អ្នកសង្កេតការណ៍លើកឡើងថា ការសម្ដែងឫកពារចង់ភ្ជាប់ទំនាក់ទំនងល្អជាមួយសហរដ្ឋអាមេរិកឡើងវិញពីសំណាក់អតីតនាយករដ្ឋមន្ត្រីកម្ពុជា លោក ហ៊ុន សែន ទំនងជាអស់សង្ឃឹមនឹងជំនួយពីរដ្ឋាភិបាលកុម្មុយនីស្តចិន។
ប្រធានអង្គការប្រជាធិបតេយ្យខ្មែរដែលមានមូលដ្ឋានក្នុងប្រទេសអូស្ត្រាលី លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី១៩ ធ្នូ នេះថា បើចង់មានទំនាក់ទំនងល្អជាមួយសហរដ្ឋអាមេរិកឡើងវិញ គ្មានអ្វីក្រៅពីការធានាឱ្យបាននូវការលើកកម្ពស់លទ្ធិប្រជាធិបតេយ្យ និងការគោរពសិទ្ធិមនុស្សឡើយ ព្រោះនេះគឺជាប្រធានបទដែលសហរដ្ឋអាមេរិកយកចិត្តទុកដាក់បំផុត។
លោកថា អ្វីៗដែលប្រទេសកម្ពុជាបាត់បង់ ដូចជា ប្រព័ន្ធអនុគ្រោះពន្ធ និងការទទួលរងនូវទណ្ឌកម្មផ្សេងៗពីសហរដ្ឋអាមេរិកកន្លងមក ក៏ដោយសារតែរាជរដ្ឋាភិបាលមិនគោរពសិទ្ធិមនុស្ស ជាន់ឈ្លីប្រជាធិបតេយ្យដែរ។
លោក ស៊ឹង សែនករុណា លើកឡើងថា ការរំពឹងរបស់លោក ហ៊ុន សែន ក្នុងការភ្ជាប់នូវកិច្ចសហប្រតិបត្តិការល្អជាមួយសហរដ្ឋអាមេរិក ក៏ត្រូវពិនិត្យលើឥរិយាបថរបស់ខ្លួនឯងដែរ ថាតើប្រទេសកម្ពុជាមានភាពស្មោះត្រង់ចំពោះទំនាក់ទំនងរបស់ខ្លួនជាមួយសហរដ្ឋអាមេរិកដែរឬក៏អត់ទៅថ្ងៃមុខ។
លោកបន្តថា ប្រទេសកម្ពុជាតែងចោទប្រកាន់សហរដ្ឋអាមេរិកពាក់ព័ន្ធនឹងការធ្វើបដិវត្តន៍ពណ៌ ដើម្បីផ្តួលរំលំរដ្ឋាភិបាលជានិច្ច ជាពិសេសក្នុងសំណុំរឿងរបស់ប្រធានគណបក្សសង្គ្រោះជាតិ លោក កឹម សុខា តែងរងនូវការចោទប្រកាន់ថាមានសហរដ្ឋអាមេរិកនៅពីក្រោយរហូតដល់ពេលនេះ។
ប្រភពដដែលបញ្ជាក់ថា ការដែលចង់កែប្រែទំនាក់ទំនងជាមួយសហរដ្ឋអាមេរិក គឺជារឿងល្អ ព្រោះដើម្បីធានានូវការគោរពសិទ្ធិមនុស្ស និងការស្ដារឡើងវិញនូវលទ្ធិប្រជាធិបតេយ្យ ប៉ុន្តែបើពិនិត្យលើបទពិសោធន៍កន្លងមក លោក ហ៊ុន សែន តែងបង្កប់ល្បិចនយោបាយពិសពុលដើម្បីតែអំណាច ផលប្រយោជន៍សម្រាប់តែខ្លួនឯង និងបក្ខពួកតែប៉ុណ្ណោះ។
កាលពីថ្ងៃទី១៧ ធ្នូ ប្រធានព្រឹទ្ធសភា លោក ហ៊ុន សែន លើកឡើងក្រោយជួបជាមួយភារធារីស្តីទីនៃស្ថានទូតសហរដ្ឋអាមេរិកប្រចាំទីក្រុងភ្នំពេញ អ្នកស្រី ប្រ៊ីដជិត វ៉កឃឺរ (Bridgette Walker) ថា ជាមួយនឹងការវិលត្រឡប់នៃរដ្ឋបាលប្រធានាធិបតីថ្មីសហរដ្ឋអាមេរិក លោក ដូណាល់ ត្រាំ នាពេលខាងមុខ លោកសង្ឃឹមថាកិច្ចសហប្រតិបត្តិការរវាងប្រទេសកម្ពុជា និងសហរដ្ឋអាមេរិក កាន់តែត្រូវបានពង្រឹង និងពង្រីកបន្ថែមទៀត។
លោក ហ៊ុន សែន លើកឡើងថា រឿងចាស់គឺជាបទពិសោធន៍ក្នុងការរៀបចំឥរិយាបថសម្រាប់ទំនាក់ទំនងនៃអនាគតប្រទេសទាំងពីរ ជាពិសេសក្នុងការកសាងទំនុកចិត្តរវាងប្រទេសកម្ពុជា និងសហរដ្ឋអាមេរិក ដោយការពិនិត្យចំណុចអាទិភាពនៃកិច្ចសហប្រតិបត្តិការផ្សេងៗ រួមទាំងវិស័យសេដ្ឋកិច្ច និងការវិនិយោគផងដែរ។
អតីតនាយករដ្ឋមន្ត្រីខ្មែររូបនេះបញ្ជាក់ថា វត្តមាននាវាចម្បាំងសហរដ្ឋអាមេរិក USS SAVANNAH នៅកម្ពុជា ក៏បង្ហាញពីទំនាក់ទំនងល្អនៅក្នុងវិស័យការពារជាតិ និងកងទ័ពផងដែរបន្ថែមលើកិច្ចសហប្រតិបត្តិការផ្សេងទៀតដែលមានស្រាប់។
ប្រទេសកម្ពុជាក៏ធ្លាប់បានផ្តាច់ទំនាក់ទំនងជាមួយសហរដ្ឋអាមេរិក តាមរយៈការផ្អាកធ្វើសមយុទ្ធយោធារួមគ្នាដែលមានឈ្មោះថា សមយុទ្ធឆ្មាំអង្គរ (Angkor Sentinels) ដែលគិតមកទល់នឹងពេលនេះ គឺមានរយៈពេល ៧ឆ្នាំហើយចាប់តាំងពីឆ្នាំ២០១៧ មក។ ប៉ុន្តែនៅថ្ងៃទី១៨ ខែធ្នូ ឆ្នាំ២០២៤ នេះ ប្រទេសកម្ពុជាស្នើសុំសហរដ្ឋអាមេរិកឱ្យពិនិត្យមើលលទ្ធភាពរៀបចំធ្វើសមយុទ្ធយោធា «ឆ្មាំអង្គរ» និងសមយុទ្ធទេវតាប៉ាស៊ីហ្វិក (Pacific Angel) រួមគ្នាឡើងវិញ។
អ្នកតាមដានរឿងស្រុកខ្មែរមួយចំនួនមិនទាន់ទុកចិត្តល្បែងនយោបាយដែលលោក ហ៊ុន សែន លេងជាមួយមហាអំណាចនោះទេ ព្រោះថាលោកធ្លាប់និយាយអ៊ីចេះ ធ្វើអ៊ីចុះកន្លងមក ដោយយកលំនាំតាមអតីតព្រះមហាក្សត្រ ព្រះបាទ នរោត្តម សីហនុ ព្រះបរមរតនកោដ្ឋ។ មួយវិញទៀត គេក៏មិនទាន់សង្ឃឹមថាប្រធានាធិបតីថ្មីសហរដ្ឋអាមេរិក នឹងមានគោលនយោបាយការបរទេសលើកស្ទួយប្រជាធិបតេយ្យ សេរីភាព សិទ្ធិមនុស្ស ឬយុត្តិធម៌សង្គមសម្រាប់ប្រទេសកម្ពុជាខ្លាំងក្លាដែរឬទេ ក្រៅតែពីចាប់ដៃរកស៊ីជាមួយគ្នានោះ៕
© 2024, . All rights reserved.