្បត្តិ និងរឹតត្បិតទិដ្ឋាការសព្វថ្ងៃនេះ។ អ្នកទាំងនោះក៏រួមមានលោក ចៅ ភិរុណ, លោក ទៀ វិញ, លោក ហ៊ីង ប៊ុនហៀង, លោក គន់ គីម និងលោក លី យ៉ុងផាត់។
ក្រសួងហិរញ្ញវត្ថុសហរដ្ឋអាមេរិក ធ្លាប់បានប្រកាសថា លោក ទ្រី ភាព បានប្រើបណ្ដាញធំៗរបស់ខ្លួនក្នុងជួររដ្ឋាភិបាល និងយោធាដើម្បីការពារជំនួញរកស៊ីឈើខុសច្បាប់របស់ខ្លួន ហើយឈើទាំងនោះត្រូវបាននាំចេញទៅលក់នៅប្រទេសវៀតណាម ចិន សហគមន៍អឺរ៉ុប និងរុស្ស៊ី។
ដោយសារតែបែបនេះ អាមេរិកសម្រេចដាក់លោក ទ្រី ភាព និងក្រុមហ៊ុនចំនួន ១១ របស់មហាសេដ្ឋីរូបនេះក្នុងបញ្ជីខ្មៅបង្កកទ្រព្យសម្បត្តិ និងមិនឱ្យជាន់ដីសហរដ្ឋអាមេរិកចាប់តាំងពីឆ្នាំ២០១៩ រហូតដល់សព្វថ្ងៃនេះ។
សេចក្តីប្រកាសព័ត៌មានរបស់ក្រសួងហិរញ្ញវត្ថុ បានបញ្ជាក់ថា លោកឧកញ៉ា ទ្រី ភាព ជាមនុស្សស្និទ្ធនឹងលោកនាយករដ្ឋមន្ត្រី ហ៊ុន សែន។ លោកបានប្រើប្រាស់ឥទ្ធិពល និងបណ្ដាញរបស់ខ្លួនដើម្បីកេងប្រវ័ញ្ចពលរដ្ឋកម្ពុជា ហើយផ្តល់ផលប្រយោជន៍ដល់ក្រុមហ៊ុនចិន ដែលមករកស៊ីនៅកម្ពុជា។
ការដាក់ទណ្ឌកម្មនេះ ធ្វើឡើងក្រោមច្បាប់ Global Magnitsky ដែលសំដៅលើមន្ត្រីនៃរដ្ឋាភិបាលបរទេសណាដែលរំលោភសិទ្ធិមនុស្សធ្ងន់ធ្ងរ ហើយហាមឃាត់មិនឱ្យពលរដ្ឋអាមេរិកាំងធ្វើពាណិជ្ជកម្មជាមួយ ឬចេញចូលសហរដ្ឋអាមេរិកទៀតនោះទេ។
ក្រុមហ៊ុនរបស់លោកឧកញ៉ា ទ្រី ភាព ដែលត្រូវសហរដ្ឋអាមេរិកដាក់ទណ្ឌកម្ម រួមមាន៖
- Try Pheap Group
- M.D.S. Import Export
- Try Pheap Dry Port
- Try Pheap Engineering & Construction
- Try Pheap Grand Royal
- Try Pheap Import Export
- Papa Petroleum
- Try Pheap Property
- Try Pheap Travel & Tours
- M D S Thmorda S E Z
- Try Pheap Oyadav S E Z ។
សេចក្តីរាយការណ៍បង្ហាញថា ការគណនាទំហំទឹកប្រាក់វិនិយោគរបស់ក្រុមហ៊ុន ទ្រី ភាព គ្រុប មានតម្លៃដល់ទៅ ១២៧៣លានដុល្លារអាមេរិក មានដូចជា៖
- ខុនដូនៅបឹងកេងកង តម្លៃជិត ១០លានដុល្លារ ($9,310,000),
- ទ្រី ផាឡេស នៅខេត្តកែប ឬហៅថា វាំងរបស់លោក ទ្រី ភាព មានតម្លៃ ១០លានដុល្លារ ($10,000,000),
- រមណីយដ្ឋាន កោះទន្សាយ ទ្រី ភាព ឬហៅថា TRY PHEAP KOH TUNSAY RESORTS មានតម្លៃ ១៧លានដុល្លារ ($17,000,000),
- ក្រុមហ៊ុនប្រេងឥន្ធនៈ PAPA Petroleum សហការជាមួយ PTT Global Chemical Plc របស់ប្រទេសថៃ និងចិន តម្លៃ ៤០០លានដុល្លារ ($400,000,000),
- កំពង់ផែអន្តរជាតិទឹកឈូ ខេត្តកំពត ដែលចុះ MoU ជាមួយចិន តម្លៃ ៣០០លានដុល្លារ ($300,000,000),
- អាជីវកម្មឈើគ្រញូងស្ទឹងអាតៃ តម្លៃ ២២០លានដុល្លារ ($220,000,000),
- គម្រោងសាងសង់សណ្ឋាគារ និងកាស៊ីណូនៅថ្មដា តម្លៃជិត ១០០លានដុល្លារ ($98,977,230),
- រួមទាំងក្រុមហ៊ុនជិត ២០ ផ្សេងទៀត។
លោក ហ៊ុន សែន កាលពីថ្ងៃទី៦ ខែមេសា ឆ្នាំ២០២៤ បានចុះហត្ថលេខាលើព្រះរាជក្រឹត្យមួយក្នុងនាមជាប្រមុខរដ្ឋស្តីទី តែងតាំង និងផ្តល់ឋានៈដល់មេឧក្រិដ្ឋជនព្រៃឈើ គេនិយមហៅថា ស្តេចគ្រញូងឈ្មោះ ឧកញ៉ា ទ្រី ភាព រូបនេះជាទីប្រឹក្សាមានឋានៈស្មើនឹងទេសរដ្ឋមន្ត្រី។
ទោះជាយ៉ាងណាក៏ដោយ ប្រធានអង្គការប្រជាធិបតេយ្យខ្មែរក្នុងប្រទេសអូស្ត្រាលី លោក ស៊ឹង សែនករុណា បានថ្លែងឲ្យដឹងថា កម្ពុជាហាក់ក្លាយជាទីជម្រកដ៏មានផាសុកភាពរបស់បណ្ដាញក្រុមឧក្រិដ្ឋជនឆបោកតាមអនឡាញ ដែលពង្រាយគ្នារកស៊ីខុសច្បាប់កាន់តែច្រើនស្ទើរពេញផ្ទៃប្រទេស ជាពិសេសមួយរយៈចុងក្រោយនេះ គឺត្រូវបានគេរកឃើញថា ឧកញ៉ាដែលស្និទ្ធនឹងរដ្ឋាភិបាលដូចជាលោក ទ្រី ភាព កំពុងសហការរកស៊ីជាមួយចិន ដោយគ្មានអាជ្ញាធរហ៊ានចុះបង្ក្រាបនោះឡើយ។
លោកបន្ថែមថា អំពើពុករលួយនៅក្នុងប្រទេស ជាឱកាសសម្រាប់ក្រុមឧក្រិដ្ឋជនងាយស្រួលឃុបឃិតជាមួយក្រុមមន្ត្រីរដ្ឋាភិបាលមួយចំនួន ដើម្បីធ្វើសកម្មភាពពង្រីកអាជីវកម្មឆបោកតាមអនឡាញកាន់តែទូលំទូលាយនៅកម្ពុជា។
ប្រភពដដែលបន្ថែមថា ការរីករាលដាលនៃអំពើឆបោកតាមអនឡាញ និងការជួញដូរមនុស្សនៅកម្ពុជានារយៈពេលប៉ុន្មានឆ្នាំចុងក្រោយនេះ គឺដោយសារតែកត្តាអំពើពុករលួយ បក្ខពួកនិយម កង្វះតម្លាភាពនៃការអនុវត្តច្បាប់ និងគ្មានការស៊ើបអង្កេត ដើម្បីចាត់វិធានការលើអ្នកមានអំណាចដែលរងការចោទប្រកាន់ពាក់ព័ន្ធនឹងជំនួញអាជីវកម្មឧក្រិដ្ឋទាំងនេះយកមកដាក់ទោសតាមច្បាប់។
ក្រុមអ្នកសង្កេតការណ៍លើកឡើងថា របររកស៊ីបែបឆបោកអនឡាញទាំងនោះ ប្រព្រឹត្តទៅនៅពីក្រោយយីហោបនល្បែងស៊ីសងកាស៊ីណូ ដែលមានអាជ្ញាបណ្ណស្របច្បាប់ចេញដោយក្រសួងសេដ្ឋកិច្ច និងហិរញ្ញវត្ថុនៃរាជរដ្ឋាភិបាល។ បណ្ដាញឧក្រិដ្ឋកម្មបរទេសភាគច្រើនជាពួកម៉ាហ្វីយ៉ាចិន ជ្រៀតចូលមកប្រទេសកម្ពុជា មិនសូវគោរពច្បាប់នោះទេ។
ប្រភពដដែលអះអាងថា ពួកគេបានជួលសំណង់អគារជំនួញ និងខុនដូសម្រាប់ប្រើប្រាស់ជាទីស្នាក់អាស្រ័យដល់ពលករសម្រាប់ធ្វើជាការិយាល័យ ឬធ្វើជាបន្ទប់ ដើម្បីប្រព្រឹត្តអំពើបោកប្រាស់តាមប្រព័ន្ធអន្តរបណ្ដាញ ឬអ៊ីនធឺណិត។ ពួកអ្នកលេង ឬជនពាលភាគច្រើនជាឧក្រិដ្ឋជនជនជាតិចិន ដែលរកចំណូលបានរាប់ពាន់លានដុល្លារពីមុខរបរឆបោកតាមរយៈប្រព័ន្ធអ៊ីនធឺណិតនេះ។
របាយការណ៍របស់អង្គការសហប្រជាជាតិទទួលបន្ទុកសិទ្ធិមនុស្ស (UNHCHR) កាលពីចុងខែសីហា ឆ្នាំ២០២៣ បង្ហាញថា នៅក្នុងប្រទេសកម្ពុជា មនុស្សប្រមាណ ១០ម៉ឺននាក់ដែលជាជនបរទេស ត្រូវបានចាប់បង្ខំឱ្យធ្វើការងារឆបោកតាមប្រព័ន្ធអនឡាញនៅក្នុងប្រទេសកម្ពុជា។
ករណីឆបោកតាមប្រព័ន្ធអនឡាញនេះ បានកើតឡើងនៅក្នុងប្រទេសចំនួន៥ ក្នុងតំបន់អាស៊ីអាគ្នេយ៍រួមមាន កម្ពុជា ថៃ ឡាវ ភូមា និងហ្វីលីពីន។
សរុបសេចក្តីមក បញ្ហាជួញដូរមនុស្ស និងការឆបោកតាមអនឡាញមិនត្រឹមតែជាជំងឺរ៉ាំរ៉ៃប៉ុណ្ណោះទេ ប៉ុន្តែវាអាចនឹងក្លាយជាជំងឺមហារីកពិបាកព្យាបាល ដូច្នេះតើរដ្ឋាភិបាលលោក ហ៊ុន ម៉ាណែត ហ៊ានប្រើដាវអាជ្ញាសឹកចាប់ស្តេចគ្រញូង អ្នកឧកញ៉ា ទ្រី ភាព យកមកផ្ដន្ទាទោសតាមច្បាប់ និងបង្កកទ្រព្យសម្បត្តិរបស់អ្នកឧកញ៉ារូបនេះដែរឬទេ?៕
© 2024, . All rights reserved.