គណបក្សសង្គ្រោះជាតិប្រចាំសហរដ្ឋអាមេរិក (CNRP-USA) បួងសួងសូមឱ្យប្រធានគណបក្សសង្គ្រោះជាតិ លោក កឹម សុខា ឆាប់ទទួលបានសេរីភាពពេញលេញឡើងវិញក្នុងឱកាសឆ្លងឆ្នាំសកលឆ្នាំ២០២៥ នេះ ដើម្បីបម្រើប្រទេសជាតិ និងប្រជាពលរដ្ឋខ្មែរបន្តទៀត។
ថ្នាក់ដឹកនាំ សមាជិក និងក្រុមអ្នកគាំទ្រគណបក្សសង្គ្រោះជាតិប្រចាំសហរដ្ឋអាមេរិក (CNRP-USA) បានចេញសារលិខិតជូនពរប្រធានគណបក្សសង្គ្រោះជាតិ ដែលកំពុងជាប់ឃុំ លោក កឹម សុខា កាលពីយប់ថ្ងៃទី៣១ ខែធ្នូ ឆ្នាំ២០២៤ បួងសួងដល់បារមីវត្ថុស័ក្តិសិទ្ធិក្នុងលោកប្រោះព្រំសព្ទសាធុការពរជ័យ សិរីមង្គល ក្នុងឱកាសឆ្នាំថ្មី ឆ្នាំសកល ២០២៥ សូមឱ្យលោក កឹម សុខា ឆាប់ទទួលបានសេរីភាពពេញលេញឡើងវិញក្នុងពេលឆាប់ៗនេះ។
ការចេញសារជូនពរនេះ ធ្វើឡើងស្របពេលដែលប្រធានគណបក្សសង្គ្រោះជាតិ លោក កឹម សុខា ត្រូវបានតុលាការកាត់ទោសឱ្យជាប់ពន្ធនាគាររយៈពេល ២៧ឆ្នាំដែលកំពុងត្រូវបានឃុំខ្លួនក្នុងផ្ទះសព្វថ្ងៃនេះ។
គិតចាប់តាំងពីថ្ងៃទី៣ ខែមីនា ឆ្នាំ២០២៣ មក ប្រធានគណបក្សសង្គ្រោះជាតិ លោក កឹម សុខា បានបាត់បង់សេរីភាពអស់រយៈពេលជិត ៧០០ថ្ងៃហើយ (៦៦៧) ដែលស្មើនឹង ១ឆ្នាំ ៩ខែ ២៨ថ្ងៃ បើគិតមកទល់នឹងថ្ងៃទី១ ខែមករា ឆ្នាំ២០២៥ នេះ។
កាលពីថ្ងៃទី៣ ខែមីនា ឆ្នាំ២០២៣ សាលាដំបូងរាជធានីភ្នំពេញ បានប្រកាសសាលក្រមផ្ដន្ទាទោសលោក កឹម សុខា ប្រធានគណបក្សសង្គ្រោះជាតិ ឲ្យជាប់ពន្ធនាគាររយៈពេល ២៧ឆ្នាំ ដោយឃុំខ្លួននៅក្នុងផ្ទះ និងហាមមិនឱ្យជួបអ្នកដទៃក្រៅពីអ្នករស់នៅក្នុងផ្ទះជាមួយ។ បន្ថែមពីនេះ តុលាការក៏បានហាមឃាត់សិទ្ធិមិនឲ្យធ្វើនយោបាយអស់មួយជីវិតផងដែរ។
លោក កឹម សុខា ដែលចោទប្រកាន់ដោយតុលាការក្រុងភ្នំពេញ បានចោទភ្ជាប់ជាមួយសហរដ្ឋអាមេរិក ថាជាមេគំនិតនៅពីក្រោយខ្នង ក្នុងនោះទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) វិទ្យាស្ថានជាតិប្រជាធិបតេយ្យ (NDI) និងវិទ្យាស្ថានសាធារណរដ្ឋអន្តរជាតិ (IRI) ក៏ត្រូវបានរាជរដ្ឋាភិបាលចោទថាបានជាប់ពាក់ព័ន្ធក្នុងសំណុំរឿងក្បត់ជាតិនេះដែរ។
យ៉ាងណាមិញ អតីតនាយកខុទ្ទកាល័យមេដឹកនាំបក្សប្រឆាំង លោក មុត ចន្ថា បានលើកឡើងកាលពីពេលថ្មីៗនេះថា ទាំងការចោទប្រកាន់មកលើសហរដ្ឋអាមេរិក និងភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ រួមទាំងលោក កឹម សុខា គឺសុទ្ធតែជាអំពើមួលបង្កាច់ និងប្រតិដ្ឋឡើងដើម្បីចាប់ខ្លួន និងកម្ទេចបក្សប្រឆាំង ដើម្បីកុំឱ្យគណបក្សសង្គ្រោះជាតិ ផ្តួលគណបក្សប្រជាជនកម្ពុជានៅក្នុងការបោះឆ្នោតអាណត្តិទី៦ ឆ្នាំ២០១៨ កន្លងទៅតែប៉ុណ្ណោះ៕
© 2025, . All rights reserved.