អតីតមេដឹកនាំបក្សប្រឆាំង លោក សម រង្ស៊ី ជឿជាក់ថាតុលាការថៃ នឹងចេញដីកាចាប់ខ្លួនទីប្រឹក្សាមេដឹកនាំបក្សកាន់អំណាចលោក ហ៊ុន សែន ឈ្មោះ លី រតនៈរស្មី ដែលមានឈ្មោះជាភាសាថៃ ថា ស៊ុមវ៉ាំង បាំរុងគីត ដែលបានជួល និងវេរលុយទៅឱ្យឃាតករក្នុងពេលឆាប់ៗខាងមុខនេះ ដើម្បីអាចគេចផុតពីការបាត់ខ្លួនដោយសារត្រូវគេសម្លាប់។
លោក សម រង្ស៊ី សរសេរលើទំព័រហ្វេសប៊ុករបស់ខ្លួននៅថ្ងៃទី១៤ មករា នេះថា បើតុលាការថៃ មិនអាចចាប់ខ្លួនជនសង្ស័យ លី រតនៈរស្មី បានទេ គាត់ក៏ប្រហែលជាអាចនឹងក្លាយជាចំណីសត្វក្រពើដែរ ព្រោះករណីបែបនេះធ្លាប់កើតលើអង្គរក្សលោក ហ៊ុន សែន ឈ្មោះ ប្រេស៊ីល ម្តងរួចមកហើយ បន្ទាប់ពីជាប់ចោទថាបានសម្លាប់ហ្វូងបាតុករជាង ១៦នាក់ ក្នុងព្រឹត្តិការណ៍គប់គ្រាប់បែកដៃកាលពីអំឡុងឆ្នាំ១៩៩៧ កន្លងទៅនោះ។
លោក សម រង្ស៊ី អះអាងថា ការប្រគល់ជនសង្ស័យឈ្មោះ ពេជ្រ គឹមស្រ៊ិន និងជនជាតិខ្មែរឈ្មោះ លី រតនៈរស្មី ដែលមានឈ្មោះជាភាសាថៃ ថា ស៊ុមវ៉ាំង បាំរុងគីត (Sumvang Bamrongkit) ឱ្យសមត្ថកិច្ចថៃ ជាជម្រើសដ៏ល្អបំផុត ដើម្បីឱ្យពួកគេអាចគេចផុតពីការបាត់ខ្លួនដោយសារត្រូវគេសម្លាប់។
អតីតមេដឹកនាំបក្សប្រឆាំងរូបនេះបញ្ជាក់ថា ភស្តុតាងកាន់តែច្បាស់ដែលបង្ហាញថា លោក លី រតនៈរស្មី បានជួល និងវេរលុយទៅឱ្យឃាតករក្នុងផែនការបាញ់សម្លាប់តំណាងរាស្ត្របក្សប្រឆាំងលោក លិម គិមយ៉ា ស្របពេលដែលជនសង្ស័យរូបនេះត្រូវគេដឹងថាជាកូនចៅរបស់អភិបាលក្រុងភ្នំពេញ លោក ឃួង ស្រេង ហើយក៏ជាទីប្រឹក្សារបស់លោក ហ៊ុន សែន។
លោក ហ៊ុន សែន ប្រធានបក្ស បានតែងតាំងលោក លី រតនៈរស្មី ជាទីប្រឹក្សារបស់លោកនៅថ្ងៃទី២០ ខែមករា ឆ្នាំ២០២៤។
កាលពីថ្ងៃទី១៣ ខែមករា ឆ្នាំ២០២៥ សារព័ត៌មានម៉ាឡេស៊ី The Star បានចុះផ្សាយថា សមត្ថកិច្ចថៃ បានកំណត់អត្តសញ្ញាណអ្នកដែលជួលឃាតករឱ្យសម្លាប់លោក លិម គិមយ៉ា បានហើយ ប៉ុន្តែប៉ូលិសមិនបានបង្ហាញព័ត៌មានលម្អិតទេ គ្រាន់តែអះអាងថាពួកគេមានទំនុកចិត្តក្នុងការតាមដានស្វែងរកចាប់ខ្លួនជនសង្ស័យម្នាក់នេះឱ្យបានក្នុងពេលឆាប់ៗខាងមុខ។
ជុំវិញអំពើឃាតកម្មនេះ អាជ្ញាធរថៃ បានស្រាវជ្រាវរកឃើញអ្នកពាក់ព័ន្ធបុរសជនជាតិថៃម្នាក់ទៀតដែរដែលមានឈ្មោះថា Chakit Buaplee អាយុ ៤៧ឆ្នាំ ជាអ្នកបើករថយន្តជូនឃាតកររត់គេចខ្លួនចូលទឹកដីកម្ពុជា ដែលត្រូវបានចោទប្រកាន់ពីបទសមគំនិតក្នុងឃាតកម្មនេះ។
ឃាតករឈ្មោះ អេកាឡាក់ ផែណយ (Ekkalak Phaenoi) ដែលបានបាញ់សម្លាប់តំណាងរាស្ត្រគណបក្សសង្គ្រោះជាតិ លោក លិម គិមយ៉ា កំពុងប្រឈមមុខនឹងការចោទប្រកាន់ ៣បទល្មើស គឺពីបទឃាតកម្មគិតទុកជាមុន ពីបទកាន់អាវុធនៅទីសាធារណៈដោយមិនមានហេតុផលសមរម្យ និងពីបទបាញ់អាវុធដោយគ្មានហេតុផលផងដែរ ខណៈអ្នកពាក់ព័ន្ធក្នុងអំពើឃាតកម្មនេះកំពុងត្រូវបានសមត្ថកិច្ចថៃ ស៊ើបអង្កេតស្វែងរកចាប់ខ្លួនយ៉ាងដិតដល់។
ក្រោយអំពើឃាតកម្មនេះ គេនៅមិនទាន់ឃើញរដ្ឋាភិបាលកម្ពុជា បង្ហាញជំហរក្នុងការបញ្ជូនជនសង្ស័យដែលពាក់ព័ន្ធនឹងការបាញ់ប្រហារនេះទៅឱ្យសមត្ថកិច្ចថៃ បើកការស៊ើបអង្កេតនៅឡើយទេ ដែលជាហេតុនាំឱ្យមានការសង្ស័យកាន់តែខ្លាំងថា អំពើឃាតកម្មនេះគឺត្រកូលហ៊ុនជាអ្នកបញ្ជាពីក្រោយខ្នង៕
© 2025, . All rights reserved.